InfoHub Logo

قازاقستاننىڭ حالىق ءارتىسى، قازاق ءان ونەرىنىڭ دارا تۇلعاسى نۇرعالي ءنۇسىپجانوۆ الەۋمەتتىك جەلىدەگى پاراقشاسىندا جان تەبىرەنتەرلىك جازبا جاريالادى. اڭىز ءانشى بۇل جولى جارى، تانىمال جۋرناليست جادىرا سەيدەشكەگە دەگەن شىنايى سەزىمى مەن تەرەڭ قۇرمەتىن ءبىلدىردى.

بۇل تۋرالى Infohub.kz اقپارات اگەنتتىگى حابارلايدى.

ءومىردىڭ تالايىنا كۋا بولعان جان سەرىگى

نۇرعالي ءنۇسىپجانوۆ ءوزىنىڭ ومىرلىك جولىنداعى قيىندىقتار مەن قۋانىشتاردى باستان كەشكەنىن ايتىپ، جارىنىڭ وعان قانشالىقتى سۇيەنىش بولعانىن جەتكىزدى. ءانشىنىڭ سوزىنشە، جاس ۇلعايعان شاقتا تايعاق عۇمىردىڭ تارام جولىندا سۇيەنىش بولار سەرىك بولماسا، الداعى ءومىرىنىڭ قالاي ءورىس الار ەدى دەپ ويلاۋعا دا قورقادى ەكەن.

«اتا-اناڭنىڭ ءارۋاقتارىنىڭ الدىندا اق باسىمدى ءيدىم، التىنىم! جاس ۇلعايعان شاقتا تايعاق عۇمىردىڭ تارام جولىندا سۇيەنىش بولار سەرىك كەزدەسپەسە، ونەرمەن ءورىلىپ كەلە جاتقان الداعى ءومىرىم قالاي ءورىس الار ەدى؟ ول جايلى ويلاۋعا دا قورقام… جاسىرىپ، جابا توقىپ قايتەيىن، تاعدىر تالايىما سىزىلعان ماڭدايداعى جازۋدىڭ ىستىق-سۋىعىن ءبىر ادامداي كوردىم. كۇيگەنىم دە، كۇيىنگەنىم دە راس، توڭىپ-جاۋراعانىم دا وزگەدەن گورى وزىمە ءمالىم… سوقتىقپالى، سوقپاقتى عۇمىر دارياسىنىڭ بەدەر-بەلەسى دە از بولعان جوق… بۇرالاڭ-بۇلتاعى كوپ جالعان دۇنيەنىڭ قيىنى مەن قىزىعىن دا قاتار كوردىم… اۋرۋدىڭ ازابىن ارقالاتقان جىلدارى جالعىزدىقپەن بەتپە-بەت جۇزدەستىم… سىنالدىم، ءبىراق سىنبادىم، قۇلاسام دا مۇقالمادىم»، – دەپ جازدى اڭىز ءانشى.

زيالى قاۋىمنىڭ باعاسى

نۇرعالي ءنۇسىپجانوۆ جادىرا سەيدەشكەگە كاسىبي جۋرناليست رەتىندە دە جوعارى باعا بەرەتىنىن اتاپ ءوتتى. ونىڭ ايتۋىنشا، زيالى قاۋىم وكىلدەرى جادىرانى «دارا دارىن يەسى، تۋا ءبىتتى تالانت» دەپ تانىعان.

«باسىما سىندارلى ءسات تۋعاندا اللا تاعالا ماعان ءسوز ونەرىن سەرىك ەتكەن اياۋلى ارۋدى سىيلادى… قاي ونەردىڭ دە تىرەگى – اسقاق ادامگەرشىلىك قوي… كاسىبي جۋرناليست رەتىندە جادىرانى باعالاعان جالعىز قازاق مەن ەمەسپىن. ماڭدايالدى مارقاسقالارىمىزدىڭ اق باتاسىن ارقالاپ، اعا-اپالارىنىڭ العىسىنا جاستايىنان بولەنگەن جادىراعا «دارا دارىن يەسى، تۋا ءبىتتى تالانت» دەپ باعا بەرگەن دە سول زيالى قاۋىم وكىلدەرى… تالعات بيگەلدينوۆ، شەر اعاڭ، قادىر، تۇمانباي، فاريزاداي ازۋلى اقىندار مەن ءابىش كەكىلباي، گەرولد بەلگەر، ءاسانالى ءاشىموۆ سىندى اڭىز ادامداردىڭ ءبىر جاپىراق جادىرانى توبەلەرىنە كوتەرگەنىن كوزىممەن كوردىم جانە مىڭ سان مارتە ىشىمنەن: «شۇكىر، ءتاۋبا!» – دەدىم»، – دەپ تولعانىسىن ءبىلدىردى ءانشى.

جۇرەكجاردى تىلەك

ءانشى ءوزىنىڭ سۇيىكتى جارىنا تۋعان كۇنىمەن جانە ارۋلار مەرەكەسىمەن قۇتتىقتاۋعا قۇقىلى ەكەنىن ايتىپ، وعان دەگەن سۇيىسپەنشىلىگىن جەتكىزدى.

«اسىلدىڭ سىنىعى، تەكتىنىڭ تۇياعىسىڭ عوي، التىنىم. اناڭ اجال ساپارىنا اتتانعالى جانارىڭا مۇڭ ۇيالاپ، جانىڭدى قايعىنىڭ قاسىرەت تابى جارالادى. تۇنجىراعان ءجۇزىڭ، كۇلۋدەن قالعان كوزىڭ – جۇرەگىمدى قانجارداي ءتىلىپ بارادى… سەنىڭ مەن ءۇشىن جاساپ جۇرگەن كول-كوسىر ەڭبەگىڭدى قازاق رۋحانياتىنا كورسەتكەن قۇرمەت-قوشەمەتىڭ دەپ بىلەم. اللادان سۇرارىم – الدىمدا امان ءجۇرشى، جارىعىم… سەنىڭ تابانىڭا كىرگەن تىكەن مەنىڭ ماڭدايىما كىرسىن، جارالى جانىما جالاۋ بولعان ءبىر جاپىراعىم…»، – دەپ جازباسىن اياقتادى نۇرعالي ءنۇسىپجانوۆ.