قازاقستاندا مىندەتتى مەكتەپ فورماسىنا قويىلاتىن تالاپتار بەكىتىلدى
ق ر ءبىلىم جانە عىلىم مينيسترلىگى ورتا ءبىلىم بەرۋ ۇيىمدارى ءۇشىن مىندەتتى مەكتەپ فورماسىنا قويىلاتىن تالاپتاردى بەكىتتى، دەپ حابارلايدى zakon.kz، primeminister.kz بەرگەن مالىمەتكە سۇيەنىپ.
قازاقستان رەسپۋبليكاسى ءبىلىم جانە عىلىم ءمينيسترىنىڭ 2016 جىلعى 14 قاڭتارداعى № 26 بۇيرىعىنا سايكەس اتالعان تالاپتار «ءبىلىم بەرۋدىڭ زايىرلى سيپاتىن ىسكە اسىرۋعا جانە ورتا ءبىلىم بەرۋ ۇيىمدارى ءبىلىم الۋشىلارىنىڭ اراسىندا الەۋمەتتىك، مۇلىكتىك جانە باسقا دا وزگەشەلىكتەردىڭ بەلگىلەرىن جويۋعا باعىتتالعان».
«مەكتەپ فورماسىنىڭ ۇلگىسى، ءتۇسى كلاسسيكالىق ستيلدە، ءبىرىڭعاي ءتۇس گامماسىندا جاسالادى، ۇشەۋدەن اسىرماي تۇستەردى ارالاستىرۋعا رۇقسات ەتىلەدى. مەكتەپ فورماسىنىڭ ءتۇسى قالىپتى جانە اشىق ەمەس تۇستەردەن تاڭدالادى. مەكتەپ فورماسى ءبىلىم الۋشىلاردىڭ جاس ەرەكشەلىكتەرىنە قاراي ەنگىزىلىپ، كۇندەلىكتى، مەرەكەلىك جانە سپورتتىق بولىپ بولىنەدى»، - دەلىنگەن قۇجاتتا.
ۇلداردىڭ مەكتەپ فورماسى: پيدجاك، جيلەت، شالبار، مەرەكەلىك جەيدە، كۇندەلىكتى جەيدە (قىسقى مەزگىلدە: تريكوتاج جيلەت، ۆودولازكا). ۇلدارعا ارنالعان شالبارلار ەركىن تىگىلگەن جانە ۇزىندىعى بويىنشا توبىقتى جاۋىپ تۇرادى.
قىزداردىڭ مەكتەپ فورماسى: پيدجاك، جيلەت، يۋبكا، شالبار، كلاسسيكالىق جەيدە (قىسقى ۋاقىتتا: تريكوتاج جيلەت، سارافان، ۆودولازكا). قىزدارعا ارنالعان شالبارلار ەركىن تىگىلگەن جانە ۇزىندىعى بويىنشا توبىقتى جاۋىپ تۇرادى.
ۇلداردىڭ مەرەكەلىك فورماسى كۇندەلىكتى فورماعا قوسىمشا اق جەيدەدەن، قىزدار ءۇشىن اق ءتۇستى بلۋزكادان قۇرالادى.
مەكتەپ فورماسىنا كلاسسيكالىق پىشىندەگى مەكتەپ فورماسىنىڭ نەگىزگى تۇسىنە سايكەس نەمەسە كەرەعار كەلەتىن گالستۋك تىگىلەدى.
«مەكتەپ فورماسىنا ءتۇرلى كونفەسسيالارعا قاتىستى كيىم ەلەمەنتتەرىن قوسۋعا بولمايدى»، - دەلىنگەن حابارلامادا.
مەكتەپ فورماسىنا ورتا ءبىلىم بەرۋ ۇيىمىنىڭ ەرەكشەلىك بەلگىلەرىن (بەلگىلەر، تىگىسپەلەر جانە ت.ب.) سالۋعا بولادى. ولار كيىمنىڭ نەمەسە اكسەسسۋاردىڭ (پيدجاك، جيلەت، گالستۋك) جوعارعى بولىگىندە ورنالاسادى.
