InfoHub Logo

وقۋ-اعارتۋ ءمينيسترى عاني بەيسەمبايەۆ بيىلعى PISA قورىتىندىسىن جاريالادى.

«ءقازىر عانا كەزەكتى PISA رەيتينگىنىڭ ناتيجەسى جاريالاندى. وزدەرىڭىز بىلەتىندەي، بۇل — ءبىلىم ساپاسىن باعالايتىن ماڭىزدى حالىقارالىق جۇيە. ەلىمىز ماتەماتيكا جانە جاراتىلىستانۋ پاندەرى بويىنشا توپ-50 ەلدىڭ ىشىنە كىردى. جاراتىلىستانۋ پاندەرىنەن كورسەتكىش 26 بالعا ارتىپ، ماتەماتيكا جانە وقۋ ساۋاتى بويىنشا الدىڭعى ناتيجەلەر ساقتالدى. بۇل جەردە مەكتەپتەرىمىزدىڭ ءرولىن ەرەكشە اتاپ وتكەن ءجون. قالا مەن اۋىلدىق جەرلەردەگى وقۋشىلار اراسىنداعى ءبىلىم ساپاسىنداعى الشاقتىق ازايىپ كەلەدى. جالپى، 81 ەلدىڭ ىشىندە قازاقستان ماتەماتيكادان 46-ورىن (2018 جىلى 54)، وقۋدان — 61-ورىن (2018 جىلى 69)، جاراتىلىستانۋ پانىنەن — 49-ورىندا (2018 جىلى 69) تۇر. مەملەكەت باسشىسىنىڭ ءبىلىم بەرۋ جۇيەسىنە ۇزدىكسىز كورسەتىپ كەلە جاتقان جان-جاقتى قولداۋىنىڭ ارقاسىندا وسىنداي كورسەتكىشتەرگە قول جەتتى. پەداگوگ مارتەبەسىن ارتتىرۋ، جالاقىنى كوبەيتۋ، قوسىمشا ءبىلىم بەرۋدى، ينفراقۇرىلىمدى دامىتۋ، بالالارىمىز ءۇشىن ءقاۋىپسىز جانە جايلى ورتانى قامتاماسىز ەتۋ شارالارى ءبىلىم ساپاسىن ارتتىرۋعا تىكەلەي اسەر ەتەدى. ءبىلىم سالاسىن دامىتۋداعى مەملەكەتتىك ۇستانىمنىڭ دۇرىستىعى ايقىندالدى. وسى باعىتتاعى جۇمىستى كۇشەيتە تۇسكەن ءجون»، — دەپ جازدى مينيستر Facebook پاراقشاسىندا.

وسىعان بايلانىستى وقۋ-اعارتۋ مينيسترلىگى حالىقارالىق تاجىريبەنى ەسكەرە وتىرىپ، ءبىلىم بەرۋ ساپاسىن ودان ءارى ارتتىرۋ ءۇشىن 5 نەگىزگى باعىت بويىنشا جۇيەلى جۇمىس جۇرگىزىپ جاتىر.

اتاپ ايتقاندا:

— «ءبىلىم بەرۋدەگى وزگەرىستەردىڭ 1000 كوشباسشىسى» كادرلىق رەزەرۆىن قالىپتاستىرۋ جانە مەنەدجمەنتتى نىعايتۋ؛

— 21 عاسىرداعى داعدىلار مەن قۇزىرەتتەردى دامىتۋ ءۇشىن وقۋ باعدارلامالارىن جاڭارتۋ، اۋىل مەكتەپتەرىن قولداۋ جونىندەگى كەشەندى باعدارلامانى ىسكە اسىرۋ؛

— دايىندىق تاسىلدەرىن جەتىلدىرۋ، پەداگوگتەردى قايتا دايارلاۋ جانە بىلىكتىلىگىن ارتتىرۋ؛

— «جايلى مەكتەپ» ۇلتتىق جوباسى شەڭبەرىندە جاڭا مەكتەپتەر سالۋ، قالعان ءبىلىم وشاقتارىن جاڭعىرتۋ، ينفراقۇرىلىمىن دامىتۋ؛

— ساپانى باعالاۋدىڭ ۇلتتىق جۇيەسىن ترانسفورماسيالاۋ.

«بۇل شارالاردىڭ ءبارى بيىل ۇكىمەت قاۋلىسىمەن بەكىتىلگەن „مەكتەپكە دەيىنگى، ورتا، تەحنيكالىق جانە كاسىپتىك ءبىلىم بەرۋدى دامىتۋدىڭ 2023-2029 جىلدارعا ارنالعان تۇجىرىمداماسىندا“ قامتىلعان. مەملەكەتتىك ساياسات شەڭبەرىندە ءبىلىم جۇيەسىنىڭ ساپاسىن ارتتىرۋعا باعىتتالعان وسىنداي كەشەندى جۇمىس قاجەتتى ناتيجەگە قول جەتكىزۋگە مۇمكىندىك بەرەتىنىنە سەنىمدىمىن. بالاعا ساپالى ءبىلىم مەن سانالى تاربيە بەرۋدە تىنىمسىز ەڭبەكتەنىپ جۇرگەن بارشا پەداگوگتەرگە شىن جۇرەكتەن العىس ايتامىن»، — دەدى ول.

---