InfoHub Logo

شىمكەنتتە تەگىن ءجۇزۋ سەكسياسىنا جازىلۋعا اتا-انالار اراسىندا ۇلكەن سۇرانىس تۋدى. جاستار سارايىنىڭ الدىنا تىركەۋ باستالماي جاتىپ، ءتۇن ورتاسىنان بەرى كەزەككە تۇرعان جۇرتشىلىق جينالدى. الايدا، بولىنگەن ورىندار سانى شەكتەۋلى بولىپ شىقتى.

بۇل تۋرالى Infohub.kz اقپارات اگەنتتىگى حابارلايدى.

اتا-انالاردىڭ نارازىلىعى

كوپتەگەن اتا-انالار بىرنەشە جىلدان بەرى بالالارىن ءجۇزۋ ۇيىرمەسىنە بەرە الماي جۇرگەندەرىن ايتىپ شاعىمداندى. كەيبىر اتا-انالار تاڭعى ساعات 8:30-دا كەلسە دە، 143-ورىندا تۇرعانىن ايتتى. رەسمي تىركەۋ ساعات 10-دا باستالۋى كەرەك بولعان.

«ەگەر اقشامىز جەتكەندە، ءبىز مۇنداي قيىندىققا تاپ بولماس ەدىك. بارلىعى بالالارىن تەگىن وقىتقىسى كەلەدى»، - دەيدى جەرگىلىكتى تۇرعىن ۇلمەكەن بيمۋسايەۆا.

تاعى ءبىر تۇرعىن ءۇلجان قونىسوۆا: «تۇنگى ساعات ۇشتە ادامدار ۇيىقتاۋى كەرەك. ءبىز تاڭەرتەڭ كەلدىك، ءبىراق 200-دەن استام ادام جينالعان. بۇل جاعدايدى رەتتەۋ كەرەك. ءار جولى وسىلاي بولادى. ءبىز ورتا عاسىردا ءومىر سۇرمەيمىز عوي»، - دەپ اشۋلاندى.

اكىمشىلىكتىڭ جاۋابى

مەكەمە اكىمشىلىگىنىڭ مالىمەتىنشە، باسسەينگە جازىلۋ اي سايىن جۇرگىزىلەدى. قازىرگى تاڭدا تەك 50 ورىن اشىق. ورىندار ساباققا قاتىسپايتىن نەمەسە سەبەپسىز جىبەرەتىن بالالاردىڭ ەسەبىنەن بوسايدى. سوندىقتان تەك تولىق قۇجاتتارى بار 50 ادام قابىلدانادى.

«اتا-انالار نەگە ونلاين تىركەۋگە بولمايتىنىن سۇرايدى. بۇرىن ونلاين تىركەۋ بولعان. ءبىراق 2026 جىلدان باستاپ پلاتفورما اۋىسقاندىقتان، اتا-انالار جەكە كەلۋى كەرەك. بىزدە «ميندال» پلاتفورماسى قولدانىلادى. باسسەين رەزەڭكە ەمەس، مىڭ بالانى بىردەي قابىلداي المايمىز. ءار توپتا 15 ادامنان ارتىق بولمايدى. گيگيەنا تالاپتارى دا بار»، - دەپ ءتۇسىندىردى ادىستەمەلىك ءبولىم مەڭگەرۋشىسى اقمارال ءجۇنىسوۆا.

ونىڭ ايتۋىنشا، باسسەين مىڭ بالانى قابىلداي الادى، ونىڭ ىشىندە 100-دەن استامى ەرەكشە قاجەتتىلىكتەرى بار بالالار. سوندىقتان ءار بالاعا جەكە وقۋ كەستەسى جاسالعان.