مەكتەپ فورماسىنا قويىلاتىن تالاپتار كليماتتىق جاعداي، وقۋ ساباقتارىنىڭ وتكىزىلۋ ورنى جانە وقۋ عيماراتىنداعى تەمپەراتۋرالىق رەجيم ەسكەرىلىپ، ىسكە اسىرىلادى.
سونداي-اق، جاراقاتتايتىن فۋرنيتۋراسى بار كيىم مەن اكسەسسۋارلار كيۋگە تىيىم سالىنادى.
ۇلدار مەن قىزدارعا ارنالعان سپورتتىق فورما سپورتتىق كوستيۋمنەن (سپورتتىق شالبار، كۋرتكا، فۋتبولكا)، سپورتتىق اياق كيىمنەن (كراسسوۆكا، كەدى) تۇرادى.
مەكتەپ فورماسىنىڭ ماتاسى رەتىندە قاسيەتتەرى جاقسارتىلعان جارتىلاي ءجۇن جانە ماقتا، كيىسكە ءتوزىمدى، انتيباكتەريالدىق، انتيميكروبتىق جانە انتيستاتيكالىق قاسيەتتەرى بار ماتالار قولدانىلادى.
مەكتەپ فورماسىنىڭ ءتۇسىن، فاسونىن تاڭداۋدى جانە يۋبكانىڭ ۇزىندىعىن ورتا ءبىلىم بەرۋ ۇيىمى مەن قوعامدىق كەڭەس ايىقىندايدى، جالپىمەكتەپتىك اتا-انالار جينالىسىنىڭ حاتتاماسىمەن بەكىتىلەدى.
وبلىستاردىڭ، استانا جانە الماتى قالالارىنىڭ ءبىلىم باسقارمالارى، اۋداندىق (قالالىق) ءبىلىم بولىمدەرى اتا-انالارعا مەكتەپ فورماسىن وتاندىق مەكتەپ فورماسىن شىعاراتىن وندىرۋشىلەردەن ساتىپ الۋدى ۇسىنادى، ءبىراق ولاردى ناقتى وندىرۋشىلەردەن ساتىپ الۋدى مىندەتتەمەيدى نەمەسە وقۋ ورنىندا فورما ساتۋدى ۇيىمداستىرمايدى.
مەكتەپ باسشىسى اعىمداعى جىلعى 25 مامىرعا دەيىن مەكتەپ فورماسىنىڭ بەكىتىلۋىن قامتاماسىز ەتەدى. ءبىلىم الۋشىلاردىڭ مەكتەپ فورماسىن ساقتاۋى ماسەلەسىن قوعامدىق كەڭەستىڭ تالقىلاۋىنا شىعارىلادى. باسشى وسى تالاپتارمەن اتا-انالاردى نەمەسە زاڭدى وكىلدەردى ءبىلىم الۋشىنى ءبىلىم بەرۋ ۇيىمىنا قابىلداۋ تۋرالى ءوتىنىش (ەركىن نىساندا) بەرۋ كەزىندە قول قويعىزۋ ارقىلى جانە جالپى مەكتەپتىك اتا-انالار جينالىسىندا تانىستىرادى.
بۇيرىققا سايكەس اتا-انالار مەن وزگە دە زاڭدى وكىلدەر مەكتەپ فورماسى تۋرالى ماسەلەلەردى تالقىلاۋعا قاتىسادى جانە ونى جەتىلدىرۋ بويىنشا ۇسىنىس ەنگىزەدى، ونى كەز كەلگەن ساۋدا جەلىسىنەن ساتىپ الادى.
You Might Also Like
-
ەلباسى نۇرسۇلتان نازاربايەۆ اقتوبەدە «جاستىق! جىگەر! ەڭبەك!» اتتى رەسپۋبليكالىق جاستار فورۋمىنا قاتىستى.
