InfoHub Logo

مەملەكەت باسشىسى قازاقستان رەسپۋبليكاسىنىڭ جاڭا سپورت تۋرالى زاڭىنا قول قويدى. بۇل قۇجات ەلىمىزدەگى سپورت سالاسىن ودان ءارى دامىتۋعا باعىتتالعان جانە ءبىرقاتار ماڭىزدى جاڭالىقتاردى قامتيدى.

ەندى سپورتتىڭ باسىم تۇرلەرى حالىقارالىق دەڭگەيدەگى جەتىستىكتەرگە قاراي ايقىندالادى. ولاردىڭ قاتارىندا وليمپيادا، پاراليمپيادا، سۋردليمپيادا، ازيا جانە پارازيا ويىندارىنىڭ باعدارلاماسىنا ەنگەن سپورت تۇرلەرى، سونداي-اق ۇلتتىق سپورت تۇرلەرى بار.

زاڭ اياسىندا سپورت فەدەراسيالارىن اككرەديتتەۋ ءتارتىبى دە جەتىلدىرىلدى. ەندى ولار ۇلتتىق جانە جەرگىلىكتى سپورت فەدەراسيالارى بولىپ بولىنەدى. بۇل شارا سپورت ۇيىمدارىنىڭ قىزمەتىن ناقتىلاپ، باقىلاۋدى كۇشەيتۋدى كوزدەيدى.

ماڭىزدى وزگەرىستەردىڭ ءبىرى – شەتەلدىك لەگيونەرلەردى قارجىلاندىرۋعا قاتىستى. ەندى بيۋدجەتتەن نەمەسە كۆازيمەملەكەتتىك سەكتوردىڭ قاراجاتىنان شەتەلدىك سپورتشىلارعا قارجى بولىنبەيدى. بۇل قاراجات ءتورت نەگىزگى باعىتقا باعىتتالادى: جوعارى جەتىستىكتەر سپورتى (ونىڭ ىشىندە باسىم سپورت تۇرلەرى)، مەملەكەتتىك سپورت ۇيىمدارىنىڭ قىزمەتى، بۇقارالىق سپورت جانە سپورتتىق ينفراقۇرىلىمدى دامىتۋ.

سونداي-اق سپورتشىلاردى ۇلتتىق قۇندىلىقتارعا نەگىزدەلگەن ءبىرىڭعاي ستاندارتپەن دايارلاۋ جۇيەسى ەنگىزىلەدى. بۇل جاس بۋىندى تاربيەلەۋ مەن رۋحاني قۇندىلىقتاردى نىعايتۋعا ىقپال ەتەدى.

دوپينگ ماسەلەسى دە نازاردان تىس قالمادى. ەندى ۋاكىلەتتى ورگان دوپينگكە قارسى ەرەجەلەردىڭ بۇزىلۋى بويىنشا ءتيىستى شارا قابىلداۋ قۇزىرەتىنە يە بولادى.

جاڭا زاڭ ەلىمىزدەگى سپورتتى جۇيەلى دامىتۋ مەن ونى قولداۋعا باعىتتالعان ناقتى قادام بولماق.