InfoHub Logo

كوپ قىزداردىڭ ارمانىنا اينالعان بورتسەرىك ماماندىعى سىرت كوزگە تولاسسىز ساياحات پەن سۇلۋلىققا تولى بولىپ كورىنۋى مۇمكىن. الايدا بۇل جولدىڭ ءوز قيىندىعى مەن ۇلكەن جاۋاپكەرشىلىگى بار. الەمدەگى ەڭ ۇزدىك اۋە كومپانيالارىنىڭ ءبىرى Fly Emirates-كە جۇمىسقا ورنالاسقان قازاق قىزى اقجان تۇراروۆامەن سۇحباتتاستىق.

بۇل تۋرالى Infohub.kz اقپارات اگەنتتىگى حابارلايدى.

«Air Astana» – كاسىبي مەكتەپ

اقجاننىڭ اۆياسياداعى جولى وتاندىق «Air Astana» كومپانياسىندا باستالدى. وندا جۇمىس ىستەگەن ءۇش جىلىن جەكە تۇلعا رەتىندە قالىپتاستىرعان، كاسىبي شىڭداعان مەكتەپ بولدى دەپ ەسەپتەيدى.

«بۇل جۇمىس ارقىلى كاسىبي داعدىلارىم دامىدى، الەمدى تانىدىم. ءۇش جىل ىشىندە جاڭا مادەنيەتپەن تانىسىپ، جاڭا دوستار تاپتىم. «Air Astana»-داعى جۇمىسىمدى ءاردايىم قۋانىشپەن ەسكە الامىن»، – دەيدى اقجان.

Emirates-تەن شاقىرتۋ

الەمدىك دەڭگەيدەگى الىپ كومپانيادان ۇسىنىس تۇسكەندە، اقجان ءارى قۋانعانىن، ءارى تاڭعالعانىن دا ايتادى. سەبەبى Fly Emirates – ءوز سالاسىنىڭ شىڭى. ءبىراق شەشىم قابىلداۋ وڭاي بولماعان. جاڭا ورتاعا بەيىمدەلۋ، ۇيرەنشىكتى كومفورت ايماعىنان شىعۋ جانە جاۋاپكەرشىلىكتىڭ ارتۋى ۇلكەن باتىلدىقتى تالاپ ەتتى. سول كەزدەگى كۇمان مەن قورقىنىشتى جەڭە بىلگەن اقجان بولاشاعى ءۇشىن دۇرىس تاڭداۋ جاسادىم دەيدى.

ىرىكتەۋ كەزەڭى: تەك مىقتىلارعا ورىن بار

Fly Emiratesء-تىڭ ىرىكتەۋ تالاپتارى وتە قاتال ءارى جوعارى ەكەنى بەلگىلى. اقجاننىڭ ايتۋىنشا، كومپانيا ءاربىر ۇمىتكەردەن كاسىبي بىلىكتىلىكتەن بولەك، تەمىردەي ءتوزىم مەن پسيحولوگيالىق دايىندىقتى تالاپ ەتەدى.

«ىرىكتەۋ پروسەسى بىرنەشە كۇردەلى كەزەڭنەن تۇردى. الدىمەن ونلاين ءوتىنىم تولتىرىلىپ، ودان وتكەندەر كاستينگكە شاقىرىلدى. كاستينگ بارىسىندا ۇمىتكەرلەر توپتىق سىناقتاردان ءوتىپ، ارنايى تەستەر تاپسىردى جانە بەتپە-بەت سۇحباتتاردا وزدەرىنىڭ قابىلەتتەرىن دالەلدەدى»، – دەيدى اقجان.

پروسەستەردىڭ بارلىعى اعىلشىن تىلىندە عانا جۇرگىزىلگەندىكتەن، ءتىلدى ەركىن مەڭگەرۋ ەڭ باستى شارتتاردىڭ ءبىرى بولعان. اقجان بۇل سىننان مۇدىرمەي ءوتۋ ءۇشىن كوپ ىزدەنىپ، وسى سالادا جۇرگەن دوس قىزدارىنىڭ تاجىريبەسىنە سۇيەنىپ، جان-جاقتى دايىندالادى. بۇگىندە ول وسى كومپانيادا ءوزى سەكىلدى قازاق قىزدارىنىڭ كوپتىگىن كورىپ، ولاردىڭ ءبىلىمى مەن تالپىنىسىنا ماقتانىشپەن قارايدى.

ماماندىقتىڭ كولەڭكەلى تۇستارى

ستيۋاردەسسا ماماندىعى سىرتتاي قاراعاندا قانشالىقتى ادەمى كورىنگەنىمەن، ونىڭ كولەڭكەلى تۇستارى مەن اۋىر جۇگى دە از ەمەس. اقجان بۇل سالانىڭ قيىندىعىن دا اشىق ايتادى. ۇيقىسىز تۇندەر، تۇراقسىز رەجيم، فيزيكالىق جانە مەنتالدى شارشاۋ. مەرەكە كۇندەرى جاقىندارىڭنىڭ جانىندا بولا المايسىڭ. كەز كەلگەن جاعدايدا، ءتىپتى كوڭىل-كۇيىڭ بولماسا دا، جولاۋشىلارعا مەيىرىممەن كۇلىمسىرەپ قاراۋ دا ۇلكەن ەرىك-جىگەردى تالاپ ەتەدى.

«دەنساۋلىققا دا ۇلكەن اسەر ەتەدى، سوندىقتان ۇنەمى دارۋمەندەر قابىلداپ، ءوزىڭدى كۇتۋىڭ كەرەك. بۇل جولدى تەك اسپاندى شىن جۇرەكپەن سۇيەتىن ادام عانا تاڭداي الادى»، – دەپ تۇيىندەدى ول.

دەسە دە، كوكتە ۇشقاندى شىن سۇيەتىن جان ءۇشىن بۇل كەدەرگىلەردىڭ ءبارى ەكىنشى ورىنعا ىسىرىلادى. اقجاننىڭ ايتۋىنشا، شەتەلدىك اۋە كومپانياسىندا جۇمىس ىستەۋ – الەمدى تانۋدىڭ، ءتۇرلى مادەنيەت وكىلدەرىمەن ءتىل تابىسۋدىڭ جانە ومىرلىك ءبىلىم جيناۋدىڭ زور مۇمكىندىگى. ول ارمانى اسقاق قىزدارعا تەك ارەكەت ەتۋدى، اعىلشىن ءتىلىن توقتاۋسىز دامىتۋدى جانە وزىنە دەگەن سەنىمدىلىكتى جوعالتپاۋدى كەڭەس بەرەدى. سەبەبى ماقساتقا دەگەن ادالدىق پەن قاجىرلى ەڭبەك قانا ادامدى بيىك شىڭدارعا، ءتىپتى الەمدىك دەڭگەيدەگى كومپانيالاردىڭ بورتتارىنا جەتەلەيدى.