InfoHub Logo

پاۆلودار وبلىسىنا قاراستى مايقايىڭ كەنتىندەگى جەكە تۇرعىن ۇيدەن ەكى ادامنىڭ شىرىگەن ءمايىتى تابىلىپ، جايت بويىنشا قىلمىستىق ءىس قوزعالدى.

بۇل تۋرالى Infohub.kz اقپارات اگەنتتىگى حابارلايدى.

الدىن الا دەرەكتەرگە سۇيەنسەك، ءۇي ىشىندەگى ءبىر مۇردەگە ەكى جىلدان استام ۋاقىت بولسا، ەكىنشىسى شامامەن بەس-التى اي بۇرىن كوز جۇمعان.

تراگەديانىڭ سەبەبى نەدە؟

وقيعا ورنىنان الىنعان اقپاراتتارعا قاراعاندا، 36 جاستاعى ايەل قاتەرلى ىسىكتەن قايتىس بولعان. الايدا، مارقۇمنىڭ اناسى بۇل جايتتى ءتيىستى ورگاندارعا حابارلاماي، قىزىنىڭ ءمايىتىن ۇيدە ساقتاپ وتىرعان. كەيىننەن ايەلدىڭ كۇيەۋى دە قايتىس بولىپ، ونىڭ دەنەسى دە سول ۇيدە قالىپ قويعان.

«قىلمىستىق ءىس قوزعالدى. قازىرگى ۋاقىتتا بولعان وقيعانىڭ بارلىق ءمان-جايلارىن وبەكتيۆتى تۇردە انىقتاۋعا باعىتتالعان قاجەتتى تەرگەۋ ارەكەتتەرى جۇرگىزىلۋدە»، – دەدى وبلىستىق پوليسيا دەپارتامەنتىنىڭ رەسمي وكىلى جاننا ءبىلالوۆا.

بالا مەن اجە بىرگە تۇرعان

مايىتتەر جاتقان ۇيدە اجەسى مەن 6 جاسار نەمەرەسى بىرگە تۇرعان بولىپ شىقتى. ءۇي يەسى ەشكىمدى ۇيگە كىرگىزبەي، ءتىپتى بالانى بالاباقشاعا دا، مەكتەپكە دە جىبەرمەگەن.

«قازىرگى ۋاقىتتا بالا مايقايىڭداعى اۋرۋحاناعا جاتقىزىلدى. دارىگەرلەر قىز بالانىڭ دەنساۋلىعىنىڭ جاقسى ەكەنىن ايتادى. دامۋىندا ەشقانداي اۋىتقۋشىلىق جوق. ازىرشە 3 كۇن وسى اۋرۋحانادا بولادى. كەيىن بالانى ورنالاستىرۋ بويىنشا شەشىم قابىلدانادى»، – دەدى بالالار قۇقىعىن قورعاۋ جونىندەگى وڭىرلىك ۋاكىل ساۋلە شاكەنوۆا.

بالانىڭ زاڭدى وكىلدەرى انىقتالماعاندىقتان، ونى ەكىباستۇزداعى «ءۇمىت» ورتالىعىنا جىبەرۋ ماسەلەسى قاراستىرىلۋدا. ال مايىتتەردى ۇيدە ساقتاعان ەگدە جاستاعى ايەل تەرگەۋ امالدارىنان كەيىن ۇيىنە جىبەرىلدى. ءقازىر ونىڭ ارەكەتىنە قۇقىقتىق باعا بەرىلىپ، قىلمىس قۇرامىنىڭ بار-جوعى انىقتالۋدا.