قازاقستانداعى جوو-لار مەن عىلىمي-زەرتتەۋ ينستيتۋتتارى بىرلەسىپ جۇمىس ىستەيتىن بولدى
قازاقستاننىڭ جوعارى وقۋ ورىندارى مەن عىلىمي-زەرتتەۋ ينستيتۋتتارى كادرلار دايارلاۋ، زەرتتەۋلەر جۇرگىزۋ ءۇشىن بىرلەسە جۇمىس ىستەۋى ءتيىس.
بۇل تۋرالى ءوزىنىڭ Facebook پاراقشاسىندا ق ر ءبىلىم جانە عىلىم ءمينيسترى اسحات ايماعامبەتوۆ جازدى.
«قازاقستاننىڭ جوعارى وقۋ ورىندارى مەن عىلىمي-زەرتتەۋ ينستيتۋتتارى كادرلار دايارلاۋ، زەرتتەۋلەر جۇرگىزۋ ءۇشىن بىرلەسە جۇمىس ىستەۋى ءتيىس وسى تۇرعىدان العاندا ۋنيۆەرسيتەتتەر مەن عىلىمي-زەرتتەۋ ينستيتۋتتارىنىڭ مۇمكىندىكتەرىن بىرىكتىرۋ ماڭىزدى. بۇل جۇمىستى جۇيەلى تۇردە ۇيىمداستىرۋ ءۇشىن جوو مەن عزي اراسىندا كەلىسىمدەرگە قول قويىلدى»،-دەپ جازدى، اسحات ايماعامبەتوۆ.
وسى باعىتتا بىرلەسكەن جۇمىستى اتقارعان ۇيىمدار جاقسى ناتيجەگە قول جەتكىزىپ جاتقانىن كورىپ وتىرمىز. كەيبىر ۇيىمدار وسى باعىت بويىنشا جۇمىستارىن ۇيىمداستىرۋدا. ءال-فارابي اتىنداعى قازاق ۇلتتىق ۋنيۆەرسيتەتى مەن بيولوگيالىق قاۋىپسىزدىك پروبلەمالارىنىڭ عىلىمي-زەرتتەۋ ينستيتۋتىنىڭ ىنتىماقتاستىعىنا ۇلگى رەتىندە قاراۋعا بولادى. بىرلەسە جۇمىس ىستەۋدىڭ ارقاسىندا «ۆيرۋسولوگيا» اتتى جاڭا باعدارلاما ازىرلەنىپ، بىرلەسكەن ديسسەرتاسيالىق كەڭەس قۇرىلدى. سونىمەن قاتار ۋنيۆەرسيتەت ستۋدەنتتەرى كوروناۆيرۋسقا قارسى ۆاكسينا جاساعان عالىمدارمەن ءوزارا بايلانىس ورناتتى.
جوعارى وقۋ ورىندارى مەن عزي ينتەگراسياسى نە ءۇشىن قاجەت جانە ونىڭ ناتيجەسى قانداي بولماق؟
1. عزي-لاردا جۇمىس ىستەيتىن جەتەكشى عالىمدار جوعارى وقۋ ورىندارىنا ساباق بەرۋگە تارتىلاتىن بولادى. سونداي-اق ولار ستۋدەنتتەردىڭ عىلىمي جوبالارىنا جەتەكشىلىك ەتەدى. قول قويىلعان كەلىسىمشارتتارعا سايكەس ءبىرىنشى كەزەڭدە بۇل جۇمىسقا 300 عالىم قاتىساتىن بولدى. وسى ۋاقىتقا دەيىن عزي-لاردا جۇمىس ىستەيتىن عالىمدار ءبىلىم بەرۋ جۇيەسىنە كوپ ارالاسپادى، دەگەنمەن ولاردىڭ ستۋدەنتتەرگە ساباق بەرۋى ماڭىزدى.
