InfoHub Logo

وتباسى بانكىنىڭ «ناۋرىز» باعدارلاماسى بويىنشا يپوتەكا راسىمدەۋگە نيەتتەنگەن قازاقستاندىقتاردىڭ ءۇمىتى ءۇزىلدى. جەلىدە ازاماتتاردىڭ بانك تالاپتارىنا ساي كەلمەي، باسپانالى بولا الماعاندىقتارىن ايتىپ شاعىمدانۋى جيىلەپ كەتتى. ولاردىڭ ايتۋىنشا، بانك قىزمەتكەرلەرى مەن بروكەرلەر بەرگەن اقپارات شىندىققا جاناسپاي، كۇتكەن ناتيجەگە قول جەتكىزە الماعان.

بۇل تۋرالى Infohub.kz اقپارات اگەنتتىگى حابارلايدى.

كۇتكەندەگى مەن كورگەندەگى ايىرماشىلىق

جەلىدەگى پىكىرلەرگە سۇيەنسەك، كوپتەگەن ازاماتتار وتباسى بانكىنىڭ وتباسىلىق دەپوزيتتەرىنە اقشا سالىپ، التى اي كۇتكەن سوڭ يپوتەكاعا ءوتىنىم بەرمەك بولعان. الايدا، بانك تاراپىنان «جيناعان قارجىڭىز جەتكىلىكسىز» دەگەن جاۋاپ العان. كەيبىر وتباسىلار ءتىپتى 2020 جىلدان بەرى اقشا جيناپ، 7،7 ميلليون تەڭگەدەن استام قاراجاتتى ارنايى دەپوزيتتە ۇستاپ وتىرسا دا، تەك 13 ميلليون تەڭگەلىك پاتەرگە عانا يپوتەكا ۇسىنىلعان.

باعدارلاما باستالعاندا بەرىلگەن ۋادەلەر مەن ءوتىنىم بەرۋ كەزىندەگى تالاپتاردىڭ الشاقتىعى كوپشىلىكتىڭ اشۋىن تۋدىرعان. كەيبىر ازاماتتار امالسىز جيناعان اقشاسىن الىپ، باسقا بانكتەردىڭ «7-20-25» باعدارلاماسىنا جۇگىنۋگە ءماجبۇر بولعان.

«ناۋرىز» يپوتەكاسىنىڭ تالاپتارى قانداي؟

«ناۋرىز» باعدارلاماسى – بۇل مەملەكەتتىك يپوتەكالىق باعدارلاما. ونىڭ شارتتارى بويىنشا، الەۋمەتتىك جاعىنان وسال توپتار ءۇشىن 7%، ال قالعان ازاماتتار ءۇشىن 9% مولشەرلەمەمەن نەسيە بەرىلەدى. باعدارلاماعا قاتىسۋ ءۇشىن سوڭعى بەس جىلدا مەنشىك ءۇيى بولماۋى جانە وتباسى بانكىندە كەمىندە 2 ميلليون تەڭگە جيناق بولۋى ءتيىس.

الايدا، تەك جيناق سوماسى عانا ەمەس، دەپوزيتتەگى اقشانىڭ قانشا ۋاقىت ساقتالعانى دا ماڭىزدى ءرول اتقارادى. باستاپقى جارنا 10-20% ارالىعىندا، ال نەسيە سوماسى ءىرى قالالاردا 36 ميلليون تەڭگەگە، وڭىرلەردە 30 ميلليون تەڭگەگە دەيىن جەتەدى. استانا، الماتى جانە شىمكەنت قالالارىندا تەك جاڭا سالىنعان ۇيلەردى عانا الۋعا بولادى.

نەگە بارلىعى وتە المادى؟

بانك وكىلدەرىنىڭ ايتۋىنشا، «ناۋرىز» باعدارلاماسى بويىنشا ىرىكتەۋ جۇيەسى بالدىق جۇيەمەن جۇرگىزىلەدى. جيناق سوماسى مەن دەپوزيتتەگى سىياقى مولشەرى نەعۇرلىم كوپ بولسا، ءوتىنىمنىڭ قابىلدانۋ مۇمكىندىگى سوعۇرلىم جوعارى بولادى. وسى جۇيە بويىنشا 26 مىڭنان استام ءوتىنىمنىڭ شامامەن 16 مىڭى عانا ماقۇلدانعان.

كوبىنەسە ءۇيى جوق، تۇراقتى تابىسى بار جاس وتباسىلار باسىمدىققا يە بولعان. ولاردىڭ ورتاشا جاسى – 32، ال جيناعى – 4،3 ميلليون تەڭگە شاماسىندا. نەكەدە بولۋ، بالالاردىڭ بولۋى، 35 جاسقا دەيىنگى جاس جانە الەۋمەتتىك مارتەبە سياقتى قوسىمشا فاكتورلار دا بالل جيناۋعا كومەكتەسكەن.