InfoHub Logo

قازاقستاندا ادام ساۋداسىمەن كۇرەس بويىنشا اۋقىمدى وپەراسيا ءوتتى. ءسابي ساۋداسى، جاستاردى زاڭسىز ارەكەتتەرگە تارتۋ، ۆەبكام-ستۋديالار ۇيىمداستىرۋ جانە ۇيىمداسقان قىلمىستىق توپتاردىڭ ارەكەتتەرى اشكەرەلەندى. بۇل تۋرالى ىشكى ىستەر مينيسترلىگىنىڭ (ءىىم) مالىمەتىنە سۇيەنە وتىرىپ حابارلايمىز.

بۇل تۋرالى Infohub.kz اقپارات اگەنتتىگى حابارلايدى.

ادام ساۋداسى: 41 قىلمىس تىركەلدى

ءساۋىر ايىندا وتكىزىلگەن "STOP ترافيك" جەدەل-الدىن الۋ شاراسى بارىسىندا ادام ساۋداسىنا قاتىستى 41 قىلمىس تىركەلگەن. ونىڭ 9-ى كامەلەتكە تولماعاندارعا قاتىستى بولىپ شىقتى.

قىزىلوردا وبلىسىندا ءسابي ساتىلعان

قىزىلوردا وبلىسىندا جاڭا تۋعان نارەستەنى ساتۋ سحەماسى انىقتالدى. 25 جاستاعى ايەل بوسانعاننان كەيىن سابيدەن باس تارتقان. وسىدان كەيىن ارنايى قوردىڭ باسشىسى دەلدال بولىپ، 50 جاستاعى وبلىس تۇرعىنىنا اسىراپ الۋ ءۇشىن ءبىر ميلليون تەڭگەگە ساتپاق بولعان. ءۇش كۇدىكتى دە ۋاقىتشا ۇستاۋ يزولياتورىنا قامالدى.

الماتىداعى ۇيىمداسقان قىلمىستىق توپ جانە ۇيسىزدەردى پايدالانۋ

الماتىدا ادام ساۋداسىمەن اينالىسىپ، ولاردى قىلمىستىق ماقساتتا پايدالانعان ۇيىمداسقان قىلمىستىق توپقا قاتىستى تەرگەۋ باستالدى. قىلمىسكەرلەر بەلگىسىز مەكەن-جايى جوق ادامداردى جۇمىسقا تارتۋ ارقىلى نەسيە راسىمدەپ، ولاردىڭ اتىنان اۆتوكولىكتەر ساتىپ الىپ، كەيىننەن قايتا ساتقان.

جەتىسۋ وبلىسىندا جاسوسپىرىمدەردى ۇرلاۋ

جەتىسۋ وبلىسىندا 2005 جانە 2007 جىلى تۋعان ەكى ءجاسوسپىرىمدى ەڭبەككە جەگۋ فاكتىسىنىڭ جولى كەسىلدى. ولاردى ۇرلاپ، تۇتقىندا ۇستاپ، تۇرمىستىق حيميا وندىرىسىندە جۇمىس ىستەۋگە ماجبۇرلەگەن. كۇدىكتىلەر ۇستالدى، جابىرلەنۋشىلەرگە مەديسينالىق كومەك كورسەتىلدى.

ۆەبكام-ستۋديالار جانە باسقا دا قىلمىستار

اباي وبلىسىندا ەرلى-زايىپتىلار ۆەبكام-ستۋديالار جەلىسىن ۇيىمداستىرعانى ءۇشىن ۇستالدى. ولار قىزداردى جۇمىسقا تارتۋمەن اينالىسىپ، پورنوگرافيالىق سيپاتتاعى ماتەريالدار تۇسىرۋگە جاعداي جاساعان. سونىمەن قاتار، ەلىمىزدىڭ ءبىرقاتار وڭىرىندە جاستاردى ازعىرۋعا قاتىستى 20 قىلمىستىق ءىس قوزعالدى. ونىڭ ىشىندە ايتۆ جۇقتىرۋ بويىنشا 15، پورنوگرافيا تاراتۋ بويىنشا 5 ءىس بار.