InfoHub Logo

قازاقستان الەمدەگى ەڭ باقىتتى ەلدەر قاتارىندا 10 ساتىعا جوعارىلاپ، تمد ەلدەرى اراسىندا الدىڭعى ورىنعا شىقتى. بۇل تۋرالى بۇۇ-نىڭ جاڭا «World Happiness Report» بايانداماسىندا ايتىلعان.

بۇل تۋرالى Infohub.kz اقپارات اگەنتتىگى حابارلايدى.

رەيتينگتەگى ورنىمىز

بيىل قازاقستان 147 ەلدىڭ ىشىنەن 33-ورىندى يەلەندى. وتكەن جىلى بۇل كورسەتكىش 43-ورىندا بولعان ەدى. بۇل كورسەتكىش بويىنشا قازاقستان تمد ەلدەرى اراسىندا ەڭ جوعارى ناتيجەگە قول جەتكىزدى. ودان كەيىنگى ورىنداردا وزبەكستان (53-ورىن)، قىرعىزستان (66-ورىن)، مولدوۆا (77-ورىن)، رەسەي (79-ورىن)، تاجىكستان (88-ورىن)، ارمەنيا (89-ورىن) جانە ءازىربايجان (102-ورىن) ورنالاستى.

الەمدەگى ەڭ باقىتتى ەلدەر

الەمدەگى ەڭ باقىتتى ەل رەتىندە قاتارىنان توعىزىنشى رەت فينليانديا تانىلدى. ودان كەيىن يسلانديا، دانيا، كوستا-ريكا جانە شۆەسيا ەلدەرى تۇر. العاشقى وندىققا نورۆەگيا، نيدەرلاند، يزرايل، ليۋكسەمبۋرگ جانە شۆەيساريا دا كىردى. اقش بولسا 23-ورىندى يەلەندى.

ەڭ ناشار كورسەتكىشتى، وتكەن جىلعىداي، اۋعانستان كورسەتتى. بۇل تىزىمگە سەررا-لەونە، مالاۆي، زيمبابۆە، بوتسۆانا، يەمەن جانە ليۆان ەلدەرى دە ەندى.

رەيتينگ قالاي جاسالادى؟

«World Happiness Report» جىل سايىن 20 ناۋرىزدا اتالىپ وتەتىن حالىقارالىق باقىت كۇنى قارساڭىندا جاريالانادى. باياندامانى وكسفورد ۋنيۆەرسيتەتىنىڭ زەرتتەۋ ورتالىعى گەللاپ ينستيتۋتىمەن جانە بۇۇ-مەن بىرلەسىپ دايىندايدى. ول حالىقتىڭ ءومىر ساپاسىنا قاتىستى ساۋالنامالارعا نەگىزدەلەدى.

زەرتتەۋگە 140 ەلدەن شامامەن 100 مىڭ ادامنىڭ جاۋابى الىنعان. رەسپوندەنتتەردەن ومىردەن العان قاناعاتتانۋشىلىعىن «كانتريل باسپالداعى» ارقىلى باعالاۋ سۇرالعان (ون ساتىلى شكالا، مۇندا 10 – ەڭ جاقسى ءومىر، 0 – ەڭ ناشار ءومىر).

سونىمەن قاتار، رەيتينگتى جاساۋشىلار جان باسىنا شاققانداعى ءجىو، ەركىندىك دەڭگەيى، سىبايلاس جەمقورلىققا قاتىستى تۇسىنىكتەر جانە ءومىر ءسۇرۋدىڭ كۇتىلەتىن ۇزاقتىعى سياقتى فاكتورلاردى دا ەسكەرەدى.