InfoHub Logo

مەكتەپ ديرەكتورلارىنىڭ قىزمەتىنە قاتىستى ماڭىزدى وزگەرىستەر ەنگىزىلۋى مۇمكىن. وقۋ-اعارتۋ ءمينيسترى جۇلدىز سۇلەيمەنوۆانىڭ ايتۋىنشا، بۇل لاۋازىم ەندى ءومىر بويى اتقارىلاتىن قىزمەت بولمايدى. مينيستر بۇل جاڭالىقتى 24.kz تەلەارناسىنىڭ "ءتۇيىن" باعدارلاماسىندا جەتكىزدى.

بۇل تۋرالى Infohub.kz اقپارات اگەنتتىگى حابارلايدى.

قازىرگى تاڭدا مەكتەپتەردەگى باسقارۋ جۇيەسىن جاڭارتۋ جۇمىستارى ءجۇرىپ جاتىر. ءمينيستردىڭ پىكىرىنشە، مەكتەپ ديرەكتورى قىزمەتى – بۇرىنعىداي زەينەتكە شىققانشا اتقاراتىن تۇراقتى لاۋازىم ەمەس. "زامان وزگەردى، باسقارۋ تاسىلدەرى دە جاڭاردى. مەكتەپ ديرەكتورلىعى – ءومىر بويى وتىراتىن قىزمەت ەمەس. بۇل لاۋازىمعا ۇمتىلاتىن بىلىكتى، ءبىلىمدى، شىعارماشىل مۇعالىمدەر كوپ. سوندىقتان سول تالانتتى ۇستازداردىڭ اراسىنان مىقتى مەنەدجەرلەر شىعاتىنداي جۇيە قالىپتاستىرۋىمىز كەرەك"، – دەدى جۇلدىز سۇلەيمەنوۆا.

ديرەكتورلاردىڭ قىزمەت مەرزىمىنە شەكتەۋ

الداعى ۋاقىتتا مەكتەپ ديرەكتورلارىنىڭ ءبىر ورىندا ۇزاق ۋاقىت جۇمىس ىستەۋىنە شەكتەۋ قويۋ ماسەلەسى قاراستىرىلۋدا. ۇسىنىلىپ وتىرعان جۇيە بويىنشا، قالا مەكتەپتەرىندە ديرەكتورلار الدىمەن ەكى جىل قىزمەت ەتەدى. ەگەر ولاردىڭ جۇمىسى وڭ باعالانسا، تاعى ەكى جىلعا قىزمەت مەرزىمى ۇزارتىلۋى مۇمكىن. وسىلايشا، ءبىر مەكتەپتە ديرەكتوردىڭ ەڭ ۇزاق جۇمىس ىستەۋ مەرزىمى ءتورت جىل بولادى.

ال اۋىل مەكتەپتەرىندە ديرەكتوردىڭ قىزمەت مەرزىمى التى جىلعا دەيىن سوزىلۋى مۇمكىن. بۇل باستاما ءقازىر ارنايى جۇمىس توبىنىڭ قاراۋىندا.

ءمينيستردىڭ ايتۋىنشا، بۇل جاڭالىقتار بويىنشا ناقتى شەشىم كەلەسى وقۋ جىلى باستالعانعا دەيىن قابىلدانۋى ىقتيمال. بۇعان دەيىن جۇلدىز سۇلەيمەنوۆا مۇعالىمدەردىڭ جاس ەرەكشەلىگىنە قاتىستى ماسەلەلەرگە توقتالعان بولاتىن. ونىڭ سوزىنشە، جاسى ۇلكەن پەداگوگتەر كەيبىر جاعدايدا سيفرلىق تەحنولوگيالاردى مەڭگەرۋدە قيىندىقتارعا تاپ بولادى، بۇل ءبىلىم ساپاسىنا اسەر ەتۋى مۇمكىن.