InfoHub Logo

ادام ءومىرىنىڭ قانشالىقتى قىمبات ەكەنىن، ءاربىر ءساتتىڭ ءقادىرىن ءبىلۋ كەرەكتىگىن ەسكە سالاتىن وقيعا جاريالاندى. تانىمال قازاقستاندىق بلوگەر داۋلەت بەيسەنبەكتىڭ جۇبايى زاميرا بەيسەنبەك جول اپاتىنان قايتىس بولعان وتاعاسى تۋرالى جۇرەككە تيەر جازبا قالدىردى.

بۇل تۋرالى Infohub.kz اقپارات اگەنتتىگى حابارلايدى.

ءومىردىڭ ءمانى مەن ءولىمنىڭ قاپىدا كەلۋى

جاس وتباسى ءۇشىنشى ءسابيىن كۇتىپ وتىرعاندا، داۋلەت بەيسەنبەك ومىردەن وزدى. ءقازىر زاميرا بەيسەنبەك بالالارىن جالعىز تاربيەلەپ وتىر. ول ءوزىنىڭ جازباسىندا ءومىر مەن ءولىمنىڭ اراسى نەبارى ءبىر تىنىس ەكەنىن اتاپ ءوتتى.

«ادام ومىرىندەگى ەڭ قورقىنىشتى نارسە نە ەكەنىن بىلەسىز بە؟ قاراپايىم كۇننىڭ اياقتالماي قالۋى… ءومىر مەن ءولىمنىڭ اراسى — ءبىر عانا تىنىس. مەنىڭ ومىرىمدەگى ەڭ قيىن ءسات — 2022 جىلدىڭ 27 ناۋرىزى، ساعات 11:38. سول كۇننەن بەرى ءار تاڭ سايىن وزىمە ءبىر سۇراق قويامىن: “ەگەر بۇگىن سوڭعى كۇنىم بولسا شە؟ كىمدى قۇشاقتامادىم؟ نە ايتىپ ۇلگەرمەدىم؟ قانداي ءىستى كەيىنگە قالدىردىم؟” ويتكەنى ءولىم ەسكەرتپەيدى. ول جاي عانا قاراپايىم كۇننىڭ، قاراپايىم جوسپارلاردىڭ ورتاسىندا كەلەدى»، — دەپ جازدى زاميرا بەيسەنبەك.

ءار ءساتتى باعالاۋعا شاقىردى

مارقۇمنىڭ جۇبايى ءومىردى كەيىنگە قالدىرۋ ءۇشىن ەمەس، باعالاۋ ءۇشىن بەرىلگەنىن ايتىپ، وقىرمانداردى ءاربىر كۇندى وكىنىشپەن ەمەس، شۇكىرشىلىكپەن وتكىزۋگە شاقىردى.

«ءومىر — كەيىنگە قالدىرۋ ءۇشىن ەمەس، باعالاۋ ءۇشىن بەرىلگەن. بۇگىن بىرەۋدىڭ كوڭىلىن قالدىرماۋعا، بىرەۋدى قۋانتۋعا، جاقسى كورەتىنىڭدى ايتۋعا ءالى دە ۋاقىت بار. ءبىر ساتتىك ءومىردى وكىنىشپەن ەمەس، شۇكىرشىلىكپەن وتكىزەيىك»، — دەپ تۇيىندەدى زاميرا بەيسەنبەك.