InfoHub Logo

قازاقستانعا تۇراقتى تۇرۋعا كەلەتىن شەتەلدىكتەر مەن ازاماتتىعى جوق تۇلعالارعا ارنالعان مەملەكەتتىك قىزمەت كورسەتۋ پيلوتتىق جوباسىنا وزگەرىستەر ەنگىزىلۋدە. بۇل تۋرالى ەڭبەك، يندۋستريا جانە ينفراقۇرىلىمدىق دامۋ مينيسترلىكتەرى، سيفرلىق دامۋ مينيسترلىگى جانە ىشكى ىستەر مينيسترلىگى بىرلەسىپ دايىنداعان بۇيرىقتا ايتىلعان.

بۇل تۋرالى Infohub.kz اقپارات اگەنتتىگى حابارلايدى.

تىلدىك جانە بىلىكتىلىك سىناقتارى

ەندى قازاقستانعا تۇراقتى تۇرۋعا كەلەتىن يمميگرانتتار مىندەتتى تۇردە ونلاين-دياگنوستيكالىق تەست تاپسىرۋى كەرەك. تەست ناتيجەلەرى ءۇش جۇمىس كۇنى ىشىندە، پروكتورينگ ارقىلى تەكسەرۋ اياقتالعاننان كەيىن بەرىلەدى. ءار ءبولىم بويىنشا 70%-دان 100%-عا دەيىن بالل جيناعاندارعا سەرتيفيكات بەرىلەدى. ەگەر بەلگىلەنگەن مەجەدەن تومەن بالل السا، وندا انىقتاما بەرىلەدى. ءبىر نەمەسە ەكى ءبولىم بويىنشا 70%-دان تومەن بالل العان جاعدايدا، يمميگرانتقا 30 كۇنتىزبەلىك كۇن ىشىندە ەكى رەتتەن ارتىق تەست تاپسىرۋعا مۇمكىندىك بەرىلەدى.

يمميگراسيالىق الەۋەتتى باعالاۋ

يمميگراسيالىق الەۋەتتى باعالاۋ جۇيەسى دە ناقتىلانادى. ءبىلىم دەڭگەيى، ءتىلدى ءبىلۋ، جۇمىس تاجىريبەسى جانە باسقا دا كورسەتكىشتەر بويىنشا بالل قوسىلادى. ءوتۋ ءۇشىن ەڭ تومەنگى بالل – 600.

قانداس مارتەبەسىنە وزگەرىستەر

قانداس مارتەبەسىن جويۋعا دا نەگىزدەر قاراستىرىلعان. مىسالى، ەگەر ادام ۇكىمەت بەلگىلەگەن ايماقتاردان تىس جەرلەرگە تۇراقتى تۇرۋعا كەتسە، تولەم قابىلەتىن، ەڭبەك ءوتىلىن جانە رەسمي تابىسىن راستاي الماسا، نەمەسە اكىمشىلىك، قىلمىستىق قۇقىق بۇزۋشىلىقتار جاساسا، مارتەبەسىنەن ايىرىلۋى مۇمكىن.

تۇراقتى تۇرۋعا رۇقسات الۋ شارتتارى

شەتەلدىكتەرگە تۇراقتى تۇرۋعا رۇقسات الۋ ءۇشىن بەلگىلەنگەن ايماقتاردا كەمىندە ءبىر جىل زاڭدى تۇردە تۇرۋ قاجەت. بۇل ايماقتارعا اقمولا وبلىسى (كوسشى، ارشالى جانە سەلينوگراد اۋداندارىنان باسقا)، شىعىس قازاقستان، قوستاناي، پاۆلودار، سولتۇستىك قازاقستان وبلىستارى، سونداي-اق اباي جانە ۇلىتاۋ وبلىستارى كىرەدى. قىزمەت كورسەتۋ مەرزىمى قۇجاتتاردى تاپسىرعاننان كەيىن 45 كۇنتىزبەلىك كۇندى قۇرايدى.

قاجەتتى قۇجاتتار مەن تولەم قابىلەتىن راستاۋ

قۇجاتتار تىزىمىنە يمميگرانتتاردى كريتەريالدى باعالاۋدان وتكەنى تۋرالى حابارلاما جانە تولەم قابىلەتىن راستايتىن قۇجات كىرەدى. بانكتە كەمىندە 1320 اەك (2026 جىلى بۇل 5 709 000 تەڭگە) بولۋى ءتيىس. بۇل تولەم قابىلەتىن جىل سايىن بەس جىل بويى راستاۋ قاجەت بولادى. سونداي-اق، ازاماتتىق بەرگەن مەملەكەتتىڭ تۇراقتى تۇرۋعا كەتۋگە جازباشا كەلىسىمى نەمەسە باسقا دا قۇجاتتار تالاپ ەتىلەدى.

رۇقساتتان باس تارتۋ نەمەسە ونى بۇزۋ نەگىزدەرى

تۇراقتى تۇرۋعا رۇقسات بەرۋدەن باس تارتۋ نەمەسە ونى بۇزۋ نەگىزدەرىنىڭ ءتىزىمى كەڭەيتىلدى. ولاردىڭ قاتارىندا زاڭسىز كەلۋ، اۋىر قىلمىستار جاساۋ، كامەلەتكە تولماعاندارعا قارسى جىنىستىق قىلمىستار، ۇلتارالىق نەمەسە ءدىني ارازدىقتى قوزدىرۋ، ۇلتتىق قاۋىپسىزدىككە قاتەر ءتوندىرۋ، جالعان قۇجاتتار، داكتيلوسكوپيالىق تىركەۋدەن وتپەۋ، كوشى-قون، سالىق نەمەسە ەڭبەك زاڭناماسىن بىرنەشە رەت بۇزۋ بار. سونداي-اق، رۇقسات العاننان كەيىن 12 اي ىشىندە 183 كۇننەن از تۇرسا، سۇرانىسقا يە ماماندىق بويىنشا جۇمىس ىستەمەسە، كورسەتىلگەن مەكەنجايدا تۇرماسا نەمەسە بەلگىلەنگەن مەرزىم وتپەي باسقا ايماققا كوشسە، رۇقسات بۇزىلۋى مۇمكىن.

اتالعان بۇيرىق قولدانىسقا ەنگىزىلگەن كۇننەن باستاپ 2026 جىلدىڭ 31 جەلتوقسانىنا دەيىن قولدانىلادى.