وقۋداعى بالالاردىڭ ۇيىنە جازعان حاتتارى
ا
قامقور، دۋاگوي اتام مەن اجە، سىزدەرگە ىقلاستى سالەمدەرىمدى جولداپ قالامىن. ءوزىم سىزدەردىڭ وڭ باتالارىڭىزدىڭ ارقاسىندا ساۋ-سالامات بارمىن. وتكەن پوچتادان جىبەرگەن سالەم حاتىڭىزدى، ازىن-اۋلاق اقشاسىمەن، جولىعىپ الدىم. اللا رازى بولسىن، مەندەي ناشار بالاڭىزدى ەستەن شىعارماي تۇرعانىڭىزعا. ىقىلاسىممەن قۇداي-تاعالادان تىلەيمىن: سىزدەردىڭ ەڭبەك قامقورشىلىعىڭىزدى بىزگە دە قىزمەتىمىزبەن وتەۋگە جازعاي ەدى دەپ. وقىعان وقۋىمىز تۋراسىندا بۇل كۇندە ۇستازدارىمىز سونشا رازى. جاڭادا ەڭ جاقسى وقىعان بالالاردىڭ ەسەبىنە قوسىپ، كەنەگەسىنە جازىپ قويدى. اتا، ءسىز ءارقاشان اقىل ايتۋشى ەدىڭىز: «بالام الاڭ بولماي ۇستازدارىڭنىڭ ايتقانىن ورنىنا كەلتىرىپ، بەرگەن ساباقتارىن تولىق ۇيرەنىپ، بىلۋگە تىرىس» دەپ، مەن ول سوزدەرىڭىزدى ۇمىتقانىم جوق...
ءسىز جازاسىز، اتا، قاسەنگە قوراسان4 شىقتى دەپ. امان جازىلىپ كەتكەنىنە قاتتى قۋاندىم. بىزگە ۇستازدارىمىز ايتادى: قوراساندى ەگىپ شىعارعان بالاعا قايتا قوراسان شىقپايدى، شىعا قالسا، قاتەرسىز، جەڭىل شىعادى، — دەپ. وسى ءسوزدى ءجونى كەلسە ەسكەرىپ، جاقىن جەردەگى لەكارلەرگە5 كىشكەنتاي ىنىلەرىمدى اپارىپ، شەشەك ەكتىرگەن قالاي بولادى ەكەن؟
قوش، داۋالارىڭىزدان ۇمىتكەر بالاڭىز ن.
ب
اعامىز ىبىرايعا كوپ سالەمدەرىمدى جولدادىم. وزىڭنەن كوپتەن ەشبىر حات-حابار بولمادى. تەك اۋرۋ سىرقاۋعا دۋشار بولماساڭ بولادى-داعى، شارۋاشىلىق جۇمىستان دا قولىڭ تيمەيتىن شىعار. سويتسە دە، ۋاقىت تاۋىپ، ەسەندىگىڭدى بىلدىرگەيسىڭ. ءوزىم دەنىم ساۋ، ۇستازدارىمىزدىڭ ءتاۋىر نازارىڭدامىن. بىر-ەكى ايدان سوڭ ەكىنشى كلاسقا شىعارمىن دەگەن ءۇمىتىم بار.
وسى حاتتى تاپسىرۋشىدان قاديشاعا ەكى قاداقتاي كونفەت جىبەردىم، سەن الىپ وزىنە تاپسىرا كور. اكەمە باس قۇلدىعىمدى ايتىپ جانە مەنەن ءوتىن، ماعان بەرگەن اقشاسىن بوسقا شىعاردى دەپ ۇرىسپاسىن. قاديشا كىشكەنە بالا عوي، اعام جىبەرىپتى دەپ، قۋانىپ قالسىن دەدىم.
قوش، اعا، ساۋ بول. حات جاز دەگەنىمدى ۇمىتپا دەپ، — ەسەندىگىڭدى قۇدايدان تىلەپ جازۋشى ءىنىڭىز ن.
ۆ
مىنەكەي، دوستىم مۇراتباي، مەن ەكىنشى كلاسقا شىعىپ، ەندى بىر-ەكى جۇمادان سوڭ ەلگە دە قايتۋعا تۇرمىن. ەندى كوپ ۇزاماي-اق سەندەردى كورسەم كەرەك. وسى كۇندە - اق كوزىمە ەلەستەپ تۇر، اۋىل كوكوراي شالعىندارعا قونىپ، جان-جاقتىڭ ءبارى جەلكىلدەگەن كوك ءشوپ ىشىندە جىڭىلداعان مالدىڭ جۇرگەندەرى. كوپ جازۋعا ۋاقىت جوق قۇربى – قۇرداستارىما سالەم، اعاما ايت: مەنىڭ كۇرەڭ دونەنىمدى كىسىگە مىنگىزبەي، سەمىز ساقتاسىن، بارعان سوڭ ءوزىم جاراتىپ جايلارمىن. دوستىڭ ن.
گ
اعامىز ىبىرايعا سالەم. سەن بەكەر ءقاۋىپ ەتەسىڭ، مەنىڭ ازىراق اۋىرعانىمنان؛ سەنى كورىپ اجەمدەردە ۇرەي قالماعان-دى. اۋىرعانىم سەبەبى، قىستىڭ كۇنى اۋىلى جاقىن جەردەگى ءبىر ەپتەشىمنىڭ6 ۇيىنە قوناققا بارىپ ەدىم. اعاش ءۇي جوق ەكەن، كيىز ۇيدە پاتشالىق جەڭىل كيىممەن جاتىپ - تۇرىپ جۇرگەندە بويىمدى سۋىق ۇستادى. سونان ازىراق باسىم اۋىرعان سوڭ، قايتىپ دارىگەرگە ايتتىم. دارىگەر ءدارى بەرىپ، ەندى جازىلىپ كەلەمىن. اي، اعا، اكەمە ايتىپ، جىلى اعاش ءۇي سالىپ الساڭىزشى. كيىز ءۇي جازدىڭ كۇنى قانشا جاقسى بولسا، قىستىڭ كۇنى سونشا جامان عوي. سۋىق كيىز ۇيدە قىس كۇنى ءبۇرىسىپ، الدىڭ وتقا جىلىنسا، ارقاڭ توڭىپ وتىرىپ، نە تازا جۋىنۋعا بولمايدى، نە تازا تاماق جەۋگە بولمايدى. وسىنداعى وقىمىستى دارىگەرلەر ايتادى: قازاقتىڭ دەرتىنىڭ كوبىسى— نە بويىن سۋىققا الدىرعاننان، نە تازالىق جوقتىقتان پايدا بولادى، — دەيدى. — قوتىر، بورتكەن — تازا بولماعاننان، سۇزەك، شانشۋ، جوتەل — ءبورى دە سۋىقتان، — دەيدى. ەرىككەن سوڭ ويىما كەلگەنىن جازىپ، ەرمەك ەتىپ جاتىرمىن. كوپ مىلجىڭدادى دەپ ايىپقا بۇيىرما جانە مەنىڭ ءۇشىن كەلەمىن دەپ ازاپتانبا. اكەم كارى كىسى، شارۋاشىلىق جۇمىسىڭنان قالارسىڭ. ءىنىڭ ن.
You Might Also Like