2. جوعارى وقۋ ورىندارى مەن عزي باستاپقى كەزەڭدە كادرلار دايارلاۋ ءۇشىن 500 ءبىلىم بەرۋ باعدارلاماسىن ازىرلەيدى. عىلىمي زەرتتەۋلەردىڭ ناتيجەلەرى ءبىلىم بەرۋ پروسەسىندە قولدانىلاتىن بولادى. سونداي-اق كادرلاردى دايارلاۋ بويىنشا بىرلەسكەن جۇمىس جۇرگىزىلەدى.
3. ماگيسترانتتار مەن دوكتورانتتار عىلىمي-زەرتتەۋ ينستيتۋتتارىنا بارا الادى جانە ولاردىڭ لابوراتوريالارى مەن بازاسى ولار ءۇشىن اشىق بولادى. كەلىسىمدەر اياسىندا ۇلتتىق يادرولىق ورتالىقتا، يادرولىق فيزيكا ينستيتۋتىندا، ۇلتتىق بيوتەحنولوگيالار ورتالىعىندا، بيولوگيالىق قاۋىپسىزدىك ينستيتۋتىندا جانە ت.ب. بىرەگەي عىلىمي زەرتحانالاردا تاعىلىمدامادان ءوتۋ تۋرالى ۋاعدالاستىق كوزدەلگەن.
4. سونداي-اق جۇزدەن استام بىرلەسكەن ديسسەرتاسيالىق كەڭەستەر جۇمىسىن جۇرگىزەدى، ولاردىڭ قۇرامىنا جوعارى وقۋ ورىندارىنىڭ، عىلىمي-زەرتتەۋ ينستيتۋتتارىنىڭ دا قىزمەتكەرلەرى كىرەدى. وكىنىشكە قاراي، وسى ۋاقىتقا دەيىن عزي عالىمدارى ديسسەرتاسيالىق كەڭەستەردىڭ جۇمىسىنا اسا ارالاسپاعان.
5. ە-lab اقپاراتتىق جۇيەسىن قۇرۋ تۋرالى شەشىم قابىلدادىق. وسى جۇيەنىڭ كومەگىمەن ءبىزدىڭ عىلىمي قىزمەتكەرلەر ەلىمىزدىڭ قاي ۋنيۆەرسيتەتىندە نەمەسە ينستيتۋتىندا قانداي زەرتحانا بار ەكەنىن كورە الادى جانە الدىن الا جازىلىپ، ولاردىڭ تەحنيكالىق مۇمكىندىكتەرىن پايدالانا الادى. بۇل ماڭىزدى جوبا، ويتكەنى ءبىزدىڭ ۋنيۆەرسيتەتتەردە ءارتۇرلى زەرتحانالار بار جانە ولاردى تولىعىمەن پايدالانۋ قاجەت.
«ءبىز قابىلداپ جاتقان شارالار عىلىمي زەرتتەۋلەردىڭ ساپاسىن جاقسارتۋعا، عىلىمي كادرلاردى دايارلاۋدىڭ تيىمدىلىگىنە باعىتتالعانىن جانە تالانتتى جاستاردى عىلىمعا تارتۋعا جانە قىزىقتىرۋعا كومەكتەسەتىنىن اتاپ وتكىم كەلەدى»،-دەدى مينيستر.
You Might Also Like
-
بىلتىردان باستاپ پەداگوگيكالىق ماماندىقتار بويىنشا وقۋعا ءتۇسۋ تالاپتارى قاتاڭداتىلىپ، مەجەلىك بالل كوتەرىلدى. دەگەنمەن، وسى قاتاڭ تالاپتان سۇرىنبەي وتكەن تالاپكەرلەر ستۋدەنت اتانعاننان كەيىن ەڭ جوع...
-
ەرتەگىنىڭ ماقساتى – تىڭداۋشىعا عيبرات ۇسىنۋمەن بىرگە ەستەتيكالىق ءلاززات بەرۋ. ەرتەگىنىڭ اتقاراتىن قىزمەتى كەڭ: ول ءارى تاربيەلىك، ءارى كوركەم-ەستەتيك. ادەبي قازىنا.
