InfoHub Logo

ءماجىلىس دەپۋتاتى ەرلان سايروۆ «QazaqGaz» ۇلتتىق كومپانياسىنىڭ جۇمىسىنا قاتىستى الاڭداۋشىلىق ءبىلدىرىپ، 10 مىڭعا جۋىق قىزمەتكەردى قىسقارتىپ، بوساعان قاراجاتتى وڭىرلەردى گازداندىرۋعا باعىتتاۋدى ۇسىندى. بۇل تۋرالى Infohub.kz اقپارات اگەنتتىگى حابارلايدى.

دەپۋتاتتىڭ ايتۋىنشا، كومپانيا جىلىنا شامامەن 350 ميلليون تەكشە مەتر گاز وندىرەدى، ءبىراق ونى ءتيىمدى پايدالانۋدا سۇراقتار تۋىندايدى. سايروۆ بۇل كورسەتكىشتىڭ تيىمسىزدىگىن العا تارتا وتىرىپ، شتاتتى قىسقارتۋ قاجەتتىگىن مالىمدەدى.

گازداندىرۋ ماسەلەسىنىڭ وزەكتىلىگى

«XXI عاسىردا سولتۇستىك قازاقستان، پاۆلودار، اباي جانە شىعىس قازاقستان وبلىستارىنىڭ تۇرعىندارى ءالى كۇنگە دەيىن ۇيلەرىن كومىرمەن، وتىنمەن جىلىتادى. بۇل – ۇيات جاعداي»، – دەدى دەپۋتات.

ول سونداي-اق، ەنەرگەتيكا ۆيسە-مينيسترى قايىرحان تۇتقىشبايەۆتىڭ جاۋابىنا قاناعاتتانباعانىن جەتكىزدى. مينيسترلىك رەسۋرستىق بازانى كەڭەيتۋگە، گەولوگيالىق جۇمىستارعا جانە زاۋىتتار سالۋعا باسىمدىق بەرىپ وتىرعانىمەن، اۋىلدىق جەرلەردى گازداندىرۋ ماسەلەسى ءالى دە وزەكتى بولىپ قالۋدا.

حالىقتىڭ اقشاسى حالىققا جۇمسالۋى ءتيىس

«بوس وتىرعانداردى جۇمىستان شىعارىپ، ولاردىڭ اقشاسىن اۋىلدارعا گاز جۇرگىزۋگە باعىتتاۋ كەرەك. بۇل – حالىقتىڭ اقشاسى، سوندىقتان ءاربىر قادام حالىقتىڭ ءال-اۋقاتىن جاقسارتۋعا باعىتتالۋى ءتيىس»، – دەپ اتاپ ءوتتى ەرلان سايروۆ.

بۇعان دەيىن پرەزيدەنت قاسىم-جومارت توقايەۆ تا «سامۇرىق-قازىنا» قورىنداعى سياقتى ۇلتتىق كومپانيالاردا «ەشنارسە ىستەمەيتىن» قىزمەتكەرلەردىڭ بار ەكەنىن ايتقان بولاتىن.