InfoHub Logo

قاراعاندى وبلىسىندا ءتورت كۇننەن بەرى جالعاسىپ جاتقان قولايسىز اۋا رايى جول قاتىناسىنا قىسىم كورسەتۋدە. مەل، قاتتى جەل جانە كوكتايعاق سالدارىنان ءوڭىر جولدارىندا ۇزىن-سونار كەپتەلىستەر پايدا بولىپ، كولىك قوزعالىسى توقتادى.

بۇل تۋرالى Infohub.kz اقپارات اگەنتتىگى حابارلايدى.

كەپتەلىستىڭ سەبەبى

13 ناۋرىز كۇنى كەشكە قاراعاندى – استانا تاسجولىندا جاعداي كۇرت قيىندادى. وشاعاندى كەنتى ماڭىنداعى كوتەرىڭكى جەردە قاتتى كوكتايعاقتان جۇزدەگەن كولىك كەپتەلىپ قالدى. جۇرگىزۋشىلەردىڭ ايتۋىنشا، سول جەردە شامامەن 500 جۇك كولىگى مەن 700-گە جۋىق جەڭىل اۆتوكولىك جينالعان. كولىكتەردىڭ كوتەرىڭكى جولدى باعىندىرا الماۋى سالدارىنان قوزعالىس تولىعىمەن دەرلىك توقتادى.

جولداعى جاعداي

الەۋمەتتىك جەلىلەردە تاراعان ۆيدەودا پوليسيا قىزمەتكەرلەرىنىڭ لوپاتامەن جولعا قۇم سەۋىپ، كولىكتەردىڭ ءجۇرىپ كەتۋىنە كومەكتەسۋگە تىرىسىپ جاتقانى كورىنەدى. بىرنەشە كۇن بويى جولدا قالعان جۇرگىزۋشىلەر تاماقسىز، سۋسىز جانە جانارمايسىز وتىرعانىن ايتتى.

تەڭىزتاۋ قالاسى اكىمدىگىنىڭ حابارلاۋىنشا، كەپتەلىستە قالعان جۇرگىزۋشىلەرگە ەرىكتىلەر كومەك كورسەتكەن. "شانىراق" ورتالىعىنىڭ ەرىكتىلەرى، جەرگىلىكتى مەشىتتەردىڭ يمامدارى مەن جاماعاتى ىستىق تاماق تاراتىپ، قولداۋ كورسەتتى.

رەسمي جاۋاپ

قاراعاندى وبلىستىق پوليسيا دەپارتامەنتىنىڭ باسپا ءسوز قىزمەتى وشاعاندى كەنتى ماڭىنداعى كەپتەلىس تۋرالى اقپاراتتى راستادى. ۆەدومستۆو جولداردى اشۋ جانە جابۋ ماسەلەسى پوليسيانىڭ تىكەلەي قۇزىرەتىنە جاتپايتىنىن اتاپ ءوتتى. مۇنداي شەشىمدەردى جول وپەراتورى "قازاۆتوجول" قابىلدايدى.

سوڭعى كۇندەرى وڭىردە اۋا رايىنىڭ كۇرت ناشارلاپ، قاتتى بوران، جەل جانە كورۋدىڭ ناشارلاۋى بايقالعانى ايتىلدى. وسىعان بايلانىستى ءبىرقاتار جول ۋچاسكەلەرىندە ۋاقىتشا شەكتەۋلەر ەنگىزىلگەن. پوليسيا قىزمەتكەرلەرى كۇشەيتىلگەن رەجيمدە جۇمىس ىستەپ، بەس مىڭعا جۋىق كولىككە كومەك كورسەتكەن.

ءوز كەزەگىندە "قازاۆتوجول" كومپانياسى ادامداردىڭ ءۇش كۇن بويى جولدا بولعانى تۋرالى اقپاراتتى جوققا شىعاردى. كومپانيانىڭ مالىمەتىنشە، جول تەحنيكاسى تاۋلىك بويى جۇمىس ىستەپ، كۇردەلى ۋچاسكەلەردە كولىك قوزعالىسى توپتامامەن ۇيىمداستىرىلادى. وتكەن تاۋلىكتە مىڭنان استام كولىككە سۇيەمەلدەۋ كورسەتىلگەن.