InfoHub Logo

پرەزيدەنت قاسىم-جومارت توقايەۆتىڭ جاڭا جارلىعىمەن قازاقستاننىڭ سىبايلاس جەمقورلىققا قارسى ءىس-قيمىل اگەنتتىگى تاراتىلىپ، ونىڭ ورنىنا جاڭا قۇرىلىم پايدا بولدى. ەندى بۇل سالاداعى جۇمىستاردى ۇلتتىق قاۋىپسىزدىك كوميتەتى (ۇقك) اتقارادى.

اتاپ ايتقاندا، بۇرىنعى اگەنتتىك ۇقك قۇرامىنا كىرىپ، ونىڭ اياسىندا سىبايلاس جەمقورلىققا قارسى قىزمەت قۇرىلدى. بۇل قۇرىلىم قۇقىق قورعاۋ باعىتىن ساقتاپ قالادى جانە ناقتى تەرگەۋ جۇمىستارىمەن اينالىسادى.

ال ەندى ساياسات قالىپتاستىرۋ، جەمقورلىقتىڭ الدىن الۋ، سەبەپتەرىن ازايتۋ، قوعامدا ادالدىق قۇندىلىقتارىن ناسيحاتتاۋ سەكىلدى مىندەتتەر مەملەكەتتىك قىزمەت ىستەرى اگەنتتىگىنە جۇكتەلەدى.

توقايەۆتىڭ جارلىعىندا ناقتى مەرزىمدەر دە كورسەتىلگەن:

ۇقك ءبىر اي ىشىندە جاڭا قىزمەتتىڭ ەرەجەسىن ازىرلەپ، ونى پرەزيدەنتكە ۇسىنۋى كەرەك؛

مەملەكەتتىك قىزمەت اگەنتتىگى دە ءبىر اي ىشىندە ءوز ەرەجەسىنە وزگەرىستەر ەنگىزۋ جوباسىن دايىندايدى؛

ەكى مەكەمە ەكى ايدىڭ ىشىندە وزگە دە ۇيىمداستىرۋ شارالارىن تولىق اياقتاۋى ءتيىس؛

ۇكىمەتكە 1 قىركۇيەككە دەيىن جاڭا زاڭ جوباسىن جاساپ، پارلامەنتكە ەنگىزۋ تاپسىرىلدى.

جارلىق قول قويىلعان كۇننەن باستاپ كۇشىنە ەندى.

بۇل وزگەرىس قازاقستاندا سىبايلاس جەمقورلىقپەن كۇرەس تاسىلدەرىنىڭ تۇبەگەيلى وزگەرىپ جاتقانىن بىلدىرەدى. بۇرىنعىداي جەكە اگەنتتىك بولمايدى، ەندى جەمقورلاردى قۋدالاۋ ۇقك-نىڭ مىندەتى بولادى. ال الدىن الۋ مەن مادەنيەتتى قالىپتاستىرۋ جۇمىستارى باسقا ۆەدومستۆوعا جۇكتەلدى.