InfoHub Logo

پاۆلودار وبلىسىنداعى مايكاين كەنتىندە ەكى بىردەي جەكەمەنشىك ۇيدەن تابىلعان ايەل مەن ونىڭ اكەسىنىڭ مۇردەسىنە قاتىستى قوزعالعان قىلمىستىق ءىس بويىنشا جاڭا مالىمەتتەر جاريالاندى. بۇل تۋرالى وڭىرلىك پوليسيا دەپارتامەنتى حابارلادى.

بۇل تۋرالى Infohub.kz اقپارات اگەنتتىگى حابارلايدى.

وقيعانىڭ ءمان-جايى

39 جاستاعى ايەل مەن 67 جاستاعى اكەسىنىڭ مۇردەسى وسى جىلدىڭ 13 اقپانىندا مايكاين كەنتىندەگى كورشىلەس ەكى ۇيدە تابىلدى. الدىن الا مالىمەتتەر بويىنشا، ولاردىڭ ءبىرى شامامەن ەكى جىل بۇرىن، ەكىنشىسى بىرنەشە اي بۇرىن قايتىس بولعان.

پوليسياعا بۇعان دەيىن دارىگەرلەر حابارلاسقان. ولار وتباسى مۇشەسىنىڭ ءبىرى ۇزاق ۋاقىت بويى قابىلداۋعا كەلمەگەنىن جانە بايلانىسقا شىقپاعانىن ايتىپ، الاڭداۋشىلىق بىلدىرگەن. الايدا، دارىگەرلەرگە ەشكىم ەسىك اشپاعان.

ءبىر ءمايىت تابىلعان ۇيدە ەگدە ايەل، ونىڭ ۇلكەن قىزى جانە التى جاسار نەمەرەسى تۇرعان. كەيىن الەۋمەتتىك جەلىلەردە كەپتىرىلگەن مايىتتەردىڭ سۋرەتتەرى پايدا بولدى. ايتۋىنشا، قىز بىرنەشە جىل بويى اناسىنىڭ ءولى دەنەسى جاتقان بولمەدە ۇيىقتاعان.

سونىمەن قاتار، مەسسەندجەرلەردە تاراعان داۋىس جازباسىندا كىشكەنتاي قىزدىڭ اجەسىنە اناسى مەن اتاسىنىڭ مايىتتەرىن بال مەن ماي جاعۋعا كومەكتەسكەنى ايتىلعان. بۇل اقپاراتتى رەسمي تۇردە راستالماعان.

وقيعاعا بايلانىستى پوليسيا قىلمىستىق ءىس قوزعادى. ءۇي يەسى – ەگدە ايەل مەن ونىڭ ۇلكەن قىزى پوليسيا بولىمشەسىنە جەتكىزىلىپ، كەيىن قاجەتتى ساراپتامالاردان وتۋگە جىبەرىلدى.

ەگدە ايەل مەن قىزىنا تاعىلعان ايىپ

پاۆلودار وبلىستىق پوليسيا دەپارتامەنتىنىڭ حابارلاۋىنشا، بۇل ءىس «ولگەن ادامنىڭ دەنەسىنە نەمەسە جەرلەۋ ورنىنا قورلىق كورسەتۋ» جانە «الاياقتىق» باپتارى بويىنشا تەرگەلۋدە.

«قازىرگى ۋاقىتتا قاجەتتى تەرگەۋ ارەكەتتەرى، سونىڭ ىشىندە سوت-پسيحولوگيالىق-پسيحياتريالىق ساراپتامالار جۇرگىزىلۋدە. ناتيجەسى بويىنشا پروسەسسۋالدىق شەشىم قابىلدانادى. ەكى ايەل دە ارنايى پسيحياتريالىق ديسپانسەرگە ورنالاستىرىلىپ، ەم قابىلداۋدا»، - دەپ حابارلادى پاۆلودار وبلىستىق پوليسيا دەپارتامەنتى باستىعىنىڭ ورىنباسارى سافۋان جامپەيىسوۆ.

اتالعان باپتار بويىنشا ايىپپۇلدان (3 مىڭ اەك – 12 975 000 تەڭگە) نەمەسە 6 جىلعا دەيىن باس بوستاندىعىن شەكتەۋ نەمەسە ايىرۋ جازاسى قاراستىرىلعان.

بالانىڭ جاعدايى

كۇدىكتى ايەلدىڭ 6 جاسار نەمەرەسى تەكسەرۋ ءۇشىن اۋرۋحاناعا ورنالاستىرىلدى.

بالا دارىگەرلەردىڭ باقىلاۋىندا بولعان كەزدە، تۋىستارى اناسى مەن اتاسىنىڭ جەرلەۋ ءراسىمىن ۇيىمداستىردى.

قازىرگى ۋاقىتتا قىز ەكىباستۇزداعى «ءۇمىت» بالالار قولداۋ ورتالىعىندا تۇرادى، ناۋرىز ايىنان باستاپ مەكتەپكە دەيىنگى سىنىپقا بارادى. مامانداردىڭ ايتۋىنشا، بالانىڭ ەشقانداي پسيحيكالىق اۋىتقۋشىلىعى جوق، ول ساناي الادى جانە بارلىق ارىپتەردى بىلەدى.

بۇعان دەيىن مايكاين كەنتىنىڭ تۇرعىندارى بۇل وتباسىنىڭ جابىق ءومىر سالتىن ۇستاناتىنىن جانە سىرت ادامداردى ۇيلەرىنە كىرگىزبەيتىنىن حابارلاعان بولاتىن. ءىس بويىنشا تەرگەۋ جالعاسۋدا.