InfoHub Logo

ءزىمبىر – عالامشارىمىزداعى ەڭ پايدالى ءارى ءدامدى دامدەۋىشتىڭ ءبىرى. ول – قۇنارلى زاتتارعا، بيولوگيالىق بەلسەندى قوسىلىستارعا باي. ءزىمبىر مەن ليمون شايىن ىشكىڭىز كەلە مە؟ مۇمكىن ءزىمبىر قوسىلعان سالات قالايتىن بولارسىز؟ ارينە، ول اركىمنىڭ ءوز تاڭداۋى. ال ءبىز كۇندەلىكتى ءزىمبىر تۇتىنۋدىڭ دەنساۋلىعىڭىز بەن اعزاڭىزعا تيگىزەر 5 ءتۇرلى پايداسىن ءسوز ەتپەكپىز.

ءزىمبىر – كۇشتى انتيوكسيدانت

زىمبىرگە ەرەكشە ءدام مەن ءيىس بەرەتىن – قۇرامىنداعى تابيعي مايلار. ولاردىڭ ىشىندەگى ەڭ ماڭىزدىسى – گينگەرول. ول – ءزىمبىردىڭ كوپتەگەن پايدالى قاسيەتىن قامتاماسىز ەتەتىن بيولوگيالىق بەلسەندى قوسىلىس. جالپى، گينگەرولدى قابىنۋعا قارسى جانە انتيوكسيدانتتىق اسەرى بار كۇشتى قۇرال رەتىندە بىلەمىز. بۇل تابيعي ماي اعزاڭىزعا جۇقپالى ىندەتكە، كۇيزەلىسكە توتەپ بەرىپ، كۇش-قۋاتىڭىزدى ۇزاق ۋاقىتقا ساقتاۋعا كومەكتەسەدى.

جۇرەك اينۋىن باسادى

جۇرگىزىلگەن زەرتتەۋ جۇمىستارى ءزىمبىر تامىرىنىڭ جۇرەك اينۋىنا قارسى ءتيىمدى قۇرال ەكەندىگىن كورسەتتى. بۇل دامدەۋىشتىڭ تەڭىز اۋرۋىنا شالدىققاندا كومەكتەسەندىگى جايلى اڭىزدار دا جوق ەمەس. ءتىپتى، كەي عالىمداردىڭ ايتۋىنشا، ءزىمبىردىڭ جۇرەك اينۋىنا قارسى اسەرى ايگىلى دارى-دارمەكتەردەن ارتىق. ول قان قىسىمىنىڭ وزگەرۋى، باس جازۋ سيندرومى، وتادان كەيىن قالپىنا كەلۋ كەزەڭىندە جۇرەك اينۋ بەلگىلەرىن باسادى.

بۇلشىق ەت اۋرۋىن جەڭىلدەتەدى

AuthorityNutrition.com كورسەتكەن زەرتتەۋ جۇمىسىنىڭ ناتيجەسى بويىنشا، قاتىسۋشىلارى 11 كۇن بويى 2 گرامم ءزىمبىر تامىرىن تۇتىنعاننان كەيىن، دەنەگە ءتۇش تۇسىرەتىن جاتتىعۋلارى سەبەپتى پايدا بولعان بۇلشىق ەت اۋرۋى بىرنەشە ەسە جەڭىلدەگەن. ءزىمبىر بۇلشىق ەتكە تىكەلەي اسەر ەتپەگەنىمەن، ونىڭ قابىنۋعا قارسى اسەرى ءتان اۋرۋىن باسادى. سونىمەن قاتار ەتەككىر مەرزىمىندە ۇنتاقتالعان ءزىمبىردى تۇتىنۋ اۋىرسىنۋ سەزىمىنىڭ جەڭىلدەۋىنە سەبىن تيگىزەتىنى دالەلدەنگەن.

ءزىمبىر سۋسامىر دەرتىنە شالدىعۋ ءقاۋپىن تومەندەتەدى

بۇل زەرتتەۋ جۇمىستارىنداعى جاڭا باعى سانالعانىمەن، عالىمدار ءزىمبىردىڭ سۋسامىرعا قارسى قاسيەتى بار دەپ توپشىلايدى. 2015 جىلى سۋسامىردىڭ ءىى تۇرىنە شالدىققان 40 ناۋقاستىڭ قاتىسۋىمەن جۇرزىزىلگەن تاجىريبە بارىسىندا، تۇراقتى تۇردە ۇنتاقتالعان ءزىمبىر تۇتىنۋ (اش قارىنعا 2 گراممنان) ناۋقاستاردىڭ قانىنداعى قانت دەڭگەيىن 12%-عا دەيىن تۇسىرۋگە كومەكتەسكەن. الايدا مۇنداي ناتيجە تەك زەرتتەۋ جۇمىسى بارىسىندا عانا بايقالعان جانە قول جەتكىزگەن مالىمەتتەر اۋقامدى تاجىريبە جۇمىستارىمەن  دالەلدەنۋى ءتيىس.

ءزىمبىر مي قىزمەتىن جاقسارتادى

قىشقىلداندىراتىن كۇيزەلىس جانە سوزىلمالى قابىنۋ قارتايۋ پروسەسىن جالدامداتاتىنى بەلگىلى. جانە ءدال وسى فاكتورلاردى السگەيمەر دەرتىمەن جانە جاسقا بايلانىستى كوگنيتيۆتى بۇزىلىستارمەن بايلانىستىرادى.  جانۋارلارعا جۇرگىزىلگەن زەرتتەۋ جۇمىستارىنىڭ ءبىرقاتارى ءزىمبىر قۇرامىنداعى انتيوكسيدانتتار مەن بەلسەندى قوسىلىستار ميدا ورىن الاتىن قابىنۋ رەاكسياسىن باۋلاتاتىنىن كورسەتكەن.

مۇنان بولەك، ءزىمبىردىڭ مي قىزمەتىن جاقسارتاتىن اسەرگە يە ەكەندىگى جونىندە دەرەكتەر دە بار.ورتا جاستاعى 60 ايەل ادامنىڭ دەنساۋلىعىن باقىلاۋعا العان زەرتتەۋ جۇمىسىنىڭ ناتيجەسى بويىنشا، تۇراقتى تۇردە ءزىمبىردى تۇتىنۋ رەاكسيا جىلدامدىعىن، ەستە ساقتاۋ مەن ەسەپتەۋ دالدىگىن جاقسارتادى.

---