InfoHub Logo

ماڭعىستاۋ وبلىسىندا بۇعان دەيىن ماماندار نازارىنا ىلىككەن الدىڭعى ازيالىق لەوپاردتىڭ ەركەگى قايتادان كورىندى. بۇل تۋرالى Tengri Travel Lada.kz-كە سىلتەمە جاساپ حابارلايدى.

اڭعاشى رەت 2024 جىلى فوتوتۇزاققا ءىلىنىپ، كەيىننەن التىنكوز ەسىمىن العان بۇل لەوپارد 2026 جىلدىڭ ناۋرىز جانە مامىر ايلارىندا ءۇستىرت قورىقتارى اۋماعىندا بايقالدى.

"2026 جىلدىڭ ءساۋىر ايىندا وسى لەوپاردتى قىزىلساي تابيعي پاركىنىڭ قىزمەتكەرلەرى ۇيالى تەلەفونعا ءتۇسىرىپ العان بولاتىن. وسىلايشا، ناۋرىز بەن مامىر ارالىعىندا التىنكوز قورىقتان قىزىلسايعا دەيىن 450 شاقىرىمنان استام قاشىقتىقتى ءجۇرىپ ءوتىپ، كەرى قايتقان. وتكەن جىلى دا شامامەن وسىنداي باعىتتى باعىندىرعان"، - دەپ حابارلادى بيوالۋانتۇرلىلىكتى زەرتتەۋ جانە ساقتاۋ ورتالىعى.

مامانداردىڭ پىكىرىنشە، لەوپارد انالىق ىزدەپ ۇنەمى الىس جولعا شىعادى. الايدا، بۇل ارەكەتتەرى ازىرگە ناتيجەسىز بولىپ وتىر. سەبەبى، ەركەكتەردەن ايىرماشىلىعى، لەوپارد انالىقتارى مۇنداي قاشىقتىققا ءجۇرۋدى ۇناتپايدى. تۇرىكمەنستاننان ءۇستىرتتىڭ قازاقستاندىق بولىگىنە لەوپارد انالىقتارىنىڭ كىرۋى تۋرالى ناقتى دەرەكتەر ازىرگە جوق، ءبىراق بۇل مۇمكىندىكتى تولىق جوققا شىعارۋعا بولمايدى.

ماڭعىستاۋداعى لەوپاردتىڭ قوزعالىسىن باقىلاۋ ءۇستىرت قورىعى مەن قىزىلساي تابيعي پاركى قىزمەتكەرلەرىنىڭ 2023 جىلى باستالعان حالىقارالىق جوباسى ارقاسىندا مۇمكىن بولدى. بۇل جوبا لەوپاردتى قازاقستاندا زەرتتەۋگە جانە قورعاۋعا باعىتتالعان.

بۇعان دەيىن "قىزىلساي" پاركىنىڭ اڭشى مامانى بۇل لەوپاردتىڭ ماڭعىستاۋ وبلىسىنداعى جالعىز لەوپارد ەكەنىن ايتقان بولاتىن.