InfoHub Logo

ايتىسكەر اقىن مۇحامەدجان تازابەك قازاقستاننىڭ تۇڭعىش پرەزيدەنتى نۇرسۇلتان نازاربايەۆقا قاتىستى ءوز ويىن ورتاعا سالدى. ول جۋرناليست جانار بايسەمىزدىڭ YouTube ارناسىنداعى سۇحباتىندا بۇل ماسەلەگە قاتىستى پىكىرىن ءبىلدىردى.

اقىننىڭ ايتۋىنشا، ونىڭ كوزقاراسى جەكە تۇلعالارعا ەمەس، جالپى بيلىك جۇيەسىندەگى قۇندىلىقتارعا باعىتتالعان.

"مەنىڭ كوزقاراسىم جەكە تۇلعالارعا – نازاربايەۆقا، توقايەۆقا نەمەسە باسقا بيلىك باسىنداعىلارعا ەمەس، جالپى بيلىكتىڭ قۇندىلىقتارىنا بايلانىستى"، – دەدى تازابەك.

اقىن "تۇڭعىش پرەزيدەنت" ۇعىمىن وتباسىنداعى تۇڭعىش بالامەن سالىستىردى. ونىڭ پىكىرىنشە، العاشقى پرەزيدەنتكە ەرەكشە وكىلەتتىكتەر بەرىلىپ، بارلىق شەشىم ءبىر ورتالىققا شوعىرلانعان.

مۇحامەدجان تازابەك وتكەن كەزەڭدەگى قاتەلىكتەردى تەك ءبىر ادامنىڭ موينىنا ارتۋ دۇرىس ەمەس ەكەنىن اتاپ ءوتتى. ول نازاربايەۆتىڭ ءوزى دە كادرلىق جانە باسقا دا شەشىمدەردە قاتەلىكتەر بولعانىن مويىنداعانىن ايتتى.

"كەڭەستىك تاپشىلىق داۋىرىنەن كەيىن حالىق مولشىلىققا ۇمتىلدى. بۇل تەك ءبىر ادامنىڭ ارەكەتىنە بايلانىستى ەمەس، بۇكىل قوعامنىڭ تالپىنىسى ەدى. سول كەزدە "مەن" دەگەن ازاماتتار قاراقشىلىققا باردى، ال شەنەۋنىكتەر مەملەكەتتىڭ مۇلكىن وزدەرىنىكى دەپ سانادى"، – دەپ قوستى اقىن.

تازابەكتىڭ سوزىنشە، سول كەزدە شەنەۋنىكتەر مەن ىقپالدى ازاماتتار جەكە مۇددەلەرىن العا قويعان. ول قاتەلىكتەردى تەك ءبىر ادامعا جۇكتەۋدىڭ دۇرىستىعىن جوققا شىعاردى.

"پاتشانىڭ جانىنداعىلار سول ورتا مەن جاعدايدى قالىپتاستىرادى. "تومەن ويلايتىندار ادامداردى تالقىلايدى، ورتاشا ويلايتىندار وقيعالاردى ءسوز ەتەدى، ال جوعارى ويلايتىندار قۇندىلىقتاردى سارالايدى". سوندىقتان مەن بارىنشا قۇندىلىق تۇرعىسىنان ويلاۋعا تىرىسامىن"، – دەپ تۇيىندەدى ءسوزىن مۇحامەدجان تازابەك.

بۇل تۋرالى Infohub.kz اقپارات اگەنتتىگى حابارلايدى.