كوپ ۇزاماي الەم قازاقستاندىق عالىمدار مەن سپورتشىلار تۋرالى ەستيتىنىنە سەنىمدىمىن - ن.نازاربايەۆ
ەلباسى نۇرسۇلتان نازاربايەۆ اقتوبەدە «جاستىق! جىگەر! ەڭبەك!» اتتى رەسپۋبليكالىق جاستار فورۋمىنا قاتىستى.
بۇل تۋرالى اقوردانىڭ باسپا ءسوز قىزمەتىنەن حابارلادى.
فورۋمعا ەلدىڭ بارلىق وڭىرىنەن ءۇش مىڭداي جاستار وكىلى قاتىستى.
ءىس-شارا بارىسىندا فورۋمعا قاتىسۋشىلار «گۇلدەنە بەر، تۋعان ەل!» جالپىۇلتتىق مارافون-ەستافەتانىڭ باستالعانىن مالىمدەدى.
مەملەكەت باسشىسى مۇندا ەل ءۇمىت ارتقان ەڭ تالاپشىل جاستار جينالعانىن اتاپ ءوتتى.
«XXI عاسىردى ءبىز جاھاندىق سىن-قاتەرلەر ءداۋىرى عانا ەمەس، جاس، قۋاتتى جانە تالانتتى ادامداردىڭ ءداۋىرى دەپ تە اتايمىز. قازاقستاندا بۇگىندە ءاربىر ءتورتىنشى ازامات - جاس ۇرپاقتىڭ وكىلى. مەنى سىزدەردىڭ بىلىمدەرىڭىز، شەتەل تىلدەرىن يگەرگەندەرىڭىز، يننوۆاسياعا اشىق بولۋعا تالپىنىستارىڭىز قۋانتادى. ارالارىڭىزدا اقىلى مەن ءبىلىمى ءقازىردىڭ وزىندە وتانىمىزعا پايداسىن تيگىزىپ جاتقان جاستار از ەمەس. الەم جۇرتى كوپ ۇزاماي جاڭا قازاقستاندىق عالىمدار، دارىگەرلەر، ينجەنەرلەر، مۋزىكانتتار مەن سپورتشىلار تۋرالى ەستىپ-بىلەتىنىنە سەنىمدىمىن»، - نۇرسۇلتان نازاربايەۆ.
قازاقستان پرەزيدەنتى جاستار قازىرگى ۋاقىتتا ۇسىنىلىپ وتىرعان مۇمكىندىكتەردى پايدالانۋى قاجەتتىگىن ايتتى.
«ءبىز زاماناۋي ءبىلىم بەرۋ جۇيەسىن، زياتكەرلىك مەكتەپتەر، استانادا حالىقارالىق ۋنيۆەرسيتەت اشتىق. جىل سايىن مىڭداعان ستۋدەنتتى الەمنىڭ ۇزدىك ۋنيۆەرسيتەتتەرىنە جىبەرەمىز. ومىردەگى ەڭ باستى نارسە - ءبىلىم، جوعارى كاسىبيلىك جانە ءوز وتانىڭا ادالدىق، مەن سىزدەردى وسىنى ەستە ۇستاۋعا شاقىرامىن. سىزدەردە زور كۇش-قۋات پەن شىعارماشىلىق الەۋەت بار. وسىنىڭ ءبارىن ومىرلەرىڭىزدەگى ەڭ باستى ماقساتقا جەتۋگە باعىتتاڭىزدار»، - دەدى مەملەكەت باسشىسى.
نۇرسۇلتان نازاربايەۆ ءبىزدىڭ ەل جاستاردىڭ الەۋەتىن دامىتۋعا جانە جۇزەگە اسىرۋعا قاجەتتى جاعدايلار جاساپ جاتقانىن ايتتى.
