InfoHub Logo

بۇگىن ماجىلىستە اگرارلىق ماسەلەلەر كوميتەتى ۇيىمداستىرعان «اگروونەركاسىپتىك كەشەن ونىمدەرىنىڭ ەكسپورتى: پروبلەمالارى مەن پەرسپەكتيۆالارى» تاقىرىبىنداعى دوڭگەلەك ۇستەل ءوتتى. ءىس-شاراعا ءماجىلىس ءتوراعاسىنىڭ ورىنباسارى البەرت راۋ، اۋىل شارۋاشىلىعى، ساۋدا جانە ينتەگراسيا، سىرتقى ىستەر ۆيسە-مينيسترلەرى، قارجى، ۇلتتىق ەكونوميكا جانە كولىك مينيسترلىكتەرىنىڭ وكىلدەرى، ۇلتتىق كومپانيالاردىڭ باسشىلارى، وبلىس اكىمدەرىنىڭ ورىنباسارلارى مەن «اتامەكەن» ۇكپ وكىلدەرى قاتىستى.

كوميتەت ءتوراعاسى سەرىك ەگىزبايەۆتىڭ مالىمەتىنشە، بۇگىنگى تاڭدا اۋىل شارۋاشىلىعى ونىمدەرىنىڭ ەكسپورتى 5،1 ملرد اقش دوللارىن قۇرايدى. ونىڭ ىشىندە وڭدەلگەن ونىمدەر 52%، وسىمدىك شارۋاشىلىعى 43،5%، ال مال شارۋاشىلىعى 4،4% ۇلەس الادى. سونىمەن قاتار، ەلىمىزدىڭ يمپورت كولەمى 6،6 ملرد دوللار دەڭگەيىندە تۇر. يمپورتتىق تاۋارلار اراسىندا ازىق-تۇلىك ونىمدەرى، بيداي، شوكولاد، قانت، نان جانە ۇننان جاسالعان كونديتەرلىك بۇيىمدار، مينەرالدى سۋلار مەن ىرىمشىك سياقتى تاۋارلار بار.

سەرىك ەگىزبايەۆ، ساۋدا بالانسىنىڭ اۋىل شارۋاشىلىعى سالاسىندا ءالى دە ءتيىمسىز ەكەنىن اتاپ ءوتتى. دەگەنمەن، 2024 جىلى ەلىمىزدە 25،2 ملن توننا استىق جينالىپ، ىشكى سۇرانىستى تولىق قامتاماسىز ەتىپ، ەكسپورت الەۋەتىن ارتتىرعان. مال شارۋاشىلىعى سالاسىندا دا ىلگەرىلەۋشىلىك بايقالادى، قازاقستان ءىرى قارا، قوي ەتى، قۇس ەتى، بال، تەرى، اكۆاوسىرۋ ونىمدەرىن ەكسپورتتاۋعا مۇمكىندىك الىپ وتىر.

دوڭگەلەك ۇستەل بارىسىندا قاتىسۋشىلار لوگيستيكالىق جانە كەدەندىك راسىمدەردى وڭايلاتۋ، نارىقتارعا قولجەتىمدىلىك، ەت ونىمدەرىنىڭ ەكسپورتتىق الەۋەتى، ۆەتەريناريالىق شەكتەۋلەر، ينفراقۇرىلىمدىق توسقاۋىلدار جانە استىقتى ساقتاۋ مەن تاسىمالداۋ ماسەلەلەرىن كەڭىنەن تالقىلادى.