InfoHub Logo

وزگەنىڭ تەمىر-تەرسەگىنە جان بىتىرگەن شەبەر، ءوز دەنساۋلىعىنا دا سونداي نازار اۋدارعاندا عوي

ءومىر – وتكىنشى. ءبىز ونى جاقسى بىلەمىز، ءبىراق كوبىنە ۇمىتىپ كەتەمىز. قاسىمىزدا جۇرگەن ادامداردىڭ ماڭگىلىك ەمەس ەكەنىن، ولاردىڭ ءارقايسىسى بىزگە ۋاقىتشا قوناق ەكەنىن كەيدە سەزىنبەيمىز. قاراپايىم ءبىر كۇندە، كۇتپەگەن جەردە، جاي عانا سىرقات دەپ ويلاعان نارسە – سوڭعى ساتكە اينالۋى مۇمكىن.

جاقىندا مەن ءۇشىن اسا اۋىر جاعداي ورىن الدى. كورشىم كەنەتتەن اۋرۋحاناعا ءتۇسىپ، سول جەردە جان ءتاسىلىم ەتتى. ويلاماعان جەردەن. جاي عانا اسقازان اۋىرۋى دەپ بارعان ادام، جۇرەگى توقتاپ، قايتىپ ورالمادى. بۇل مەنىڭ جۇرەگىمدى اۋىرتتى. ول مەنىڭ تۋىسىم ەمەس ەدى، باۋىرىم دا ەمەس. ءبىراق، شىن مانىندە، جاقىن ادامىمداي بولىپ كەتكەن جان بولاتىن.

ءبىز بىرگە تالاي كۇندەردى وتكىزدىك. اۋىلدا بىرگە تۇردىق، بىرگە كولىك الدىق. اق ءتۇستى، ازىن-اۋلاق اقشاعا ساتىپ الىنعان جيگۋلي ەكەۋىمىزدىڭ ورتاق مۇلكىمىزدەي ەدى. ول مەنىڭ كولىگىمنىڭ بۇزىلعان جەرلەرىن قاراپ، جوندەپ بەرەتىن. مەن وعان كولىگىمدى سەنىپ تاپسىراتىنمىن. بارار جەرىنە مەنىڭ تەمىر تۇلپارىمدى ءمىنىپ كەتەتىن. ونىڭ قولى التىن ەدى، اۋىلداعى ەڭ مىقتى موتوريست بولاتىن. بۇزىلعان كولىككە جان بىتىرەتىن.

ءبىراق، اتتەڭ، ءومىردىڭ ءوز زاڭى بار. وزگەنىڭ تەمىر-تەرسەگىنە جان بىتىرگەن شەبەر، ءوز دەنساۋلىعىنا دا سونداي نازار اۋدارعاندا عوي... وكىنىشتىسى، ول ءوزىنىڭ سىرقاتىنا ءمان بەرمەدى مە، الدە ءومىردىڭ بۇيىرعانى سول ما، بەلگىسىز. وزىنە ەم تابا الماي، بۇل ومىردەن ەرتە كەتتى.

كورشىمنىڭ قازاسى تەك مەن ءۇشىن عانا ەمەس، بۇكىل اۋىل ءۇشىن اۋىر ءتيدى. ويتكەنى ول تەك موتوريست ەمەس ەدى. ول – ادامدارعا جاناشىر، قولىنان كەلگەنشە كومەكتەسەتىن، ادال ازامات بولاتىن. وعان كولىگىڭدى، ءتىپتى، ءبىر شارۋاڭدى سەنىپ تاپسىرۋعا بولاتىن. جۇرەگىندە زۇلىمدىق جوق، شىنايى ادام ەدى.

ال ەندى ونى ىزدەيتىندەر كوپ، ءبىراق ورنىن باساتىن جان جوق. اۋىلدا كىمنىڭ كولىگى بۇزىلسا،ءبىرىنشى بولىپ كورشىمنىڭ ۇيىنە كەلۋشى ەدى.ەسىك الدى تولعان كولىك،كۇندەلىكتى كەمى ءبىر كولىك بولسىن ۇزىلمەيتىن.

ونىڭ جوقتىعى سەزىلەدى. اۋىل دا بۇرىنعىداي ەمەس. ءبىر نارسە جەتىسپەيدى... ءبىر ادام جەتىسپەيدى.

ءومىردىڭ قاتالدىعى – كەيبىر نارسەلەردى كەش تۇسىنەتىندىگىمىزدە. ءبىز بىرەۋدىڭ تىرشىلىگىنە ۇيرەنىپ كەتەمىز. ولار ءاردايىم جانىڭدا جۇرەتىندەي كورىنەدى. ءبىراق، شىن مانىندە، ءار كەزدەسۋدىڭ، ءار امانداسۋدىڭ، ءار ءسوزدىڭ قۇنى بار. كەيدە سوڭعى رەت كورگەنىمىزدى بىلمەيمىز.

قاسىمىزداعى ادامداردى بارىندا قادىرلەيىك. ولاردىڭ ەڭبەگىن، جاقسىلىعىن، ادالدىعىن كوزى تىرىسىندە باعالايىق. "كەشە عانا امانداسىپ ەدىك..." دەپ وكىنبەۋ ءۇشىن، العىسىمىزدى ايتۋعا، جاقسىلىق جاساۋعا اسىعايىق. سەبەبى ەرتەڭ ءبارى كەش بولۋى مۇمكىن...