InfoHub Logo

اتىراۋ وبلىسىنداعى ءبىر وتباسىنىڭ ءتورت مۇشەسىن ءولتىرۋ ءىسى بويىنشا جاڭا دەرەكتەر بەلگىلى بولدى.

بۇل تۋرالى Infohub.kz اقپارات اگەنتتىگى حابارلايدى.

قاندى وقيعانىڭ ءمان-جايى

قىزىلقوعا اۋدانى جانگەلدين اۋىلىندا ورىن العان قاندى وقيعاعا قاتىستى تەرگەۋ امالدارى جالعاسۋدا. قاراشا ايىندا جوعالىپ كەتكەن ەرلى-زايىپتى قارتتار مەن ولاردىڭ ۇل-قىزىنىڭ مايىتتەرى تابىلىپ، بۇل قىلمىس بويىنشا كۇيەۋ بالاسى سۇلتان سارسەمالييەۆ پەن مارقۇمداردىڭ كىشى قىزى اقبايان مۇقانعالييەۆا كۇدىككە ءىلىندى. قازىرگى ۋاقىتتا كۇدىكتى ايەلدىڭ تۋىستارى ونىڭ قىلمىسقا قاتىسى بار دەگەنگە سەنبەيتىنىن ءبىلدىرىپ وتىر.

تەرگەۋ مالىمەتتەرىنە سايكەس، نەگىزگى كۇدىكتى سۇلتان سارسەمالييەۆ ءتورت ادامنىڭ ءولىمىن الدىن الا جوسپارلاعان. ول جابىرلەنۋشىلەردىڭ مۇلكىن يەمدەنىپ، وقيعادان كەيىن شەتەلگە قاشىپ كەتكەن. كەيىننەن قۇزىرلى ورگاندار بۇل ىسكە ونىڭ بەيرەسمي نەكەدەگى ايەلى اقباياننىڭ دا قاتىسى بولۋى مۇمكىن ەكەنىن العا تارتتى.

اقباياننىڭ دەنساۋلىعى جانە تۋىستارىنىڭ پىكىرى

ەلگە قايتارىلعاننان كەيىن اقباياننىڭ پسيحولوگيالىق جاعدايىنا بايلانىستى ول الدىمەن جەرگىلىكتى اۋرۋحاناعا، سودان سوڭ الماتىداعى ارنايى جۇيكە اۋرۋلارىن ەمدەۋ ورتالىعىنا ساراپتاماعا جىبەرىلدى.

مارقۇم ماقسوت مۇقانعالييەۆتىڭ قارىنداسى ادەمى مۇقانعالييەۆا ءسىڭلىسى اقباياننىڭ دەنساۋلىعىندا كىنارات بارىن، ونىڭ ءوز ىس-ارەكەتىنە ەسەپ بەرە المايتىن كۇيدە بولعانىن ايتادى. ونىڭ سوزىنشە، اقبايان ەمدەۋ ورنىندا جاتقاندا اتا-اناسىن ساعىنعانىن ايتىپ، ءتىپتى ءوزىنىڭ بەسىنشى بالاسى بار ەكەنىن دە ۇمىتىپ قالعان. تۋىستارى ونىڭ قىلمىستىق نيەتى بولماعانىن، تەك اۋرۋىنىڭ سالدارىنان وسىنداي جاعدايعا تاپ بولعانىن العا تارتۋدا.

«كيىم، تاماقتارىن اپارىپ تۇرامىن عوي. ءدارىسىن بەرىپ جىبەرەمىن. ءبىراق، كەزدەسكەن جوقپىن. كورۋگە، كەزدەسۋگە بولمايدى. رۇقسات جوق. ىشكى ىستەر باسقارماسىنا دا بارىپ شىقتىم. «سوت بولعان جوق. ءبارى باقىلاۋدا تۇر. كەزدەستىرە المايمىز» دەدى. بىزگە اقباياننىڭ دەنساۋلىعىنا قاتىستى، جەكە باسى تۋرالى ەشقانداي اقپارات ايتا المايدى. ارنايى رۇقسات قاعازى كەرەك ەكەن. «جاقسى. ەمىن الىپ جاتىر. باسقا نە ايتاسىزدار؟!» دەدى. «قانى از» دەدى. ارتىنان «ءتىسى اۋىرىپ جاتىر» دەدى. دارىگەرلەر ءدارىسىن جازىپ بەرەدى. اپارىپ بەرىپ وتىرامىن. شالقار اعاسى اپارىپ بەرىپ ءجۇر. دارىگەرلەر «اعاڭ كەلىپ كەتتى» دەگەن كەزدە، «ناۋرىز اعام عوي» دەپتى»، - دەيدى ادەمى مۇقانعالييەۆا.

بالالاردىڭ جاعدايى

قازىرگى ۋاقىتتا ەرلى-زايىپتىلاردان قالعان بەس بالا مەملەكەت قامقورلىعىنا الىندى. ولاردىڭ ۇلكەندەرى كامەلەتكە تولماعانداردى بەيىمدەۋ ورتالىعىنا ورنالاستىرىلسا، كىشىلەرى سابيلەر ۇيىنە تاپسىرىلدى. سۇلتان سارسەمالييەۆ پەن اقبايان مۇقانعالييەۆانىڭ اراسىندا زاڭدى نەكە بولماعان. جۋرناليست جانات مولداشيەۆا تاراتقان بۇل اقپارات بويىنشا مەديسينالىق ساراپتاما ناتيجەلەرى كۇتىلۋدە.