پاۆلودار وبلىسىندا مەكتەپ ءمۇعالىمى بالالارعا اسىق وينايتىن ۇستەل جاساپ بەردى
پاۆلودار وبلىسى كاچير اۋدانى تروفيموۆكا ورتا مەكتەبىندە ەلىمىزدەگى اسىق وينايتىن العاشقى ۇستەل جاسالدى، دەپ حابارلايدى pavlodarnews.kz ءتىلشىسى.
يدەيا اۆتورى بەرىك ءابدىراحمانوۆتىڭ ايتۋىنشا، ۇستەلدىڭ ديامەترى ءبىر مەتردى قۇرايدى.
- مەكتەبىمىزدە توعىزقۇمالاق ۇيىرمەسى بار، وندا توعىزقۇمالاقتان باسقا دويبى، شاحمات جانە اسىق ويىندارى ۇيرەتىلەدى. ءار ويىننىڭ ارنايى ۇستەلى بار، ال اسىق وينايتىن جيھاز جوق. سوندىقتان ارنايى ۇستەلدى جاساۋعا بەل بۋدىم، - دەيدى ب. ءابدىراحمانوۆ.
تروفيموۆكا ورتا مەكتەبىندە قازاق ءتىلى مەن ادەبيەت ءپانىنىڭ ءمۇعالىمى بولىپ ەڭبەك ەتەتىن بەرىك ءابدىراحمانوۆتىڭ ايتۋىنشا، بۇل - اسىق وينايتىن ۇستەلدىڭ ءۇشىنشى ءتۇرى.
ء-بىرىنشى ءتۇرى ءتورت بۇرىشتى بولعان ەدى، كەيىن ونى سەگىزبۇرىشتى ەتىپ جاسادىم. الايدا شەڭبەرلىسى ەڭ ىڭعايلىسى دەگەن تۇجىرىمعا كەلدىم. الداعى ۋاقىتتا مۇنى دا تۇرلەندىرۋدى ويلاپ وتىرمىن. سەبەبى ۇتىپ العان اسىقتاردى ورنالاستىراتىن ارنايى جەرلەر جوق. ۇستەل حانتالاپاي ويىنىنا ارنالعان، - دەپ اتاپ ءوتتى اۆتور.
37 جاسار شەبەر كەلەشەكتە قازاقتىڭ ۇلتتىق ويىنى ساقانى ۇيىرمەگە ەنگىزۋدى جوسپارلاۋدا. ايتۋىنشا، دالادا وتكىزىلەتىن ويىنعا ارنايى ورىن دا بەلگىلەنىپ قويعان.
You Might Also Like
-
فرانسيا نەشە ءتۇرلى تاريحي سارايلارعا باي ەل. ءبىراق فەردينان شيەۆالدىڭ "ءمىنسىز سارايىنىڭ" ورنى ەرەكشە. فەردينان شيەۆال 19 عاسىردىڭ اياعىندا ءومىر سۇرگەن قاراپايىم پوشتاشى (حات تاسۋشى). ول ح...
