InfoHub Logo

قازاقستان عالىمدارىنىڭ «قارا» ءتىزىمى ازىرلەنەدى. بۇل تۋرالى بۇگىن عىلىم سالاسىنا قاتىستى زاڭناماعا وزگەرتۋلەر مەن تولىقتىرۋلار ەنگىزۋ جونىندەگى زاڭ جوباسىنىڭ تۇجىرىمداماسىن تالقىلاۋعا ارنالعان ۆەدومستۆوارالىق كوميسسيا وتىرىسىندا ق ر ءبىلىم جانە عىلىم ۆيسە-مينيسترى اسلانبەك ءامرين ءمالىم ەتتى.

«عىلىم تۋرالى قولدانىستاعى زاڭدا نورمالار مەن ۇستانىمداردىڭ بۇزۋشىلىعىن انىقتاۋ جانە ەسكەرتۋ ءۇشىن عىلىمي ادەپ سىندى ماڭىزدى تۇسىنىك تولىق كولەمدە اشىلماعان. ءبىز عالىمداردىڭ قارا ءتىزىمى دەپ اتالاتىن تۇسىنىك ەنگىزۋدى جوسپارلاۋدامىز. ول دۇرىس ساراپتاما بەرمەيتىندەرگە نەمەسە ولارعا ءاتۇستى قارايتىندارعا، پلاگيات ماسەلەسىنە قاتىستى بولادى»، - دەدى ول.

ونىڭ ايتۋىنشا، زاڭ جوباسى اياسىندا ۇكىمەتتىڭ قۇزىرىنان عىلىم باعىتى بويىنشا عىلىمي كەڭەستەر قۇرۋ قۇزىرەتىن الىپ، ونى ءبىلىم مينيسترلىگىنە بەرۋ جوسپارلانعان.

«ءبىز بۇل ۇستانىمداردى رەگلامەنتتەمەكپىز. ويتكەنى، «ۇلتتىق عىلىمي كەڭەستەر جابىق قوعامداستىق» دەگەن شاعىمدار كوپتەپ تۇسۋدە. ولاردىڭ جوبا ورتاسىنا كەلگەن بيۋدجەتىن قىسقارتۋعا، ءتىپتى ونىڭ مەملەكەتتىك تاپسىرما نەمەسە قاۋلى ەكەندىگىنە قاراماستان دا جوبانى مۇلدەم جاۋىپ تاستاۋعا، سونىمەن بىرگە عىلىمدى قارجىلاندىرۋ ماسەلەسىن قايتا قاراۋعا قۇقى بار» ، - دەدى ءامرين.

مينيسترلىك ۇسىنىپ وتىرعان تاعى ءبىر جايت عىلىمدى قارجىلاندىرۋدى قايتا قاراستىرۋعا قاتىستى. اتاپ ايتقاندا، تاپسىرىس بەرۋشى مەن ورىنداۋشىنىڭ جاۋاپكەرشىلىگى قاراستىرىلعان. وعان سايكەس مونيتورينگ ناتيجەسىندە ءتيىمسىز پايدالانىلعان قارجى بيۋدجەتكە مىندەتتى تۇردە قايتارۋ كوزدەلەدى. الداعى ۋاقىتتا ەنگىزىلەتىن وزگەرىستەرگە بايلانىستى جوبالار مەن باعدارلامالارعا بولىنەتىن بيۋدجەت قارجىسىنىڭ ءبىرىڭعاي اكىمشىسى عىلىمدى دامىتۋ بويىنشا ۇيلەستىرۋشى رەتىندە  ءبىلىم جانە عىلىم مينيسترلىگىنە جۇكتەلەدى. وعان بەيىندى مينيسترلىكتەر مەن ۆەدومستۆولاردان زەرتتەۋدى قارجىلاندىرۋ جانە ۇيلەستىرۋ وكىلەتتىكتەرى بەرىلەدى.

---