InfoHub Logo

رەسەي فەدەراسياسىنىڭ پرەزيدەنتى ۆلاديمير پۋتين ۋكرايناعا ەشقانداي شارت قويماستان تىكەلەي كەلىسسوزدەر جۇرگىزۋدى ۇسىندى.

ونىڭ ايتۋىنشا، رەسەي مۇنداي ديالوگتى 15 مامىردا ىستامبۇلدا باستاۋعا دايىن.

"ەرتەڭ بىزدە پرەزيدەنت ەردوعانمەن اڭگىمە جوسپارلانعان. مەن ودان وسى كەلىسسوزدەردى وتكىزۋ مۇمكىندىگىن سۇراۋىن وتىنەمىن"، — دەدى رەسەي باسشىسى.

سونىمەن بىرگە، ول ۋكراينا مەن ەۋروپا ەلدەرىنىڭ 30 كۇندىك ءبىتىم تۋرالى ۇسىنىسىن قابىلداماي، ۋلتيماتۋممەن كەلىسپەيتىنىن جانە ءوز شارتتارىن ۇسىناتىنىن ءبىلدىردى.

"ءبىزدىڭ ۇسىنىستار ۇستەلدە جاتىر، شەشىمدى ۋكراينا مەن ولاردىڭ ەۋروپالىق قامقورشىلارى قابىلدايدى"، – دەدى پۋتين.

رەسەي فەدەراسياسى كييەۆتىڭ رەاكسياسىنا بايلانىستى ءۇش كۇندىك مامىر ءبىتىمىن ۇزارتۋ مۇمكىندىگىن دە جوققا شىعارمادى.

بۇعان دەيىن كرەملدىڭ باسپا ءسوز حاتشىسى دميتريي پەسكوۆ 80 جىلدىق جەڭىس مەرەكەسىنە بايلانىستى جاريالانعان ءبىتىمنىڭ اياقتالعانىن راستادى.

پۋتين باسپاسوزگە شىققان سوڭ، پەسكوۆ 15 مامىردا ىستامبۇلدا جوسپارلانعان ۋكراينامەن كەلىسسوزدەردىڭ "ءتيىستى دەڭگەيدە" وتەتىنىن ايتتى.

ءپۋتيننىڭ كەڭەسشىسى يۋريي ۋشاكوۆ رەسەي تاراپىنان كەلىسسوزگە دەلەگاسيا باراتىنىن جانە ونىڭ قۇرامى كەيىنىرەك جاريالاناتىنىن جەتكىزدى.

رەسەيلىك ب ا ق ۆلاديمير ءپۋتيننىڭ الداعى مالىمدەمەسىن "اقش-تىڭ كەشكى پرايم-تايمىن شايقالتادى" دەپ انونس جاساعان ەدى.

رەسەي پرەزيدەنتىنىڭ ءسوزىن CNN، NBC جانە BBC تىلشىلەرى باقىلاۋعا جىبەرىلدى، ءبىراق جۋرناليستەردەن سۇراق قابىلداۋ قاراستىرىلماعان.

ءپۋتيننىڭ مالىمدەمەسىنە دەيىن فرانسيا، ۇلىبريتانيا، پولشا جانە گەرمانيا كىرەتىن "قالاعاندار كواليسياسى"، سونداي-اق ۋكراينا 12 مامىردان باستاپ 30 كۇندىك تولىق جانە شارتسىز اتىستى توقتاتۋ تۋرالى ۇسىنىس جاساعان ەدى. ەۋروپالىق كوشباسشىلار ەگەر ماسكەۋ بۇل ۇسىنىستان باس تارتسا، سانكسيالار ەداۋىر كۇشەيەتىنىن ەسكەرتكەن.

CNN تەلەارناسىنا بەرگەن سۇحباتىندا دميتريي پەسكوۆ رەسەي بۇل 30 كۇندىك ءبىتىم تۋرالى ۇسىنىستى قاراستىرىپ جاتقانىن ايتتى.

بۇعان دەيىن ۋكراينا پرەزيدەنتى ۆلاديمير زەلەنسكيي اقش پرەزيدەنتى دونالد ترامپپەن تەلەفون ارقىلى سويلەسۋ كەزىندە، ەگەر رەسەي ەشقانداي شارت قويماي اتىستى 30 كۇنگە توقتاتۋعا كەلىسسە، ۋكراينا تىكەلەي بەيبىت كەلىسسوزدەرگە دايىن ەكەنىن جەتكىزگەن.

رەسەيلىك اقپارات قۇرالدارىنىڭ ايتۋىنشا، بۇل كرەملدە العاش رەت ءتۇن ورتاسىندا وتكەن باسپا ءسوز ءماسليحاتى بولدى. جۋرناليستەر ۆلاديمير ءپۋتيننىڭ شىعۋىن ءبىر ساعاتتان اسا كۇتكەن.