InfoHub Logo

13 ساۋىردەن باستاپ قازاقستاندا شەتەلدىك جۇمىسشىلارعا ارنالعان جۇمىسقا رۇقسات بەرۋ جانە ونى ۇزارتۋ قىزمەتى حقو-دا توقتاتىلادى. ەندى بارلىق وتىنىمدەر تەك ونلاين قابىلدانادى.

بۇل تۋرالى Infohub.kz اقپارات اگەنتتىگى حابارلايدى.

قىزمەتتىڭ ونلاين فورماتقا كوشىرىلۋى

ەڭبەك يمميگرانتتارىنا ارنالعان رۇقساتتاردى بەرۋ جانە ۇزارتۋ قىزمەتى تولىعىمەن ونلاين فورماتقا كوشىرىلدى. ەندى بۇل قىزمەتتى تەك eGov.kz نەمەسە migration.enbek.kz پورتالدارى ارقىلى عانا پايدالانۋعا بولادى.

بۇل وزگەرىس شەتەل ازاماتتارىنا قازاقستان اۋماعىندا جەكە تۇلعالاردىڭ ءۇي شارۋاشىلىعىندا جۇمىس ىستەۋگە رۇقساتتى ونلاين راسىمدەۋگە نەمەسە ۇزارتۋعا مۇمكىندىك بەرەدى. بۇرىن قاجەت بولعان كەيبىر قۇجاتتاردى قولمەن جۇكتەۋ تالابى الىنىپ تاستالدى. مىسالى، مەديسينالىق انىقتاما مەن ساقتاندىرۋ مالىمەتتەرى مەملەكەتتىك جۇيەلەردەن اۆتوماتتى تۇردە الىنادى.

سيفرلىق دامۋ مينيسترلىگىنىڭ حابارلاۋىنشا

ەلەكتروندىق ۇكىمەتتىڭ eGov.kz پورتالىندا ەڭبەك يمميگرانتتارىنا رۇقسات بەرۋ قىزمەتى بويىنشا بارلىق قاجەتتى ينتەگراسيالار جۇزەگە اسىرىلعان. بۇل مەديسينالىق تەكسەرۋ، ساقتاندىرۋ جانە سالىق تولەمدەرىن اۆتوماتتى تۇردە تەكسەرۋدى قامتيدى.

«13 ساۋىردەن باستاپ حقو ارقىلى بۇل قىزمەتتى كورسەتۋ توقتاتىلادى. ەندى وتىنىمدەردى قابىلداۋ تەك egov.kz نەمەسە migration.enbek.kz ارقىلى ونلاين جۇزەگە اسىرىلادى»، — دەپ اتاپ ءوتتى سيفرلىق دامۋ ءبىرىنشى ۆيسە-مينيسترى روستيسلاۆ كونياشكين.

رۇقساتتار قانداي مەرزىمگە بەرىلەدى؟

رۇقسات بەرۋ نەمەسە ۇزارتۋ تۋرالى شەشىمدى وبلىستىق ماڭىزى بار قالالار مەن اۋدانداردىڭ اكىمدىكتەرى، ىشكى ىستەر ورگاندارىنىڭ اۋماقتىق بولىمشەلەرىمەن كەلىسىمنەن كەيىن قابىلدايدى. رۇقسات ەڭبەك يمميگرانتتارىن تارتۋعا بەلگىلەنگەن كۆوتا شەڭبەرىندە 1-دەن 12 ايعا دەيىنگى مەرزىمگە بەرىلەدى. قوسىمشا اقپاراتتى eGov.kz پورتالىنان جانە ونىڭ الەۋمەتتىك جەلىلەرىنەن تابۋعا بولادى.