InfoHub Logo

پرەزيدەنت شاۆكات ميرزيويەۆ ءوزىنىڭ ۇلكەن قىزى سايدا ميرزيويەۆانى پرەزيدەنت اكىمشىلىگىنىڭ باسشىسى ەتىپ تاعايىندادى، دەپ حابارلايدى ينفوحاب. بۇل لاۋازىم 2023 جىلى تاراتىلعانىمەن، ەندى قايتا قالپىنا كەلتىرىلدى – جانە تىكەلەي پرەزيدەنت قىزىنا سەنىپ تاپسىرىلدى.

سوڭعى ەكى جىلدا سايدا ميرزيويەۆا پرەزيدەنتتىڭ كومەكشىسى رەتىندە جوعارى ساياسي ساحنادا بەلسەندى كورىندى. ول حالىقارالىق قاتىناستاردا ەلدىڭ “بەيرەسمي وكىلىنە” اينالدى: شەتەلدىك كوشباسشىلارمەن كەزدەسىپ، رەفورمالار جايلى مالىمدەمەلەر جاساپ ءجۇردى. بۇل بەلسەندىلىك ونىڭ بيلىكتەگى ىقپالى رەسمي لاۋازىمىنان الدەقايدا جوعارى ەكەنىن كورسەتتى.

ساياسي شولۋشىلار مۇنى بيلىكتىڭ اشىق “اۋلەتتەنۋى” دەپ باعالاپ وتىر. سايدانىڭ رەسمي تاعايىندالۋى – تەك كادرلىق ەمەس، ساياسي-يدەولوگيالىق قادام. بۇل وزبەكستاندا پوستكەڭەستىك كەڭىستىكتە ءجيى بايقالاتىن ءبىر ءۇردىستى: بيلىكتىڭ وتباسىلىق باسقارۋ فورماتىنا اۋىسۋىن ايقىنداي ءتۇستى.

مۇنداي شەشىمدەر “رەفورمالار جۇرگىزىپ جاتىرمىز” دەگەن بيلىكتىڭ ءسوزىن كۇماندى ەتەدى. سەبەبى، رەفورمانىڭ باستى شارتى – ينستيتۋتتاردىڭ تاۋەلسىزدىگى مەن كادرلىق ادىلدىك. ال تۋىستىققا نەگىزدەلگەن تاعايىنداۋلار بۇل ۇستانىمعا مۇلدە قايشى.

وزبەكستانداعى بۇل ساياسي قادام ايماقتاعى وزگە ەلدەرگە دە “ۇلگى” بولا ما، جوق پا؟ الدە بۇل جەكە دارا وقيعا رەتىندە قالا ما؟ ءبىر نارسە انىق – سايدا ميرزيويەۆانىڭ جاڭا قىزمەتى تەك ىشكى ەمەس، حالىقارالىق دەڭگەيدە دە ۇلكەن رەزونانس تۋدىرىپ وتىر.