InfoHub Logo

مونگوليادا تابيعي بايلىقتان تۇسەتىن پايدانىڭ 60%-ىن ازاماتتارعا ۇلەستىرۋ تۋرالى شەشىم قابىلداندى. بۇل ەلدىڭ تاۋ-كەن سالاسىن رەفورمالاۋ اياسىنداعى ماڭىزدى قادام بولىپ، حالىقتىڭ تابيعي رەسۋرستاردان تىكەلەي پايدا كورۋىنە جول اشادى.

بۇل تۋرالى Infohub.kz اقپارات اگەنتتىگى حابارلايدى.

تابيعي رەسۋرستار حالىقتىكى

مونگوليا ۇكىمەتى تاۋ-كەن سەكتورىن قايتا قۇرىلىمداۋ اياسىندا ستراتەگيالىق ماڭىزى بار كەن ورىندارىنان تۇسەتىن پايدانىڭ 60%-ىن ازاماتتارعا ءبولۋ تۋرالى قاۋلىنى ماقۇلدادى. بۇعان دەيىن بۇل كورسەتكىش 34% بولعان ەدى. جاڭا ەرەجە بويىنشا، بۇل قاراجات ۇلتتىق قورعا اۋدارىلىپ، كەيىننەن ءاربىر ازاماتتىڭ جەكە شوتىنا جىبەرىلەدى.

قازاقستانمەن سالىستىرۋ

قازاقستاندا دا 2024 جىلدان باستاپ پايدالى قازبالار، اتاپ ايتقاندا مۇنايدان تۇسەتىن تابىستى ءبولۋ باستالدى. الايدا، بۇل ۇلەستىرۋ تەك 18 جاسقا تولماعان ازاماتتارعا عانا تارالادى جانە مولشەرى دە مونگوليامەن سالىستىرعاندا الدەقايدا از. قازاقستانداعى ۇلەستىرۋ تەك ۇلتتىق قوردىڭ ينۆەستيسيالىق تابىسىنىڭ جارتىسىنان ەسەپتەلەدى، ال مونگولياداعىداي بارلىق تابىستىڭ 60%-ى ەمەس.

التىن جانە باسقا دا رەسۋرستار

مونگوليا تەك كومىر مەن مىس ەمەس، التىن وندىرۋگە دە باسا نازار اۋدارىپ وتىر. «التىن-3» باعدارلاماسى اياسىندا جاڭا كەن ورىندارىن اشۋ جانە جەكە كاسىپكەرلەردى قولداۋ جوسپارلانۋدا. بۇل شارالار ەلدىڭ التىن-ۆاليۋتا رەزەرۆىن نىعايتۋعا جانە ەكونوميكانى ءارتاراپتاندىرۋعا باعىتتالعان.

ەكولوگيالىق جانە باسقارۋ تاۋەكەلدەرى

جاڭا باعدارلامالار مەن كەن ورىندارىن جەدەل يگەرۋ ەكولوگيالىق جانە باسقارۋشىلىق تاۋەكەلدەردى دە تۋدىرۋدا. كەيبىر ايماقتاردا زاڭسىز التىن ءوندىرۋ ورىن الىپ، بۇل ماسەلەلەردى شەشۋ ءۇشىن ءتيىستى شارالار قابىلدانۋدا. پرەزيدەنت بۇل باعىتتاعى كەيبىر شەشىمدەرگە ۆەتو قويىپ، تابيعاتتى قورعاۋعا باسىمدىق بەردى.

بولاشاققا باعدار

مونگوليانىڭ بۇل قادامى تابيعي رەسۋرستاردى تەك كورپوراسيالار مەن شەنەۋنىكتەردىڭ ەمەس، بۇكىل ۇلتتىڭ بايلىعى رەتىندە قاراستىرۋعا باعىتتالعان. ەلدىڭ ماقساتى – شيكىزات ەكونوميكاسىنان يندۋستريالدى مودەلگە كوشۋ، تاۋەلسىزدىكتى نىعايتۋ جانە حالىقتىڭ ءومىر ءسۇرۋ دەڭگەيىن ارتتىرۋ.