InfoHub Logo

ءال-فارابي اتىنداعى قازاق ۇلتتىق ۋنيۆەرسيتەتىندە تۇڭعىش رەت قازاق-اعىلشىن، اعىلشىن-قازاق تىلىنە اۋدارىلعان Oxford Qazaq Dictionary سوزدىگىنىڭ تانىستىرىلىمى ءوتتى.

جيىنعا ق ر عىلىم جانە جوعارى ءبىلىم ۆيسە-مينيسترى دارحان احمەد-زاكي، احمەت بايتۇرسىنوۆ اتىنداعى ءتىل ءبىلىمى ينستيتۋتىنىڭ ديرەكتورى انار فازىلجان، Freedom Holding Corp. نەگىزىن قالاۋشى تيمۋر تۋرلوۆ، حالىقارالىق «قازاق ءتىلى» قوعامىنىڭ پرەزيدەنتى راۋان كەنجەحان ۇلى قاتىستى.

60 مىڭ ءسوزدى قامتىعان، جالپى كولەمى 1300 بەتتىك قازاقشا-اعىلشىنشا جانە اعىلشىنشا-قازاقشا OXFORD سوزدىگىنىڭ تۇڭعىش باسىلىمىن قازاقستان پرەزيدەنتى قاسىم-جومارت توقايەۆتىڭ تاپسىرماسىمەن حالىقارالىق «قازاق ءتىلى» قوعامى دايىندادى.

الەمگە تانىمال Oxford University Press باسپاسى ەكىتىلدى Oxford Qazaq Dictionary سوزدىگىن شىعارۋعا رەسمي رۇقساتىن بەردى. سوزدىكتى جەتىلدىرۋگە احمەت بايتۇرسىن ۇلى اتىنداعى ءتىل ءبىلىمى ينستيتۋتىنىڭ ماماندارى قاتىسىپ، سوزدىك ينستيتۋت عىلىمي كەڭەسىنىڭ ساراپتاماسىنان ءوتتى. سوزدىكتى ازىرلەۋدە دۇنيە جۇزىنە تانىمال Oxford English Dictionary سوزدىگىن قۇراستىرۋ ادىستەمەسى مەن تەحنولوگياسى نەگىزگە الىندى. سوزدىك قۇراستىرۋ جۇمىسى ءتورت جىل ۇزدىكسىز ءجۇرىپ، وعان قازاق جانە اعىلشىن ءتىلىنىڭ لەكسيكاسىنا ماماندانعان 50-دەن اسا تاجىريبەلى ءتىلشى اتسالىستى. سوزدىك قۇراستىرۋ اياسىندا قازاق جانە اعىلشىن ءتىلى لەكسيكاسىنداعى وزگەرىستەر، اسىرەسە، قازىرگى مادەنيەت، اقپاراتتىق تەحنولوگيالار، مەديسينا، ەكونوميكا، قارجى مەن ساۋدا سالاسىنداعى جاڭالىقتار ەسكەرىلدى. سونداي-اق سوزدىكتە اعىلشىن جانە قازاق تىلدەرىنىڭ گرامماتيكاسى مەن دىبىستاۋ، ەملە ەرەجەلەرى تۇسىندىرىلەتىن قىسقاشا نۇسقاۋلىقتار، قازاق تىلىندەگى ىسكەرلىك جانە ەلەكتروندى حات-حابار جازۋ ۇلگىلەرى بەرىلدى.

سونىمەن بىرگە، وسى سوزدىك نەگىزىندە قازاق ءتىلى Oxford Global Languages پلاتفورماسىنا قوسىلادى. بۇل باستامانىڭ ماقساتى – الەمنىڭ ءىرى دە، ىرگەلى 100 ءتىلىنىڭ لەكسيكالىق قورىن ءوزارا بايلانىستىرىپ، ورتاق عالامدىق ءتىل كورپۋسىن جاساقتاۋ. Oxford Qazaq Dictionary قازاق ءتىلىن الەمدەگى ەڭ تانىمال ءارى ەڭ بەدەلدى سوزدىكتەر جەلىسىمەن بايلانىستىرىپ، عالامدىق لينگۆيستيكالىق ورتاعا قوسىلۋعا مۇمكىندىك بەرەدى.

سوزدىك Freedom Holding Corp. قولداۋىمەن 10 000 دانا تارالىممەن باسىلدى. Freedom Holding Corp. – ەنشىلىس Freedom كومپانياسى ارقىلى قارجى قىزمەتتەرى، بروكەرلىك وپەراسيالار، ينۆەستيسيا بويىنشا كەڭەس بەرۋ، باعالى قاعازدار ساۋداسى، ينۆەستيسيالىق-بانكتىك جانە اندەررايتينگتىك قىزمەتتەردى جۇزەگە اسىراتىن حولدينگ. قازىرگى تاڭدا حولدينگ اكسيالارى Nasdaq Capital Market، KASE نارىعىندا ساتىلادى. حولدينگ نەگىزىن قالاۋشى – تيمۋر تۋرلوۆ. قازاقستاندىق كاسىپكەر، قارجىگەر. بۇۇ-نىڭ جاھاندىق كەلىسىم-شارتقا قول قويۋشىسى رەتىندە ESG كۇن ءتارتىبى مەن بۇۇ تۇراقتى دامۋ ماقساتتارىنا «Freedom شاپاعات» قورى ارقىلى قولداۋ كورسەتىلىپ كەلەدى. Oxford Qazaq Dictionary جوباسى بۇۇ تۇراقتى دامۋ ماقساتتارىنا بىرنەشە باعىتتا – جالپىعا بىردەي جانە تەڭ ساپالى ءبىلىم، مادەني مۇرانى ساقتاۋ جانە وزگە دە تالاپتارىنا ساي كەلەدى.

سوزدىك كەڭ كولەمدە ەلىمىزدىڭ وقۋ ورىندارىنىڭ كىتاپحانالارىنا تاراتىلادى. جەلتوقسان ايىنىڭ سوڭىندا كىتاپ دۇكەندەرىندە ساتىلىمعا شىعادى.

ايتا كەتەيىك، «حالىقارالىق «قازاق ءتىلى» قوعامى» قب 1989 جىلى 22 قىركۇيەكتە قۇرىلعان. ول قازاق ءتىلىن دامىتۋعا ىنتالى ءتىل جاناشىرلارىن بىرىكتىرەتىن قازاقستانداعى ەڭ ءىرى قوعامدىق ۇيىم. قازاق ءتىلىنىڭ مەملەكەتتىك ءتىل رەتىندەگى قولدانىس اياسىن كەڭەيتۋ، بەدەلىن ارتتىرۋ، قازاق مادەنيەتى مەن ۇلتتىق قۇندىلىقتارىن ناسيحاتتاۋ، ءتىلدى قولدانۋ مەن ونى ۇيرەتۋدە جاڭا تەحنولوگيالىق ادىستەردى پايدالانۋ باعىتتارىندا قىزمەت اتقارادى.

---