«100 ناقتى قادام» ۇلت جوسپارىندا جاستاردى قولداۋعا باعىتتالعان شارالار قاراستىرىلعان. «جۇمىسپەن قامتۋدىڭ جول كارتاسى - 2020»، «بيزنەستىڭ جول كارتاسى-2020»، «ديپلوممەن - اۋىلعا»، «جاسىل ەل» جوبالارى ارقىلى جارتى ميلليون قازاقستاندىق جاس قامتىلعان. «قولجەتىمدى باسپانا» باعدارلاماسى اياسىندا جاس وتباسىلارعا 3،5 مىڭنان استام پاتەر بەرىلدى. بۇل جۇمىس ءالى جالعاسادى. 2017 جىلدان باستاپ ءاربىر ورتا مەكتەپ تۇلەگى مەملەكەت ەسەبىنەن العاشقى ماماندىعىن مەڭگەرىپ شىعاتىن بولادى. جاھاندىق داعدارىسقا قاراماستان، ءبىز بارلىق رەسۋرستى ەڭبەك ادامىن قولداۋعا باعىتتايمىز. بۇل ءبىزدىڭ ەكونوميكامىزدىڭ دامۋى ءۇشىن مۋلتيپليكاتيۆتى اسەردى قامتاماسىز ەتەدى، قازاقستاندىقتار ءۇشىن قۋاتتى «الەۋمەتتىك ساتى» قالىپتاستىرادى جانە جاستاردىڭ يگىلىگىن ارتتىرادى»، - دەدى قازاقستان پرەزيدەنتى.
مەملەكەت باسشىسى بۇگىندە ەلىمىزدە جولدار سالىنىپ، يندۋستريا دامىتىلىپ، جاڭا جۇمىس ورىندارى مەن يننوۆاسيالىق كاسىپورىندار اشىلىپ جاتقانىنا نازار اۋداردى.
«سىزدەردىڭ تىڭ يدەيالارىڭىز بەن جاستىق جىگەرلەرىڭىزدى قاجەت ەتەتىن جۇزدەگەن، مىڭداعان جۇمىستار بار. 200 مىڭدىق ساربازى بار «جاسىل ەل» اكسياسى ناعىز ەرلىك بولدى، ولار 10 جىلدا 115 مىڭ گەكتار اۋماقتا 50 ميلليون اعاش وتىرعىزدى. وسى يگى ميسسيانى جالعاستىرىپ، قازاقستاندى جاسىل ءارى بولاشاق ۇرپاق ءۇشىن تازا ولكەگە اينالدىرۋ كەرەك. سىزدەر ۋنيۆەرسيادا مەن حالىقارالىق ەكسپو-2017 كورمەسىن وتكىزۋ ىسىنە بەلسەنە قاتىساتىندارىڭىزعا سەنىمدىمىن. وسىنىڭ ءبارى سىزدەر ءۇشىن، سىزدەردىڭ بولاشاقتارىڭىز بەن ەلىمىزدىڭ بولاشاعى ءۇشىن جاسالۋدا. جاستارىمىز مەملەكەت قامقورلىعىنا ۇزدىك وقۋمەن، سپورتتاعى جانە شىعارماشىلىقتاعى تابىستارىمەن، وتانىنا قىزمەت ەتۋىمەن جاۋاپ بەرەدى دەپ سەنەمىن»، - دەدى نۇرسۇلتان نازاربايەۆ.
سوڭىندا قازاقستان پرەزيدەنتى ەلدىڭ بارشا جاستارىنا ءسوز ارنادى.
«سىزدەر - ەلدىڭ بولاشاعىسىزدار. سىزدەر مەن ءبىزدىڭ ۇلى ماقساتىمىز بار. ارماندار ۇمتىلعان كەزدە عانا ورىندالادى. قازاقستان ءححى عاسىردا قۋاتتى ءارى وزدەرىڭمەن بىرگە وركەندەيتىن ەل بولۋى ءۇشىن سىزدەردىڭ كۇش-جىگەرلەرىڭىز، ىنتىماقتارىڭىز، تاباندىلىقتارىڭىز بەن تالانتتارىڭىز جەتكىلىكتى ەكەنىنە سەنەمىن»، - دەدى مەملەكەت باسشىسى.
inform.kz
You Might Also Like
-
ق ر ءبىلىم جانە عىلىم مينيسترلىگى ورتا ءبىلىم بەرۋ ۇيىمدارى ءۇشىن مىندەتتى مەكتەپ فورماسىنا قويىلاتىن تالاپتاردى بەكىتتى، دەپ حابارلايدى zakon.kz، primeminister.kz بەرگەن مالىمەتكە سۇيەنىپ.
