InfoHub Logo

قاراعاندىدا جۇمباق جاعدايدا قايتىس بولعان ەر ادامنىڭ ولىمىنە قاتىستى تۋىستارى كۇدىك كەلتىرىپ وتىر

قاراعاندىدا 40 جاستاعى نۇرگەلدى ناۋكەنوۆتىڭ جۇمباق ولىمىنە قاتىستى ونىڭ تۋىستارى بۇل قاستاندىقپەن جاسالعان ارەكەت بولۋى مۇمكىن ەكەنىن مالىمدەدى. مارقۇم قالاعا ۇلىنىڭ وقۋ اقىسى مەن پاتەر اقىسىن تولەۋ ءۇشىن كەلگەن. الايدا، سول ساپارىنان كەيىن ۇيىنە ورالماعان.

وقيعا 1 ميلليون تەڭگە الىپ قاراعاندىعا كەلگەن ناۋكەنوۆتىڭ پاتەر جالداپ، سول كۇنى تانىسىمەن بىرگە ءدامحاناعا بارۋىنان باستالادى. كۋاگەرلەردىڭ ايتۋىنشا، كەشكى اس ۇستىندە بىرنەشە بەيتانىس ادام قوسىلىپ، بەلگىسىز بىرەۋى ونى يتەرىپ جىبەرگەن. ەر ادام اۋىر سوققىدان قۇلاپ، ەسىنەن تانىپ قالعان. كەيىن ونى ەس-تۇسسىز كۇيدە تاكسيگە وتىرعىزىپ، جالعا الىنعان پاتەردىڭ الدىنا تاستاپ كەتكەن.

تۋىستارىنىڭ سوزىنشە، نۇرگەلدى پاتەردى تابا الماي، كوشەدە سەندەلىپ جۇرگەندە كورشىلەر پوليسيا شاقىرعان. الايدا ءتارتىپ ساقشىلارى اۋىر جاراقاتى بولا تۇرا جەدەل جاردەم شاقىرماعان. قايتا ءۇش ساعات بولىمشەدە ۇستاپ، كەيىن 16 جاستاعى ۇلىن شاقىرتىپ، اكەسىن سوعان تاپسىرعان. ۇلى قوناقۇيدەن بولمە جالداپ بەرگەن. نۇرگەلدى سول جەردە جالعىز ءوزى كوز جۇمعان.

مارقۇمنىڭ جاقىندارى بۇل ءولىمنىڭ كەزدەيسوق ەمەستىگىن ايتىپ وتىر. ولاردىڭ پىكىرىنشە، بۇل – الدىن الا ۇيىمداستىرىلعان شابۋىل. ولار پوليسيانىڭ ارەكەتىنە دە كۇمان كەلتىرىپ، ءىستىڭ ءادىل تەرگەلۋىن تالاپ ەتۋدە.

ءقازىر وقيعا بويىنشا تەرگەۋ باستالعان. ال قوعام بەلسەندىلەرى مەن قۇقىق قورعاۋشىلار بۇل ءىستىڭ ءجىتى باقىلاۋعا الىنۋىن سۇراپ وتىر. ناۋكەنوۆتىڭ تۋىستارى بولسا، جاۋاپتىلار جازاسىز قالماۋى ءتيىس دەيدى.