InfoHub Logo

ورال قالاسىندا «زەنيت» زاۋىتىندا قۇراستىرىلعان قازاقستاننىڭ ەڭ ءىرى كەمەسى سۋعا جىبەرىلدى. سالتاناتتى شاراعا باتىس قازاقستان وبلىسىنىڭ اكىمى ناريمان تورەعالييەۆ قاتىستى.

بۇل تۋرالى Infohub.kz اقپارات اگەنتتىگى حابارلايدى.

ەل قورعانىسىن نىعايتۋ جولىنداعى جاڭا جەتىستىك

وبلىس اكىمى ماڭىزدى جوبانىڭ ءساتتى اياقتالعانىمەن ۇجىمدى قۇتتىقتاپ، بۇل جۇمىستىڭ قازاقستان رەسپۋبليكاسى قورعانىس مينيسترلىگىنىڭ تاپسىرىسىمەن، پرەزيدەنتتىڭ تىكەلەي باستاماسىمەن جۇزەگە اسقانىن اتاپ ءوتتى.

«مەملەكەت باسشىسى قاسىم-جومارت توقايەۆ ەلىمىزدىڭ قورعانىس قابىلەتىن نىعايتۋ بويىنشا ناقتى مىندەتتەر قويدى. بۇگىن «زەنيت» زاۋىتى ۇجىمىنىڭ جوعارى كاسىبيلىگى مەن ادال ەڭبەگىنىڭ ارقاسىندا قازاقستانداعى ەڭ ۇلكەن كەمەنى سۋعا جىبەرىپ وتىرمىز. كەمەگە مەملەكەت جانە قوعام قايراتكەرى دىنمۇحامەد قونايەۆتىڭ ەسىمى بەرىلدى. ەكيپاجدىڭ قورعانىس الەۋەتىن ارتتىرۋ جولىندا ايانباي قىزمەت ەتەتىنىنە سەنىمدىمىن. ساتتىلىك تىلەيمىن!» — دەدى ناريمان تورەعالييەۆ.

كەمە تۋرالى تولىق مالىمەت

وبلىس اكىمىنىڭ باسپا ءسوز قىزمەتىنىڭ حابارلاۋىنشا، بۇل – «زەنيت» زاۋىتىندا جاسالعان 37ء-شى كەمە. ونىڭ سۋ سىيىمدىلىعى 720 توننانى قۇرايدى. جۇك ارقالايتىن ورىنىنىڭ كولەمى – 30 تەكشە مەتر.

«ورال زاۋىتى «زەنيت» اق باس ديرەكتورى ۆيتاليي كاپلۋنوۆتىڭ ايتۋىنشا، كەمە ساعاتىنا 16 توراپقا دەيىنگى جىلدامدىققا يە. ونىڭ ۇزىندىعى – 51 مەتر، ەنى – 9،5 مەتر. كەمە 8 بالدىق داۋىلعا توتەپ بەرە الادى. جوبانى جۇزەگە اسىرۋعا كاسىپورىننىڭ بارلىق قىزمەتكەرلەرى اتسالىستى.

بۇل كوپماقساتتى كەمە ق ر اسكەري-تەڭىز كۇشتەرىنىڭ كەمەلەرى مەن كاتەرلەرىن ديزەل وتىنىمەن، اۋىز سۋمەن، ازىق-تۇلىكپەن جانە باسقا دا ماتەريالدىق-تەحنيكالىق قۇرالدارمەن قامتاماسىز ەتۋگە ارنالعان.

ەكيپاج شامامەن 30 ادامنان تۇرادى. جەكە قۇرام ءۇشىن جايلى جاعدايلار جاسالعان.

تەڭىزگە شىعار الدىندا كەمە كوپىردىڭ استىنان ءوتۋى كەرەك، سوندىقتان ونىڭ ماچتاسى اقتاۋ پورتىندا ورناتىلاتىن بولادى.