InfoHub Logo

داعىستانداعى سۋ تاسقىنىنان كەيىن قازاقستاندىقتار ايماقتاعى جەرگىلىكتى تۇرعىندار مەن تانىستارىنا حابارلاسىپ، كومەك ۇسىنىپ جاتىر. جەلىدەگى جازبالاردا ادامدار زارداپ شەككەندەرگە قالاي قولداۋ كورسەتۋگە بولاتىنىن سۇراپ، اقشا، زات جىبەرۋگە نەمەسە ءتىپتى وزدەرى بارۋعا دايىن ەكەندەرىن بىلدىرۋدە.

بۇل تۋرالى Infohub.kz اقپارات اگەنتتىگى حابارلايدى.

الەۋمەتتىك جەلىلەردە قازاقستاندىقتار قولداۋ سوزدەرىن جازىپ، قانداي كومەك قاجەت ەكەنىن سۇراۋدا. «كارتا ءنومىرىن قايدان الامىز، اقشانى قايدا جىبەرۋگە بولادى؟»، «قانداي كومەك قاجەتتىگىن ءتىزىپ بەرىڭىزدەر، ءبىز دايىندايمىز»، «قالاي كومەكتەسۋگە بولادى؟»، «شىدايسىزدار!» دەپ جازۋدا.

مۇنداي حابارلامالار داعىستانداعى قاتتى جاڭبىر مەن سۋ تاسقىنى تۋرالى جاڭالىقتاردان كەيىن پايدا بولدى. سوڭعى كۇندەرى ايماقتاعى جۇزدەگەن ەلدى مەكەن سۋ استىندا قالىپ، تۇرعىنداردى شۇعىل ەۆاكۋاسيالاۋعا تۋرا كەلدى.

داعىستان تۇرعىندارىنىڭ جاۋابى

قازاقستاننان كەلگەن حابارلامالارعا داعىستان تۇرعىندارى دا جاۋاپ بەرىپ، قولداۋلارى مەن قامقورلىقتارى ءۇشىن العىس ايتۋدا. «قولداۋلارىڭىزعا راقمەت»، «قازاقستان حالقىن قانشالىقتى قۇرمەتتەيتىنىمدى ايتىپ جەتكىزە المايمىن. راقمەت!»، «سىزدەردىڭ پىكىرلەرىڭىزدى وقىپ، كوزىمە جاس كەلدى. راقمەت سىزدەرگە!» دەپ جازۋدا.

جەلى قولدانۋشىلارىنىڭ نازارىن داعىستان بەلسەندىسى وماراسحاب احمەدوۆتىڭ ۇندەۋى اۋداردى. ول 2024 جىلعى وقيعالاردان كەيىن قازاقستاندا جاقسى تانىس. سول كەزدە اتىراۋ وبلىسىنداعى اۋقىمدى سۋ تاسقىنى كەزىندە دامبالاردى نىعايتۋعا قاجەتتى قاپتاردىڭ جەتىسپەيتىنىن ەستىپ، داعىستاننان قازاقستانعا جولعا شىققان بولاتىن. ول سۋ تاسقىنى كەزىندە قورعانىس قۇرىلىستارىن سالۋعا پايدالانىلعان قاپتاردى اكەلگەن. بۇل ارەكەتى ءۇشىن جەرگىلىكتى تۇرعىندار وعان العىس بىلدىرگەن، ال اتىراۋدا ونى «اتىراۋدىڭ باۋىرى» دەپ اتاعان.

قازاقستاندىقتاردىڭ كومەك ۇسىنىسىنا جاۋاپ رەتىندە احمەدوۆ قازاقستاندىقتارعا جەدەل ارەكەت ەتكەندەرى ءۇشىن العىس ايتىپ، ۆيدەوۇندەۋ جولدادى. ول قازىرگى تاڭدا ايماقتىڭ ءوز كۇشىمەن جاعدايدى رەتتەپ جاتقانىن جانە ازىرگە قوسىمشا تۇرمىستىق كومەككە اسا زارۋلىك جوق ەكەنىن اتاپ ءوتتى.

«ءبارى جاقسى، كومەك سۇراۋعا ءماجبۇر بولاتىنداي جاعداي جوق. ءوز كۇشىمىزبەن جەڭەمىز دەپ ويلايمىن»، — دەدى ول.

سونىمەن قاتار، احمەدوۆ ادامداردىڭ كومەك كورسەتۋگە دايىن ەكەندىگىنىڭ ءوزى وعان وتە ماڭىزدى ەكەنىن ەرەكشە اتاپ ءوتتى.

«ەگەر قانداي دا ءبىر قاجەتتىلىك تۋىنداسا، قازاقستاندىق باۋىرلارىمىزدىڭ كومەككە دايىن ەكەنىن بىلەمىن. قازاقستاننان باۋىرلارىمىزدىڭ وسىنداي جىلدام ارەكەت ەتەتىنىنە وتە قۋانىشتىمىن»، — دەپ اتاپ ءوتتى ول.

احمەدوۆ قازاقستاندىقتارعا قولداۋلارى مەن جىلى قارىم-قاتىناستارى ءۇشىن تاعى دا العىس ءبىلدىردى.

بۇل ارادا قازاقستاندىقتار داعىستان تۇرعىندارىنا كومەك ۇسىنىپ، قولداۋ سوزدەرىن ءبىلدىرۋدى جالعاستىرۋدا. كوبىسى قازىرگى ۋاقىتتا قالاي كومەكتەسۋگە بولاتىنىن جانە گۋمانيتارلىق كومەكتى قايدا جىبەرۋگە بولاتىنىن سۇراۋدا.