InfoHub Logo

ورال قالاسىندا ءۋالي ەلامانوۆ اتىنداعى جاس دەسانتشىلار اسكەري-پاتريوتتىق كلۋبى اشىلدى. بۇل باستامانى اۋعان سوعىسىنىڭ ارداگەرلەرى قولداپ، جەرگىلىكتى بيلىك پەن اسكەري-تەحنيكالىق مەكتەپتىڭ قولداۋىمەن جۇزەگە استى.

بۇل تۋرالى Infohub.kz اقپارات اگەنتتىگى حابارلايدى.

جاس ساربازدار وتانعا انت بەردى

كلۋبتا قازىرگى تاڭدا 14-16 جاس ارالىعىنداعى 28 ءجاسوسپىرىم تاربيەلەنۋدە. ولار اسكەري پاندەردى، قولدانبالى جاۋىنگەرلىك دايىندىقتى، جەكپە-جەك ونەرىنىڭ نەگىزدەرىن جانە پاراشيۋت سپورتىنىڭ قىر-سىرىن مەڭگەرۋدە. تاربيەشىلەر وقۋ پروسەسىنىڭ قىزىقتى ءارى تارتىمدى بولۋىنا ەرەكشە ءمان بەرەدى.

تەگىن ءبىلىم جانە پاتريوتتىق تاربيە

مارلەن يمانعالييەۆ، اۋعان سوعىسى ارداگەرلەرى وداعىنىڭ ءتوراعاسى: «بالالار تەگىن ءبىلىم الادى. ولار اپتaنىڭ سەيسەنبى، سارسەنبى، بەيسەنبى كۇندەرى ەكى ساعاتتان، ياعني ساعات 16:00-دەن 18:00-گە دەيىن دايىندالادى. ءبىز ەشكىمگە كەدەرگى كەلتىرمەيمىز. ولار ءوز ساباقتارىن وقىپ، قوسىمشا كونكۋرستارعا قاتىسا الادى. بوس ۋاقىتتارىندا ءبىزدىڭ شارالارعا دا اتسالىسادى».

كلۋبتىڭ باعدارلاماسىنا پاتريوتتىق تاربيە جۇمىستارى دا كىرەدى. جاسوسپىرىمدەر تاريحتى زەردەلەپ، بەلگىلى وفيسەرلەردىڭ ومىربايانىمەن تانىسادى. كلۋبقا باتىس قازاقستان وبلىسىنىڭ تۋماسى، قازاقستان قارۋلى كۇشتەرىنىڭ قالىپتاسۋىنا ەلەۋلى ۇلەس قوسقان دەسانتشى، گەنەرال-مايور ءۋالي ەلامانوۆتىڭ ەسىمى بەرىلدى. بۇل – بەلگىلى جەرلەسىمىزگە دەگەن قۇرمەت پەن ولكە تاريحىنا دەگەن تاعزىم.

ۇرپاقتار ساباقتاستىعى – بولاشاقتىڭ كەپىلى

ءۋالي ەلامانوۆتىڭ ۇلى قايرات ەلامانوۆ: «بۇل كلۋبتىڭ جاس ۇرپاقتى دايىنداپ جاتقانىنا، دەسانتشى رۋحىن، ءپاتريوتيزمدى، وتانعا دەگەن سۇيىسپەنشىلىكتى ءسىڭىرىپ جاتقانىنا وتە ريزامىز. بۇل – اكەم ۇستانعان ومىرلىك قاعيداتتار بولاتىن. سوندىقتان بۇگىنگى كۇن ءبىز ءۇشىن ۇلكەن مەرەكە»،- دەپ قۋانىشىن جەتكىزدى.

جاسوسپىرىمدەرمەن جۇمىس ىستەۋ ارقىلى ارمياعا دەگەن سەنىم قالىپتاسادى. ۇيىمداستىرۋشىلاردىڭ پىكىرىنشە، ۇرپاقتار ساباقتاستىعى ارقىلى ەلىمىزدىڭ باتىرلىققا تولى وتكەنىنە لايىقتى بولاشاعىمىز قالىپتاسادى.