InfoHub Logo

قازاقستاننىڭ ميني-فۋتبولدان ۇلتتىق قۇراماسى SOCCA فورماتىنداعى ەۋروپا چەمپيوناتىنىڭ فينالىنا شىقتى. بۇل تاريحي جەتىستىك البانيانىڭ تيرانا قالاسىندا ءوتىپ جاتقان دودادا ورىن الدى. كوماندا AFC Allur كلۋبىنىڭ بازاسىندا قۇرىلعان.

بۇل تۋرالى Infohub.kz اقپارات اگەنتتىگى حابارلايدى.

جولداما العان جول

قازاقستان قۇراماسى فينالعا دەيىنگى جولدا سەنىمدى ويىن كورسەتتى. توپتىق كەزەڭدە پورتۋگاليانى 1:0 ەسەبىمەن جەڭىپ، لاتۆيامەن (0:0) جانە ۋكراينامەن (2:2) تەڭ وينادى.

پلەي-وفف كەزەڭىندە كوماندا ەۋروپانىڭ مىقتى قارسىلاستارىن ارتتا قالدىردى. 1/8 فينالدا گەرمانيانى 4:0 ەسەبىمەن ويسىراتا جەڭسە، شيرەك فينالدا الەم جانە ەۋروپانىڭ سول كەزدەگى چەمپيوندارى – پولشا قۇراماسىن 1:0 ەسەبىمەن تىزە بۇكتىردى. جارتىلاي فينالدا ۆەنگريانى 2:0 ەسەبىمەن ۇتتى.

فينالداعى قارسىلاس

ەندى قازاقستاندىق كوماندا فينالدا يسپانيامەن كەزدەسەدى. ويىن قازاقستان ۋاقىتىمەن ساعات 23:00-دە باستالادى. ترانسلياسيانى QazSport تەلەارناسىنان جانە SOCCA Federation YouTube كانالىنان تاماشالاۋعا بولادى.

بيزنەستىڭ قولداۋى

كومپانيا وكىلدەرىنىڭ ايتۋىنشا، بۇل جەتىستىك – ەلىمىزدەگى ميني-فۋتبولدىڭ دامۋىنا جانە سپورتتى قولداۋعا باعىتتالعان جۇيەلى جۇمىستىڭ ناتيجەسى. Allur كومپانياسى كوپ جىلدار بويى سپورتتى دامىتۋعا، سالاۋاتتى ءومىر سالتىن ناسيحاتتاۋعا بەلسەندى ينۆەستيسيا سالىپ كەلەدى. AFC Allur بازاسىندا ۇلتتىق قۇرامانىڭ قۇرىلۋى – قازاقستاننىڭ حالىقارالىق بەدەلىن نىعايتۋعا باعىتتالعان سپورت پەن وتاندىق بيزنەستىڭ تابىستى سينەرگياسىنىڭ مىسالى.

بۇگىندە قازاقستان قۇراماسى حالىقارالىق ارەنادا ەل نامىسىن قورعاپ قانا قويماي، ەلىمىزدەگى مىڭداعان جاس سپورتشىلارعا ۇلگى بولىپ، SOCCA قوزعالىسىنىڭ الەمدىك كوشباسشىلارىنىڭ ءبىرى رەتىندە قازاقستاننىڭ مارتەبەسىن راستاپ وتىر.