InfoHub Logo

جەتىسۋ وبلىسىنداعى جانسۇگىروۆ اۋىلىنىڭ تۇرعىنى دانيار بەيسقاليدىڭ مەملەكەتتىك گەربتى قوقىس ۇيىندىسىنەن تاۋىپ، ونى قالپىنا كەلتىرىپ، ۇيىنە ءىلىپ قويعانى ءۇشىن اكىمشىلىك جاۋاپكەرشىلىككە تارتىلىپ، 50 اەك كولەمىندە ايىپپۇل تولەگەنى تۋرالى اقپارات جەلىدە قىزۋ تالقىعا ءتۇستى. بۇل جاعدايعا قاتىستى وبلىستىق پوليسيا دەپارتامەنتى تۇسىنىك بەردى.

بۇعان دەيىن 37 جاستاعى ازامات 2022 جىلى قوقىس الاڭىنان مەملەكەتتىك گەربتىڭ ماكەتىن تاۋىپ العانىن، ونى جوندەپ، ۇيىنە ءىلىپ قويعانىن ايتقان بولاتىن. الايدا، ءتورت جىلدان كەيىن ونىڭ اكىمشىلىك قۇقىق بۇزۋشىلىقتار تۋرالى كودەكسىنىڭ 458-بابى بويىنشا 216 250 تەڭگە ايىپپۇلعا تارتىلعانى حابارلاندى. بۇل ارەكەتى مەملەكەتتىك رامىزدەردى دۇرىس پايدالانباۋ دەپ تانىلعان.

بۇل شەشىم كوپشىلىكتىڭ نارازىلىعىن تۋدىردى. ازامات مەملەكەتتىك ءرامىزدى قوقىستان تاۋىپ، ونى قالپىنا كەلتىرگەنى ءۇشىن نەگە جازالانۋى كەرەكتىگى تۋرالى سۇراقتار قويىلدى. بۇل جاعداي ءتىپتى ءماجىلىس كۋلۋارلارىندا دا تالقىلانىپ، ىشكى ىستەر ءمينيسترىنىڭ ورىنباسارىنا ساۋال جولداندى. ول دانيار بەيسقاليدىڭ اكىمشىلىك جاۋاپكەرشىلىككە سوت شەشىمىمەن تارتىلعانىن ايتتى.

شىنايى سەبەپ: مەملەكەتتىك ءرامىزدى قورلاۋ

كەيىننەن جەتىسۋ وبلىستىق پوليسيا دەپارتامەنتى بۇل جاعدايعا قاتىستى تۇسىنىك بەرىپ، تاراعان اقپاراتتىڭ دۇرىس ەمەس ەكەنىن جانە حالىقتى شاتاستىرۋى مۇمكىن ەكەنىن مالىمدەدى. پوليسيانىڭ حابارلاۋىنشا، ازامات مەملەكەتتىك ءرامىزدى تاپقانى ءۇشىن جازالانباعان. ونىڭ جاۋاپكەرشىلىككە تارتىلۋىنا باسقا دا ءمان-جايلار سەبەپ بولعان.

«مەملەكەتتىك ءرامىزدى تاپقاننان كەيىن ازامات وعان نەمقۇرايلى قارايتىنىن بىلدىرەتىن ارەكەتتەرگە بارعان. سونىڭ ىشىندە، وعاش قالپىندا سۋرەتكە ءتۇسىرىپ، ءرامىزدى بۇرمالاپ قولدانۋ ەلەمەنتتەرى بار سۋرەتتەردى جاريالاعان. ۋاكىلەتتى ورگاننىڭ ۇسىنىسى بويىنشا بۇل ارەكەتتەرگە قۇقىقتىق باعا بەرىلدى. قازاقستان رەسپۋبليكاسىنىڭ قولدانىستاعى زاڭناماسىنا سايكەس، بۇل مەملەكەتتىك رامىزدەرگە دەگەن قۇرمەتسىزدىك، ياعني ونى پايدالانۋ ءتارتىبىن بۇزۋ بولىپ سانالادى جانە زاڭدا بەلگىلەنگەن جاۋاپكەرشىلىككە اكەپ سوعادى»، - دەپ حابارلادى پوليسيا دەپارتامەنتى.

وسى فاكتى بويىنشا دانيار بەيسقالي اكىمشىلىك جاۋاپكەرشىلىككە تارتىلعان. وڭىردەگى پوليسيا زاڭ اياسىندا ارەكەت ەتىپ جاتقانىن جانە تەك تەكسەرىلگەن، رەسمي اقپاراتقا سۇيەنۋگە شاقىردى.