InfoHub Logo

قاناتىن ەركىن قاقپاعان جۋرناليست...
اۆتور: وراز بەردالى عابيت ۇلى

ول دا بالا كەزىندە تەلەديداردان ديكتورلاردى كورىپ، ءسوزدىڭ قۇدىرەتىنە سەندى. گازەت پاراقتاپ وتىرىپ، “ءبىر كۇنى مەن دە جازامىن” دەدى. ارمانى اسقاق ەدى – شىندىقتى جازۋ، ادىلەتتى ايتۋ، حالىقتىڭ ءۇنىن جەتكىزۋ. ءبىراق ول ويلاعان جۋرناليستيكا – مۇلدە باسقا، ال ومىردە كۇتكەن جۋرناليستيكا – باسقا الەم بوپ شىقتى.

قوعامدا “جۋرناليست – ءتورتىنشى بيلىك” دەيدى. ال شىندىقتا ول – ءتورت جاققا تارتىلعان، تار شەڭبەردە تىرشىلىك ەتىپ جۇرگەن مامان. قانات بار، ءبىراق سامعاۋعا مۇمكىندىك جوق. ەركىندىك جايلى جازسا – سەنزۋرا كۇتىپ تۇرادى. اكىم تۋرالى اقيقات ايتسا – ار-نامىس تۋرالى سوتقا سۇيرەيدى. قاراپايىم حالىقتىڭ كوز جاسىن جەتكىزسە – “كەرەكسىز ماسەلە قوزعادىڭ” دەيدى. وسىندايدا جۋرناليست كىم ءۇشىن جۇمىس ىستەيدى – حالىق ءۇشىن بە، الدە قورقىپ وتىرعان رەداكتور ءۇشىن بە؟

ول – قاناتىن قاققىسى كەلەتىن قۇس سياقتى. جازعىسى كەلەدى، ءبىراق تاقىرىپ شەكتەلگەن. كورگىسى كەلەدى، ءبىراق شەكارا سىزىلعان. سەزەدى – قوعامدا ادىلەتسىزدىك كوپ، ءبىراق سونى جازۋعا كەلگەندە قورقىنىش پەن قىسىم الدىمەن قارسى شىعادى. ول ءۇنسىز قالسا – ىشكى جانايقايى تۇنشىعادى. ايتقىسى كەلسە – سىرتقى شەكتەۋ تۇساۋ بولادى.

جۋرناليست – تەك اقپارات تاراتۋشى ەمەس، ول – ار مەن سەنىمنىڭ يەسى. ءبىراق بۇل جول – داڭعىل ەمەس. بۇل جول – ءقاۋىپ پەن كۇمانگە تولى. قوعام ونى ءجيى تۇسىنبەيدى. بيلىك ودان ءجيى قورقادى. رەداكسيا ونى ءجيى تەجەيدى. ال ىشىندەگى وت – ءالى سونە قويماعان...

قاناتىن تولىق قاقپاعان جۋرناليست – جۇرەگى ەركىندىكتى اڭساعان ادام. ول سامعاي الماي جاتسا، بۇل ونىڭ السىزدىگىنەن ەمەس، جۇيەنىڭ تىم تومەن توبەسىنەن. ءبىراق ءبىر ءسات كەلەدى:
جەل سوعادى.
كوك اشىلادى.
سوندا ول دا قالىقتايدى.
قاناتتىڭ نە ءۇشىن بەرىلگەنىن ۇمىتپاي.