InfoHub Logo

10 تامىزدا الماتى قالاسىندا الەمگە تانىمال امەريكالىق پوپ-جۇلدىز دجەننيفەر لوپەستىڭ كونسەرتى وتەدى دەپ جوسپارلانۋدا. الايدا بۇل شارانىڭ ءوتۋى ءقازىر سۇراق تۋدىرىپ وتىر. سەبەبى قوعام بەلسەندىسى ساۋلە ءابىلداحان قىزى الەۋمەتتىك جەلىدەگى پاراقشاسىندا كونسەرتتى وتكىزۋدى توقتاتۋعا شاقىردى، دەپ حابارلايدى ينفوحاب.كز.

بەلسەندى 10 تامىز — قازاق حالقىنىڭ ۇلى ويشىلى اباي قۇنانباي ۇلىنىڭ تۋعان كۇنى ەكەنىن العا تارتىپ، ءدال وسى كۇنى ويىن-ساۋىقتىق شارا وتكىزۋ – ۇلتتىق قۇندىلىقتارعا قايشى دەپ ەسەپتەيدى.

> «10 تامىز — ابايدىڭ تۋعان كۇنى. مۇنداي كۇنى شوۋ ۇيىمداستىرىپ، ونىڭ ۇستىنە لگبت قاۋىمداستىعىن اشىق قولدايتىن ارتىستەردى شاقىرۋ — بۇل قازاق مادەنيەتىنە دەگەن قۇرمەتسىزدىك»، – دەپ جازدى ول Facebook-تە.

بۇل مالىمدەمە الەۋمەتتىك جەلى قولدانۋشىلارى اراسىندا قىزۋ پىكىرتالاس تۋدىردى. ءبىرى بەلسەندىنىڭ ءۋاجىن قولداپ، رۋحاني كۇندە كوڭىل كوتەرەتىن ءىس-شارالارعا جول بەرمەۋ كەرەك دەسە، ەندى ءبىرى مۇنداي تىيىمدار مادەني ەركىندىككە شەكتەۋ سالادى دەپ سانايدى.

ازىرشە كونسەرت ۇيىمداستىرۋشىلارى رەسمي مالىمدەمە جاساعان جوق. سوعان قاراماستان، كونسەرتكە بيلەتتەر ساتىلىمدا قالىپ، دجەي لونىڭ مىڭداعان تىڭدارمانى شوۋدىڭ وتەتىنىنە ۇمىتتەنىپ وتىر.

ايتا كەتەيىك، بۇعان دەيىن دجەننيفەر لوپەستىڭ ساحنالىق كيىمدەرى 1 تامىز كۇنى استانادا وتكەن كونسەرتىنەن كەيىن قوعامدىق سىنعا ۇشىراعان ەدى.