InfoHub Logo

قازاقستاندىقتارعا دەپوزيت اشۋعا بەرىلگەن مۇمكىندىكتەر ازايىپ بارادى. 5 ماۋسىمنان كەيىن بانكتەر دەپوزيتتەر بويىنشا جوعارى پايىز مولشەرلەمەلەرىن ۇسىنباي قالۋى مۇمكىن. بۇل تۋرالى Infohub.kz اقپارات اگەنتتىگى حابارلايدى.

بانكتەر الدىن الا ارەكەت ەتۋدە

قازاقستاندىق دەپوزيتتەردى ساقتاندىرۋ قورىنىڭ (قدCق) سوڭعى ەسەبىنە سايكەس، ەلدەگى بانك نارىعىندا جاڭا ترەند بايقالادى. ءىرى بانكتەر ۇزاق مەرزىمدى (12 جانە 24 ايلىق) دەپوزيتتەر بويىنشا ماكسيمالدى مولشەرلەمەلەردى تومەندەتىپ، تاريفتىك كەستەلەرىن قايتا قاراستىرا باستادى.

بانكتەردىڭ مۇنداي ارەكەتىنىڭ سەبەبى – نارىقتاعى كۇتىلەتىن وزگەرىستەر. 5 ماۋسىمدا قازاقستان رەسپۋبليكاسىنىڭ ۇلتتىق بانكى بازالىق مولشەرلەمە بويىنشا كەزەكتى شەشىمىن جاريالايدى. قازىرگى تاڭدا بۇل مولشەرلەمە 18 پايىزدى قۇرايدى. ساراپشىلاردىڭ كوپشىلىگى ەكىنشى جارتىجىلدىقتا رەتتەۋشى ورگان اقشا-كرەديت ساياساتىن جەڭىلدەتىپ، مولشەرلەمەنى تومەندەتە باستايدى دەگەن پىكىردە.

انىقتاما: بازالىق مولشەرلەمە – ۇلتتىق بانكتىڭ اقشا-كرەديت ساياساتىنىڭ نەگىزگى قۇرالى. ول بانكتەردىڭ قانشا پايىزگa اقشا الا الاتىنىن كورسەتەدى جانە حالىق پەن بيزنەس ءۇشىن كرەديتتەر مەن دەپوزيتتەردىڭ پايىز مولشەرلەمەلەرىن انىقتايدى.

بانكتەر بۇل جاعدايدى جاقسى تۇسىنەدى جانە الدىن الا ارەكەت ەتەدى. ولار بولاشاقتا جالپى نارىقتىق مارجينالدى كورسەتكىشتەر تومەندەگەن كەزدە، ۇزاق مەرزىمدى دەپوزيتتەر بويىنشا جوعارى پايىز تولەگىسى كەلمەيدى.

ماۋسىمدا «مۇمكىندىك تەرەزەسى» جابىلادى

قاراپايىم قازاقستاندىقتار ءۇشىن بۇل تەڭگەمەن اشىلعان دەپوزيتتەر بويىنشا جوعارى تابىستىلىق كەزەڭىنىڭ اياقتالۋى دەگەندى بىلدىرەدى. مامىردىڭ سوڭى مەن ماۋسىمنىڭ ءبىرىنشى اپتاسى – پايدانى بەكىتۋگە بولاتىن سوڭعى «مۇمكىندىك تەرەزەسى» بولۋى مۇمكىن.

ەگەر ءقازىر ۇزاق مەرزىمدى جيناق دەپوزيت اشساڭىز، بانك كەلىسىمشارت مەرزىمى بويىنا، ياعني ءبىر جىل نەمەسە ەكى جىل بولسىن، ۇلتتىق بانك بازالىق مولشەرلەمەنى قانشا تومەندەتسە دە، بەلگىلەنگەن جوعارى پايىزدى تولەۋگە مىندەتتى بولادى.

بۇل رەتتە قازاقستانداعى جىلدىق ينفلياسيا دەڭگەيى 10،6 پايىزدى قۇرايدى (ءساۋىر ايىنداعى دەرەكتەر بويىنشا). بۇل بۇگىن اشىلعان ۇزاق مەرزىمدى دەپوزيت اقشانى قۇنسىزدانۋدان قورعاپ قانا قويماي، رەكوردتىق تازا ناقتى تابىس اكەلەتىنىن بىلدىرەدى – شامامەن 7-8 پايىز.

«ۇزاق مەرزىمدى» دەپوزيتتى تاڭداعاندا نەگە نازار اۋدارۋ كەرەك؟

قدCق ساراپشىلارى جوعارى مولشەرلەمەنىڭ ۇزاق مەرزىمدى ءونىمدى تاڭداۋداعى جالعىز كريتەريي ەمەستىگىن ەسكە سالادى. شارتقا قول قويماس بۇرىن ءۇش نەگىزگى فاكتورعا نازار اۋدارعان ءجون.

دەپوزيت ءتۇرى (جيناق / مەرزىمسىز)

ەڭ جوعارى تابىستىلىقتى تەك جيناق دەپوزيتتەرى بەرەدى. الايدا، ونىڭ قاتاڭ شارتتارى بار ەكەنىن ەستە ۇستاۋ قاجەت: جيناقتالعان پايىزدىڭ بارلىعىن جوعالتپاي، اقشانى مەرزىمىنەن بۇرىن الۋ مۇمكىن ەمەس. ەگەر سىزگە فورس-ماجور جاعدايىندا قارجىلىق قاۋىپسىزدىك جاستىعى قاجەت بولسا، مەرزىمسىز دەپوزيتتى قاراستىرعان ءجون (دەگەنمەن ونىڭ مولشەرلەمەسى ورتاشا ەسەپپەن 15،2 پايىز).

تولىقتىرۋ مۇمكىندىگى

ۇزاق مەرزىمدى دەپوزيتتەر تولىقتىرۋ قۇقىعىمەن جانە ونسىز بولادى. اقشانى قوسىمشا سالۋ مۇمكىندىگى جوق دەپوزيتتەردە مولشەرلەمە ءاردايىم 0،5–1،5 پايىزعا جوعارى بولادى. ەگەر سىزدە بەلگىلى ءبىر سومادا اقشا بولسا، تولىقتىرۋسىز نۇسقانى تاڭداڭىز. ەگەر جالاقىدان ۇنەمدەپ جيناۋدى جوسپارلاساڭىز، تولىقتىرۋ مۇمكىندىگى بار وپسيانى ىزدەڭىز.

مەملەكەتتىك كەپىلدىك

ءسىزدىڭ جيناقتارىڭىز زاڭمەن قورعالعان، ءبىراق بەلگىلى ءبىر ليميتتەر شەگىندە. قدCق ەسكە سالادى: مەملەكەت ءبىر بانكتەگى جيناق دەپوزيتتەرى بويىنشا 20 ميلليون تەڭگەگە دەيىن، ال باسقا تەڭگەلىك دەپوزيتتەر (اعىمداعى شوتتار مەن كارتوچكالاردى قوسا العاندا) بويىنشا 10 ميلليون تەڭگەگە دەيىن قايتارۋدى كەپىلدەندىرەدى. ەگەر ءسىزدىڭ جيناق سوماڭىز بۇل ليميتتەردەن اسسا، تاۋەكەلدەردى ديۆەرسيفيكاسيالاۋ جانە قاراجاتتى ءارتۇرلى قارجى ينستيتۋتتارىنا ءبولۋ ورىندى بولادى.