InfoHub Logo

ءبىر پاتشانىڭ بالاسى اتتان قۇلاپ، مويىن سۇيەكتەرىن سىندىرىپ الادى. موينى ءپىلدىڭ موينىنا ۇقساپ دەنەسىنە كيلىگىپ قالادى. باسىن بۇرۋ ءۇشىن بۇكىل دەنەسىمەن بىرگە بۇرىلىپ قارايتىن ەدى. ەلىندەگى ەمشىلەردىڭ ءبارى قانشا تىرىسسا دا ونى ەمدەي المايدى. تەك باسقا ەلدەن كەلگەن ءبىر ەمشى عانا موينىن بۇرىنعى قالپىنا كەلتىرىپ، تامىرلارى مەن سۇيەكتەرىن جونگە كەلتىرە الادى. ەگەر بۇل ەمشى بولماعاندا، حانزادا ءومىرىنىڭ سوڭىنا دەيىن مۇگەدەك بولىپ قالار ەدى، بالكىم ءولىپ كەتۋى دە مۇمكىن ەدى. حانزادانىڭ جاعدايى جاقسارعاننان كەيىن، ونى ەمدەگەن ەمشى، حانزادا مەن اكەسىن كورۋگە بارادى. تىم بولماعاندا «راحمەت» دەگەن العىس ءسوز كۇتكەن ەدى. جاقسىلىقتى تۇسىنبەيتىن پاتشا مەن حانزادا وعان ەش كوڭىل بولمەي، قاراماي قويادى.

ەمشى وزىنە كورسەتىلگەن بۇل مامىلەگە قاتتى رەنجىپ، پاتشا مەن بالاسى ۇيالاتىن جەردە، دارىگەردىڭ ءوزى ۇيالىپ باسى سالبىراعان كۇيدە ول جەردەن كەتىپ قالادى. جولدا وز-وزىنە: «ەگەر مەن ونىڭ موينىن ەمدەپ، بۇرىنعى قالپىنا كەلتىرمەگەنىمدە، بۇگىن مەنەن ءجۇزىن بۇرا الماس ەدى» - دەيدى. وسىنداي جاعدايعا تۇسكەن دارىگەر، پاتشا مەن حانزادادان ءوش الۋعا شەشىم قابىلدايدى. وعان ءبىر داندەر جىبەرەدى. جانىنا مىناداي حات جولدايدى: «حانزادا مىنانى ءبىر ىدىسقا سالىپ ورتەسىن. شيپالى جانە دەنساۋلىققا وتە پايدالى نارسە.»

حانزادا ەمشى جىبەرگەن ءداندى ورتەگەنىندە تۇتۇنىنەن تۇشكىرىپ جىبەرەدى. تۇشكىرگەن كەزدە باسى قايتادان قيسايىپ قالادى. پاتشانىڭ بۇيرىعىمەن الگى ەمشىنى ۇزاق ۋاقىت بويى ىزدەگەنىمەن ەش تابا المايدى. ەمشىدەن كەشىرىم سۇراماق بولادى. ءبىراق امال نەشىك... بولار ءىس بولعان ەدى.

---