جارالعان قالاي عاجاپ مىناۋ اسپان،
قاز باۋىر اق تورعىنداي بۇلت باسقان.
جالتىراپ گاۋھار تاستاي كوكتە جۇلدىز
قاراعان مۇڭدىلاردىڭ كوڭىلىن اشقان.

تولقيدى ءشوپ باستارى سوققان جەلدەن،
اي-داعى نۇرىن شاشتى شىعىپ بەلدەن.
جەلمەنەن ەمىس-ەمىس ەستىلەدى،
داۋىسى توبەتتەردىڭ ۇرگەن ەلدەن.

تەپ-تەگىس بۇل ۋاقىتتا ۇيىقتاعان ەل،
بۇل سورلى جاپا-جالعىز استىندا بەل.
كوڭىلگە ءاربىر ءتۇرلى قيال سالىپ،
سۇيەدى بەتىنەن كەپ ويناعان جەل.

قاپالى، مولدىرەگەن كوزدە جاسى،
كوز سالىپ ەلدى بايقار سورلى باسى.
كوزىنە بولار-بولماس كورىنەدى،
بۇگجەڭدەپ قىز اڭدىعان اۋىل جاسى.

ءوڭى جوق، تۇرعانداي-اق جاڭا دەرتتەن،
ايرىلعان مۇنشا نەعىپ سورلى ەتتەن؟
زىعىرمەن قايناپ شىققان كوزدەن جاسى،
بەينە ءبىر مەرۋەرت ەدى اققان بەتتەن.

وسىلاي جالعىزدىقتى دارمەن ەتىپ،
وتىر ەدى ءار ءتۇرلى ويعا كەتىپ.
ىعىنان ءبىر توبەنىڭ كورىنىس بەردى،
ايتىسقان ۋادەسىنە و دا جەتىپ.

بالبىراپ قىزىل گۇلدەي وتىرعان جاس،
كوڭىلىندە وي، تىلەپ اققان كوزىندە جاس.
بۇل ريزا قىلىش ۇستاپ قارسى الۋعا،
جولىمدا تۇزۋلىكتىڭ كەتسە دە باس.

تۇرەگەپ قادام باستى قوڭىر قازداي،
ۇمىتىپ كورگەن بەينەت الا جازداي.
جولىعىپ بۇل مينۋتتە نە ىستەدى:
وقۋشى تۇسەر ءوزى مەن دە جازباي.

---