InfoHub Logo

جاقىندا قازاقستان اسپانىندا جاڭا كولىك ءتۇرى – اەروتاكسي پايدا بولادى. بۇل تۋرالى پارلامەنتتىڭ بىرلەسكەن وتىرىسىندا پرەمەر-مينيستردىڭ ورىنباسارى قانات بوزىمبايەۆ مالىمدەدى. جاڭا الاتاۋ قالاسى قىتايدان تىس جەردە بەسپيلوتتى اەروتاكسيلەردىڭ 120 مەتردەن استام قاشىقتىقتا ۇشاتىن العاشقى ورىن بولادى.

بۇل تۋرالى Infohub.kz اقپارات اگەنتتىگى حابارلايدى.

350 كم/ساع جىلدامدىقپەن، كەپتەلىسسىز

اەروتاكسيلەر ارنايى باعىتتار بويىنشا ساعاتىنا 300-350 شاقىرىم جىلدامدىقپەن ۇشادى. العاشقى كەزەڭدە الماتى، الاتاۋ جانە قونايەۆ قالالارى اراسىندا قاتىنايدى. اۋەدەگى جول ءجۇرۋ ۋاقىتى 10-15 مينۋتتى قۇرايدى. سالىستىرمالى تۇردە ايتساق، بۇل باعىتتى اۆتوكولىكپەن ءوتۋ، اسىرەسە، كەپتەلىس كەزىندە ءبىر جارىم ساعاتقا دەيىن سوزىلۋى مۇمكىن.

تۋريستەر اەروتاكسيمەن مەدەۋگە، تاۋلى ايماققا جانە قاپشاعاي جاعالاۋىنا بارا الادى. بيلىك وكىلدەرىنىڭ باعالاۋىنشا، بۇل باعىتتار بويىنشا تۋريستەر اعىنى جىلىنا 8 ميلليون ادامعا جەتۋى ىقتيمال.

كىمدەرمەن كەلىسىم جاسالدى؟

قازاقستان اەروتاكسي سالاسىنداعى الەمدىك كوشباسشىلاردىڭ ءبىرى – امەريكاندىق Joby Aero كومپانياسىمەن قۇجاتتارعا قول قويدى. ولاردىڭ تەحنيكاسىنا تاپسىرىس 15 جىلعا الدىن الا جازىلعان.

سونىمەن قاتار، قىتايلىق AutoFlight كومپانياسىمەن كەلىسسوزدەر جۇرگىزىلۋدە. جوبانى بيىل ىسكە قوسۋ جوسپارلانۋدا. الاتاۋ قالاسىندا اەروتاكسيلەردىڭ ۇشىپ-قونۋ نۇكتەلەرى – كۆادروپورتتار سالىنادى.

قازىرگى تاڭدا قالا جاعدايىندا 120 مەتردەن استام قاشىقتىقتا ۇشاتىن ۇشقىشسىز اپپاراتتاردىڭ ۇشۋى تەك قىتايدىڭ شەنچجەن قالاسىندا عانا جۇزەگە اسىرىلعان. الاتاۋ الەمدەگى ەكىنشى، ال قىتايدان تىس جەردەگى العاشقى وسىنداي ورتالىق بولۋى ءتيىس.

ءوز ەرەجەلەرى

بۇل جۇيەنىڭ جۇمىس ىستەۋى ءۇشىن الاتاۋ قالاسىندا سىناق قۇقىقتىق رەجيمدەر ەنگىزىلەدى. بۇل ۋاقىتشا ءتارتىپ كومپانيالارعا قاتاڭ زاڭنامالىق شەكتەۋلەرسىز تەحنولوگيالاردى سىناۋعا مۇمكىندىك بەرەدى. بۇل جاساندى ينتەللەكت، ۇشقىشسىز ۇشاتىن اپپاراتتار، روبوتتاندىرىلعان جۇيەلەر جانە اۆتونومدى كولىكتەرگە قاتىستى.

قالانى باسقارۋدى پرەمەر-مينيستر باستاعان كەڭەس جۇزەگە اسىرادى. بۇل كەڭەس پرەزيدەنتتىڭ جارلىعىمەن قۇرىلادى. الايدا، قىلمىستىق زاڭناما، قۇقىق قورعاۋ جۇيەسى جانە كونستيتۋسيالىق نورمالار رەسپۋبليكالىق زاڭناما اياسىندا وزگەرىسسىز قالادى.