InfoHub Logo

قازاقستان مەن رەسەي اراسىنداعى شەكارادا، اقتوبە وبلىسى مەن رەسەيدىڭ ورىنبور وبلىسى اراسىنداعى «الىمبەت» باقىلاۋ-وتكىزۋ پۋنكتىندە اۋقىمدى جاڭعىرتۋ جۇمىستارى جالعاسۋدا. قازىرگى ۋاقىتتا نىسان شتاتتىق رەجيمدە جۇمىس ىستەپ تۇر، كولىك قوزعالىسى ۋاقىتشا وتكىزۋ پۋنكتى ارقىلى ۇيىمداستىرىلعان.

بۇل تۋرالى Infohub.kz اقپارات اگەنتتىگى حابارلايدى.

جاڭعىرتۋ اياسىندا اكىمشىلىك عيمارات، ينسپەكسيالىق-تەكسەرۋ كەشەندەرى، تەرەڭدەتىلگەن باقىلاۋ انگارى جانە قىزمەتتىك يتتەرگە ارنالعان ارنايى پيتومنيك سالىنۋدا. بۇگىنگى تاڭدا جۇمىستاردىڭ نەگىزگى بولىگى ورىندالىپ، سۋ قۇبىرىنىڭ قۇرىلىسى دا اياقتالۋعا جاقىن.

مەردىگەرلەردىڭ ايتۋىنشا، قاجەتتى مەتالل كونسترۋكسيالارى اقتوبەدەگى زاۋىتتا دايىندالىپ، قۇرىلىس الاڭىنا كەزەڭ-كەزەڭىمەن جەتكىزىلۋدە. قازىرگى ۋاقىتتا نىساندا قۇرىلىس-مونتاج جۇمىستارى بەلسەندى جۇرگىزىلۋدە.

جاڭعىرتۋ جۇمىستارىنىڭ بارىسى

وبلىستىق «قازاۆتوجول» ۇك» اق فيليالى ديرەكتورىنىڭ ورىنباسارى قۇرمانعازى يسمايلوۆتىڭ حابارلاۋىنشا، پۋنكت اۋماعىنداعى ەسكى عيماراتتار تولىقتاي بۇزىلعان. جاڭعىرتۋ باستالعاننان بەرى 151 مىڭ شارشى مەتر اۋماقتا جەر جۇمىستارى اتقارىلعان.

جوبانى جىل سوڭىنا دەيىن اياقتاۋ جوسپارلانۋدا. جاڭارتىلعان وتكىزۋ پۋنكتى ىسكە قوسىلعاننان كەيىن شەكاراداعى وتكىزۋ قابىلەتىن ارتتىرىپ، باقىلاۋ تيىمدىلىگىن جوعارىلاتۋعا مۇمكىندىك بەرەدى دەپ كۇتىلۋدە.