InfoHub Logo

ءبىر كۇنى دۋانباسى قوجاناسىرعا ون ەسەكتى بازارعا ساتىپ، سونىڭ اقشاسىنا ءبىر ات ساتىپ الۋدى تاپسىرادى. تاپسىرمانى العان قوجا ءبىر ءۇيىر ەسەكتى كورشى قالاعا ايدايدى.

قالانىڭ بازارىندا ەسەكتەرگە تەز ارادا الارمان تابىلىپ، جاقسى باعاعا وتكىزەدى. بازاردى ارالاپ ءجۇرىپ، الىستاعى ءبىر اۋىلدىن قازىسى، كارى بايدىڭ اتپەن جۇرگەنىن كورەدى.

— جولىڭىز بولسىن، بايەكە، — دەيدى قوجا.

قازى قوجا تۇراتىن قالاعا بارا جاتقانىن ايتادى.

— اھ، قۇداي تىلەۋىڭىزدى بەرسىن، جارقىنىم، — دەپ ءماز بولادى قوجا. — مەن دە سول جەرگە بارۋشى ەدىم. مەنى دە الا كەتشى. اياعىمدى باسا الاتىن ەمەسپىن، سالماعىم دا جەپ-جەڭىل، ارت جاعىڭا وتىرايىن. قۇدايىم سەنىڭ مەيىرىمدى جان ەكەنىڭدى ەسكەرىپ، جەر جانناتىنىڭ ساۋلەتتى سارايلارىن تارتۋ ەتسىن.

قازى قوجاعا زەكىپ تاستاماق بولادى دا، قۇداي الدىنا بارعاندا ءبىر داۋىستىڭ ارتىق بولمايتىنىن ويلاپ، قوجانى مىنگەستىرىپ الادى. قالاعا جارتى شاقىرىمداي قالعاندا قوجاناسىر قازىعا:

— و، كەڭ پەيىلدى سوپى! سىزگە ايتاتىن العىسىمدا شەك جوق، تاعى ءبىر ءوتىنىشىمدى ايتايىن! مەن ارت جاقتا وتىرۋعا قورقامىن. قۇلاۋعا شاق وتىرمىن. مەيىرىمدى اكەتاي، الدىڭا وتىرعىزشى، قۇداي سەنى حوردىڭ قىزدارىمەن سىيلاسىن!

باي بۇل ءوتىنىشىن دە ورىندايدى، اتتى توقتاتىپ، قوجاناسىردى الدىنا وتىرعىزادى.

قالاعا كىرە بەرگەندە، دۋانباسى جولىعا كەتەدى.

— ا، قوجاناسىر، قالاي ەسەكتەرىڭدى ساتتىڭ با، ات الدىڭ با؟ — دەيدى.

— البەتتە، كورىپ تۇرسىز عوي، — دەيدى قوجا.

سوسىن ارت جاعىندا وتىرعان قازىعا بۇرىلىپ، تۇك كورمەگەندەي بولىپ:

— ال كەلدىك، مىنە! اتتان ءتۇس تە، الىپ كەلگەنىمە راقمەتىڭدى ايت. جولاقى تولەمەي-اق قوي.

— ءاي، ءتۇسىڭ نە؟ — دەپ اڭ-تاڭ بولادى قازى. — سەنى جالىنىپ، جالبارىنعاسىن مىنگىزىپ ەدىم، مۇنىڭ نە؟

— اھ، ەندى وتىرىك ايتايىن دەدىڭ بە، — دەپ ايقاي سالادى قوجا. — تەز قاراڭدى باتىر، كانە، مەنىڭ جىنىما تيمەي! ءوي، وڭباعان! قاراڭدى باتىر، جوعال جانىڭنىڭ بارىندا! — دەپ دۋانباسى دا باس سالىپ قازىنىڭ جاعاسىنان الا كەتەدى.

قازى بۇرىلا بەرىپ، دۋانباسىنى ءبىر-اق سوعادى، ول مۇنى ۇرادى. قىرعىن توبەلەس باستالىپ كەتەدى. ەكى بايدىڭ توبەلەسىنە قاراپ جاتپاستان، قوجاناسىر اتتىڭ جۇگەنىن دۋانباسىنىڭ قولىنا قىستىرىپتى دا، قالتاسىندا قالعان اقشاسىن سيپاپ قويىپ، ۇيىنە قاراي بەت العان ەكەن.

---