InfoHub Logo

مەملەكەت باسشىسى قاسىم-جومارت توقايەۆ «كىتاپ وقۋ مادەنيەتىن دامىتۋ جانە زەردەلى ۇلت قالىپتاستىرۋ جونىندەگى شارالار تۋرالى» جارلىققا قول قويدى. بۇل قۇجات قوعامنىڭ زياتكەرلىك جانە مادەني دەڭگەيىن كوتەرۋگە، ءبىلىم مەن تاربيە جۇيەسىندە كىتاپتىڭ ءرولىن كۇشەيتۋگە باعىتتالعان.

بۇل تۋرالى Infohub.kz اقپارات اگەنتتىگى حابارلايدى.

جارلىقتىڭ نەگىزگى ماقساتى – شىعارماشىل، ويلى، باسەكەگە قابىلەتتى تۇلعا قالىپتاستىرۋعا جاعداي جاساۋ. پرەزيدەنت مادەنيەت، ءبىلىم بەرۋ جانە يننوۆاسيا سالالارىنداعى مەملەكەتتىك ساياساتتىڭ باسىم باعىتتارىن ايقىنداپ، كىتاپ وقۋ مادەنيەتىن دامىتۋ، جاڭا فورماتتاعى كىتاپحانالار مەن قوعامدىق كەڭىستىكتەر قۇرۋ، سيفرلىق قۇرالداردى ەنگىزۋ، وتاندىق اۆتورلاردى قولداۋ، باسپا ءىسىن ىنتالاندىرۋ جانە ۇلتتىق ادەبي مۇرانى ناسيحاتتاۋدى تاپسىردى.

جاستار اراسىندا كىتاپ وقۋدى ناسيحاتتاۋ

ۇكىمەتكە بالالار مەن جاستار اراسىندا كىتاپ وقۋعا دەگەن تۇراقتى قىزىعۋشىلىقتى قالىپتاستىرۋ، وقىرمان ينفراقۇرىلىمىن جاڭعىرتۋ، ۇلتتىق ادەبيەتتى ساپالى اۋدارۋ جانە كەڭ اۋديتورياعا تاراتۋ بويىنشا ناقتى تاپسىرمالار بەرىلدى. سونىمەن قاتار، 2026 جىلعى 1 قىركۇيەككە دەيىن «جىلدىڭ 10 وقىرمانى» رەسپۋبليكالىق جوباسى ىسكە قوسىلادى. ال 2026 جىلدىڭ سوڭىنا دەيىن «زەردەلى ۇلت» تۇجىرىمداماسى بەكىتىلەدى.

جاڭا زاڭ جوبالارى مەن سىيلىقتار

جارلىق اياسىندا 2027 جىلعى 1 قاڭتارعا دەيىن «كىتاپحانا جانە كىتاپ شىعارۋ ءىسى تۋرالى» جاڭا زاڭ جوباسى ازىرلەنەدى. كىتاپ وقۋ مادەنيەتىن دامىتۋداعى جەتىستىكتەر ءۇشىن ۇلتتىق سىيلىق تاعايىندالىپ، ءبىرىڭعاي قولجەتىمدى ۇلتتىق سيفرلىق كىتاپحانا پلاتفورماسى قۇرىلادى. جارلىق قول قويىلعان كۇننەن باستاپ كۇشىنە ەنەدى.