كريپتيا — سپارتاداعى ءولتىرۋدىڭ زاڭدى ءتۇرى
بەلگىلى بولعانداي، سپارتالىقتاردىڭ تاربيەسى – وتە قاتاڭ. سپارتادا عىلىم، ونەر، قولونەرگە ءمان بەرىلمەگەن. جەر وڭدەۋ يلوتتارعا، ياعني قۇلدارعا مىندەتتەلگەن. ال ازات سپارتالىق ءۇشىن مۇنداي كاسىپ ۇياتتى بولعان. ءتىپتى، بالالاردى ساۋاتتىلىققا قاجەتتى دەڭگەيگە دەيىن عانا ۇيرەتكەن.
ناعىز سپارتالىق ءۇشىن ەڭ ماڭىزدى ءارى لايىقتى دۇنيە – سوعىس. ۇل بالالاردى 7 جاسقا تولعاننان-اق اگەلا اتالاتىن ەرەكشە مەكتەپكە بەرگەن. وندا ۇلدار ەرلىك، تاباندىلىق پەن ۇلكەندەرگە باعىنۋعا تاربيەلەنەدى. ال 12 جاستان باستاپ ناعىز اسكەري تاربيە بەرىلگەن. ياعني جاس سپارتالىقتاردى قاتىگەزدىك پەن الدىنا كەلگەن جاندى مەرت ەتۋگە دايىن بولۋعا ۇيرەتە باستايدى.
ەر جەتكەن جاۋىنگەرلەردىڭ العاشقى قۇرباندارى – يلوتتار. قۇلدارعا شابۋىل جاساۋ «كريپتيا» دەپ اتالعان. بۇلايشا جازىقسىز جانداردى ءولتىرۋ زاڭدى نەگىزدە بولعان. ەفورلار، ياعني سپارتاداعى جوعارى سوت بيلىگى وكىلدەرى يلوتتارعا قارسى سوعىس جاريالاعان.
قىسقا سەمسەرمەن قارۋلانعان جاس جاۋىنگەرلەر يلوتتاردىڭ ۇيىنە شاپقىنشىلىق جاساعان نەمەسە ەگىس القابىندا ەڭبەكتەنىپ جۇرگەن ادامداردى ولتىرگەن. قۇربانىنا سەزدىرمەستەن جاقىنداپ، سەمسەردى ءبىر سەرمەگەي اجال قۇشتىرۋ كريپتيادا ەرەكشە باعالانعان. جاۋىنگەرلەر ەڭ كۇشتى دەگەن قۇلداردى ولتىرۋگە تىرىسقان. سەبەبى ءدال سونداي مىقتى جاندار سپارتادا بۇلىك تۋدىرۋى مۇمكىن ەدى.
دەسە دە تەك قۇلدار عانا قۇربان بولا بەرمەگەن. يلوتتارعا قارۋ ۇستاۋعا قاتاڭ تۇردە تىيىم سالىنعانىنا قاراماستان، ولاردىڭ كەيبىرى جاۋىنگەرلەرگە ايبات كورسەتىپ، توتەپ بەرە العان. ءساتسىز «اڭشىلىق» سپارتالىقتىڭ ولىمىمەن دە اياقتالۋى ىقتيمال. ءبىراق مۇنداي جاعدايدا قۇلداردىڭ تاعدىرى ادام شوشىرلىق كۇيگە تۇسەدى. سپارتالىقتار جولداسى باقيلىق بولعان اۋىلعا بىرنەشە جاساق اتتاندىرىپ، اۋىل تۇرعىندارىنىڭ ءبارىن اياۋسىز قىرعان.
كريپتانىڭ نەگىزگى ماقساتى – جەتكىنشەكتەرگە ءولتىرۋ ءىلىمىنىڭ نەگىزدەرىن ۇيرەتۋ عانا ەمەس، سونىمەن قاتار يلوتتاردىڭ جۇرەگىندە ۇرەي تۋدىرۋ. ولار ۇنەمى ۇرەيمەن ءومىر ءسۇرۋى كەرەك ەدى. يلوتتار ارقىلى جاس سپارتالىقتارعا ادام بويىنداعى كەمشىلىكتەر مەن جاعىمسىز قىلىقتاردى كورسەتكەن. مىسالى، جاس سپارتالىقتارعا ماس ادامنىڭ حايۋان كۇيىنە تۇسەتىنىن كورسەتۋ ءۇشىن، قۇلداردى شاراپقا سىلقيتا تويعىزعان.
كريپتيا كەزىندە سپارتالىقتار اشىق تۇردە ارامدىققا بارعان. بىردە جۇزدەگەن يلوت قانىشەرلەردەن قاشىپ، پوسەيدون عيباداتحاناسىندا تىعىلعان. زاڭ بويىنشا عيباداتحاناداعى ادامعا تيىسۋگە بولمايدى. وسى كەزدە سپارتالىقتار قۇلدارعا ءومىرىن ساقتاۋعا ۋادە بەرەدى. جاۋىنگەرلەر سوزىنە سەنگەن قۇلدار بىرتىندەپ عيباداتحانادان شىعا باستايدى. الايدا جاۋىنگەرلەر ۋادەسىنەن تايىپ، بارلىعىن قىرىپ سالادى.
كريپتيا سپارتا تاريحىنىڭ سوڭعى نۇكتەسىنە دەيىن جالعاسقان. گرەكيانى ريم جاۋلاپ العاننان كەيىن، ادامداردىڭ قانىن توككەن مۇنداي قاتىگەز ءداستۇر ۇمىت قالعان-دى.
You Might Also Like
-
پاۆلودار وبلىسىنىڭ اكىمى بولات باقاۋوۆ وڭىردەگى بارلىق بالاباقشالارعا مەملەكەتتىك تىلدەگى تاربيەنى ەنگىزۋدى ۇسىندى.
