InfoHub Logo

ەندى قازاقستانعا ينۆەستورلار، بيزنەس وكىلدەرى جانە سۇرانىسقا يە ماماندىق يەلەرى سياقتى بەلگىلى ءبىر ساناتتاعى شەتەل ازاماتتارى ءۇشىن ەلگە كىرۋ، ۆيزا الۋ جانە باسقا دا قاجەتتى قۇجاتتاردى راسىمدەۋ وڭايلاي ءتۇستى. بۇل وزگەرىستەر شەتەلدىكتەردىڭ ەلگە كەلۋىن ىنتالاندىرىپ، ەكونوميكالىق دامۋعا سەرپىن بەرۋدى كوزدەيدى.

بۇل تۋرالى Infohub.kz اقپارات اگەنتتىگى حابارلايدى.

ينۆەستورلار مەن كاسىپكەرلەرگە جەڭىلدىكتەر

ينۆەستورلار مەن كاسىپكەرلەر ەندى ارنايى ۆيزالىق رەجيمدەردى، وتىنىشتەردى قاراۋدىڭ جەدەلدەتىلگەن راسىمدەرىن جانە ينۆەستيسيالىق جوبالاردى سۇيەمەلدەۋ تەتىكتەرىن پايدالانا الادى. بۇل شارالار شەتەلدىك ينۆەستيسيالاردى تارتۋعا جانە بيزنەس احۋالدى جاقسارتۋعا باعىتتالعان.

سۇرانىسقا يە ماماندارعا جاعداي جاساۋ

قازاقستانعا ەڭبەك ەتۋ ءۇشىن كەلەتىن، سۇرانىسقا يە ماماندىقتار بويىنشا بىلىكتىلىگى بار شەتەل ازاماتتارىنا دا قولايلى جاعدايلار جاسالدى. بۇل تىزىمگە ءىت سالاسىنداعى ماماندار (جاساندى ينتەللەكت ينجەنەرى، اقپاراتتىق جۇيەلەر ارحيتەكتورى، قوسىمشالار ازىرلەۋشىسى، اقپاراتتى قورعاۋ ينجەنەرى)، دەنساۋلىق ساقتاۋ سالاسىنىڭ ماماندارى (نەيروحيرۋرگ، گەماتولوگ، ونكولوگ، ساۋلەلىك دياگنوستيكا دارىگەرى)، كرەاتيۆتى يندۋستريا ماماندارى (گرافيكالىق ديزاينەر، دىبىس وپەراتورى، گرافيكالىق انيماسيا تەحنيكى)، سونداي-اق عىلىم، ينجەنەرلىك جانە وڭدەۋ سالالارىنداعى ماماندار كىرەدى.

ەاەو ەلدەرى ازاماتتارىنا ەركىن ەڭبەك ەتۋ قۇقىعى

ەۋرازيالىق ەكونوميكالىق وداققا (ەاەو) مۇشە مەملەكەتتەردىڭ (ارمەنيا، بەلارۋس، قىرعىزستان، رەسەي) ازاماتتارى ءۇشىن قازاقستاندا جۇمىس ىستەۋ وڭايلاتىلدى. ولار رۇقسات الۋدى قاجەت ەتپەي، ەركىن ەڭبەك ەتۋ قۇقىعىنا يە بولادى. بۇل ەڭبەك رەسۋرستارىنىڭ جوعارى دەڭگەيدەگى ۇتقىرلىعىن قامتاماسىز ەتىپ، ەكونوميكالىق ىنتىماقتاستىقتى دامىتۋعا ىقپال ەتەدى.

كۆوتالاۋ جۇيەسى جانە كوشى-قون ساياساتى

ەاەو-عا كىرمەيتىن ەلدەردىڭ ازاماتتارى ءۇشىن جۇمىس كۇشىن تارتۋدىڭ كۆوتالاۋعا نەگىزدەلگەن جۇيەسى جۇمىس ىستەيدى. بۇل ەكونوميكا مۇددەلەرى مەن ىشكى نارىقتى قورعاۋ اراسىنداعى تەپە-تەڭدىكتى ساقتاۋعا مۇمكىندىك بەرەدى. قازاقستان وسىلايشا وزىق، سالماقتى جانە اشىق كوشى-قون ساياساتىن جۇرگىزۋدە.

تۇراقتى تۇرۋعا رۇقسات الۋدىڭ جاڭارتىلعان تەتىگى

ەلدىڭ تۇراقتى دامۋىن قامتاماسىز ەتۋ جانە قازاقستانمەن بولاشاعىن بايلانىستىرعىسى كەلەتىن، ياعني ازاماتتىق العىسى كەلەتىن شەتەل ازاماتتارىن قابىلداۋ ساپاسىن ارتتىرۋعا باعىتتالعان كوشى-قون ساياساتى ۇنەمى جەتىلدىرىلىپ وتىرادى. وسىعان بايلانىستى، تۇراقتى تۇرۋعا رۇقسات الۋدىڭ جاڭارتىلعان تەتىگى ەنگىزىلۋدە. ول زاماناۋي سيفرلىق تاسىلدەر مەن اشىقتىق قاعيداتتارىنا نەگىزدەلگەن. جاڭا ءتارتىپ بويىنشا كانديداتتاردى كەزەڭ-كەزەڭىمەن باعالاۋ قاراستىرىلعان. وعان مەملەكەتتىك ءتىلدى ءبىلۋ دەڭگەيىن تەكسەرۋ، انكەتالىق دەرەكتەردى تالداۋ، سيفرلىق سكورينگ، سونداي-اق ءتيىستى مەملەكەتتىك ورگانداردىڭ تەكسەرۋلەرى جانە قورىتىندى سۇحبات كىرەدى.